Кіраўнік МЗС Ізраіля рэзка адказаў на пагрозы Эрдагана і апублікаваў здзеклівы калаж
Ісраэль Кац параўнаў прэзідэнта Турцыі з Садамам Хусэйнам.
29.07.2024 / 08:58
Рэджэп Таіп Эрдаган. Фота: Paul Ellis / Getty Images
Ісраэль Кац параўнаў Рэджэпа Таіпа Эрдагана з Садамам Хусэйнам і папярэдзіў пра наступствы магчымай атакі на Ізраіль. Раней Эрдаган параўнаў прэм'ер-міністра Біньяміна Нетаньяху з Адольфам Гітлерам, паведамляе Deutsche Welle.
«Эрдаган ідзе па слядах Садама Хусэйна і пагражае напасці на Ізраіль. Хай ён успомніць, што там (у Іраку) адбылося і чым усё скончылася», — напісаў Кац у сацсетцы Х позна ўвечары нядзелі, ілюстраваўшы сваё паведамленне фотакалажам дзейнага турэцкага лідара і былога прэзідэнта Ірака.
Хусэйн быў пакараны смерцю ў канцы 2006 года паводле прысуду Вярхоўнага суда Ірака.
Некалькімі гадзінамі раней турэцкі прэзідэнт заявіў, што Турцыя можа «ўвайсці» ў Ізраіль, як яна ўжо рабіла ў мінулым з іншымі краінамі і тэрыторыямі. Эрдаган не ўдакладніў, якога роду ўмяшанне ён прапануе. «Мы павінны быць вельмі моцныя, каб Ізраіль не мог рабіць гэтыя недарэчныя рэчы» з Палесцінскай нацыянальнай аўтаноміяй, заявіў ён на сходзе сваёй партыі Справядлівасці і развіцця ў горадзе Рызе.
«Гэтак жа, як мы ўвайшлі ў Карабах, гэтак жа, як мы ўвайшлі ў Лівію, мы можам зрабіць тое ж самае з імі (у Ізраілі)», — сказаў турэцкі лідар.
«Няма прычын, па якіх мы не можам гэтага зрабіць… Мы павінны быць моцнымі, каб мець магчымасць зрабіць гэтыя крокі», — дадаў пазней кіраўнік Турцыі ў тэлевізійным звароце.
З пачатку ваеннай аперацыі ізраільскай арміі ў сектары Газа ў адказ на атаку радыкальнага ісламісцкага руху ХАМАС на Ізраіль адносіны паміж Ізраілем і Турцыяй рэзка пагоршыліся. Эрдаган назваў ХАМАС «вызваленчай арганізацыяй» і параўнаў прэм'ер-міністра Ізраіля Біньяміна Нетаньяху з Адольфам Гітлерам. У сярэдзіне ліпеня турэцкі лідар заявіў, што ягоная краіна больш не пагодзіцца на супрацоўніцтва паміж NATO і Ізраілем, пакуль не будзе дасягнуты трывалы мір на палесцінскіх тэрыторыях.
Прэзідэнт Турцыі Эрдаган прыгразіў Ізраілю ўварваннем