Pa-biełarusku vyjdzie videahulnia pra staražytnych słavian
Raspracoŭščyki abiacajuć, što ŭ hulni možna budzie naviedać niekatoryja histaryčnyja miaściny Biełarusi.
29.07.2024 / 11:25
Pasielišča, jakoje nam daviadziecca raźvivać i abaraniać u Song of Slavs. Skrynšot hulni
Song of Slavs (Pieśnia słavian) ad niezaležnych biełaruskich raspracoŭščykaŭ Sleeping Fox Studio — heta dvuchmiernaja sajd-skroler stratehija, u jakoj treba raźvivać svajo pasielišča. Hulnia vykanana ŭ pryhožaj stylistycy piksiel-arta. Muzyka sa słavianskimi matyvami i huki tradycyjnaha pobytu dazvolać pahruzicca ŭ atmaśfieru słavianskaj kultury.
Hulcam daviadziecca pryniać na siabie rolu miascovaha cara. Skrynšot sa Steam
Hulcam dastaniecca rola cara — lidara, jakomu daviadziecca sabrać armiju advažnych hierojaŭ i mudrych šamanaŭ, kab abaranić svaje ziemli. U hulni treba budzie šukać bałans pamiž bajavoj mocaj i dabrabytam pasielišča. Kožnaje rašeńnie budzie mieć nastupstvy.
Možna pryručyć koniej, kab vaš piersanaž pierasoŭvaŭsia chutčej, a sialanie mahli pieravodzić bolš resursaŭ. Skrynšot hulni
Raźvivajučy svajo pasielišča, možna budzie pryručać žyvioł, naprykład, kania možna budzie asiadłać, kab chutčej pierasoŭvacca, stvarać vazy dla sialan i novyja typy vojnaŭ, byk dapamoža ŭ haspadarcy, a dzika možna prynieści ŭ achviaru baham.
U pasieliščy možna budzie pabudavać fiermu, chlavy, łaźni, damy i inšyja pabudovy, jakija daduć bonusy dla raźvićcia. Nie varta zabyvać i pra ŭmacavańnie abarončych zbudavańniaŭ.
Dla raźvićcia pasielišča treba budavać nieabchodnyja dla jaho budynki. Skrynšot sa Steam
Kali vy budziecie dobrym kiraŭnikom, to pasielišča budzie raści i pieratvorycca ŭ słavuty horad staražytnych słavian. Dla hetaha daviadziecca pry lubym nadvorji dniom i ŭnačy kiravać svajoj votčynaj, raźmiarkoŭvać abaviazki siarod pasialencaŭ i abaraniać ich ad pahroz zvonku.
Spakojna budavać svoj horad hulcam nie daduć proćmy vorahaŭ. Skrynšot sa Steam
Pasielišča budzie atakavać proćma kavarnych vorahaŭ i kryvažernych monstraŭ, suprać jakim možna vystavić bolš voinaŭ, a možna prynieści achviaru i atrymać boskuju dapamohu.
Kožny voin u śvicie hulca moža stać unikalnym z dapamohaj bajavoj sistemy, zaviazanaj na atradzie i biłdach kožnaha asobnaha voina.
Car sa svajoj śvitaj. Skrynšot sa Steam
Važnaj častkaj hulni budzie jazyčnickaja viera. Staražytnyja duby — heta kaštoŭny resurs, ale i materyjał dla stvareńnia mahutnych idałaŭ, jakija dapamohuć abaranić pasielišča. Hulec zmoža sam vybrać, jakomu idału prynieści achviaru. Achviaravać idału možna budzie jak ježu, tak i jakoha-niebudź z pasialencaŭ — usio dziela ahulnaha miru i dabrabytu.
Adnaho z pasialencaŭ prynieśli ŭ achviaru jazyčnickamu idału. Skrynšot hulni
Jak paviedamlaje telehram-kanał «Biełaruski hiejmier», raspracoŭščyki zajaŭlajuć, što hulcy zmohuć naviedać staražytny Turaŭ. Heta ŭžo druhaja hulnia paśla Tales of Meadows, u jakoj nam abiacajuć pakazać hety staražytny biełaruski horad.
Data relizu nie nazyvajecca. Siarod zajaŭlenych moŭ jość nie tolki anhlijskaja i ruskaja, ale i biełaruskaja.
Pavodle infarmacyi kanała, u hulni budzie nie tolki pierakład interfiejsu i subcitraŭ, ale i paŭnavartasnaja biełaruskaja ahučka. Zdajecca, biełaruskaja mova, kultura i historyja stanoviacca trendam siarod maładych ajčynnych studyj.
Jak budzie vyhladać videahulnia pra staražytny Turaŭ
Japoncy patrabujuć admianić hulniu pra čarnaskuraha samuraja
Minskaja studyja vypuściła dema videahulni, u jakuju možna budzie pahulać pa-biełarusku
Sony sastupiła karystalnikam paśla hrandyjoznaha skandału