Kiraŭnik MZS Izraila rezka adkazaŭ na pahrozy Erdahana i apublikavaŭ ździeklivy kałaž
Israel Kac paraŭnaŭ prezidenta Turcyi z Sadamam Chusejnam.
29.07.2024 / 08:58
Redžep Taip Erdahan. Fota: Paul Ellis / Getty Images
Israel Kac paraŭnaŭ Redžepa Taipa Erdahana z Sadamam Chusejnam i papiaredziŭ pra nastupstvy mahčymaj ataki na Izrail. Raniej Erdahan paraŭnaŭ premjer-ministra Bińjamina Nietańjachu z Adolfam Hitleram, paviedamlaje Deutsche Welle.
«Erdahan idzie pa śladach Sadama Chusejna i pahražaje napaści na Izrail. Chaj jon uspomnić, što tam (u Iraku) adbyłosia i čym usio skončyłasia», — napisaŭ Kac u sacsietcy Ch pozna ŭviečary niadzieli, ilustravaŭšy svajo paviedamleńnie fotakałažam dziejnaha tureckaha lidara i byłoha prezidenta Iraka.
Chusejn byŭ pakarany śmierciu ŭ kancy 2006 hoda pavodle prysudu Viarchoŭnaha suda Iraka.
Niekalkimi hadzinami raniej turecki prezident zajaviŭ, što Turcyja moža «ŭvajści» ŭ Izrail, jak jana ŭžo rabiła ŭ minułym ź inšymi krainami i terytoryjami. Erdahan nie ŭdakładniŭ, jakoha rodu ŭmiašańnie jon prapanuje. «My pavinny być vielmi mocnyja, kab Izrail nie moh rabić hetyja niedarečnyja rečy» z Paleścinskaj nacyjanalnaj aŭtanomijaj, zajaviŭ jon na schodzie svajoj kPartyi spraviadlivaści i raźvićcia ŭ horadzie Ryzie.
«Hetak ža, jak my ŭvajšli ŭ Karabach, hetak ža, jak my ŭvajšli ŭ Liviju, my možam zrabić toje ž samaje ź imi (u Izraile)», — skazaŭ turecki lidar.
«Niama pryčyn, pa jakich my nie možam hetaha zrabić… My pavinny być mocnymi, kab mieć mahčymaść zrabić hetyja kroki», — dadaŭ paźniej kiraŭnik Turcyi ŭ televizijnym zvarocie.
Z pačatku vajennaj apieracyi izrailskaj armii ŭ siektary Haza ŭ adkaz na ataku radykalnaha isłamisckaha ruchu CHAMAS na Izrail adnosiny pamiž Izrailem i Turcyjaj rezka pahoršylisia. Erdahan nazvaŭ CHAMAS «vyzvalenčaj arhanizacyjaj» i paraŭnaŭ premjer-ministra Izraila Bińjamina Nietańjachu z Adolfam Hitleram. U siaredzinie lipienia turecki lidar zajaviŭ, što jahonaja kraina bolš nie pahodzicca na supracoŭnictva pamiž NATO i Izrailem, pakul nie budzie dasiahnuty tryvały mir na paleścinskich terytoryjach.
Prezident Turcyi Erdahan pryhraziŭ Izrailu ŭvarvańniem