Sikorski: Biełaruś viedaje, što treba zrabić, kab adnosiny palepšali
Biełaruskija ŭłady mohuć nie pakinuć polskamu boku inšaj mahčymaści i jon pojdzie na zakryćcio miažy. Pra heta ŭ efiry RMF24 zajaviŭ ministr zamiežnych spraŭ Polščy Radasłaŭ Sikorski. Pa jahonych słovach, Minsk viedaje, što treba zrabić dla palapšeńnia adnosin z Varšavaj, a Kitaj vykazaŭ zaniepakojenaść ź situacyjaj na miažy, piša reformby.org.
25.07.2024 / 11:10
«Adnosiny ź Biełaruśsiu drennyja pa vinie Biełarusi. Heta ŭ Biełarusi biasprykładnaja kolkaść palityčnych źniavolenych, u tym liku Andžej Pačobut. Heta Biełaruś, nahadaju, pasadziła jeŭrapiejski samalot u Minsku, kab aryštavać dysidenta, za što atrymała jeŭrapiejskija sankcyi, i ŭ vyniku vyjšła z pahadnieńnia ab readmisii.
Ciapier kolkaść nielehalnych sprobaŭ parušeńnia polskaj, sajuznaj miažy krychu źniziłasia, ale bačym, što režym rasiejski, biełaruski vykarystoŭvaje, uklučaje i vyklučaje napłyŭ nielehalnych mihrantaŭ u adpaviednaści ź niejkimi palityčnymi instrukcyjami. Tak siabie nie pavodzić dobry susied. Biełaruś pavinna niešta zrabić, kab adnosiny palepšyć», — skazaŭ jon.
Ministr adznačyŭ, što pavodle jaho infarmacyi kitajski bok vykazaŭ biełaruskamu boku zaniepakojenaść situacyj na miažy z Polščaj i ŭ častcy ruchu tavaraŭ i ŭ častcy ruchu fizičnych asob. Raniej prezident Polščy Andžej Duda ŭ časie vizitu ŭ KNR uźnimaŭ pytańnie miažy ź Biełaruśsiu na pieramovach ź Si Czińpinam. Na minułym tydni ministr zamiežnych spraŭ Biełarusi Maksim Ryžankoŭ u efiry telebačańnia zajaviŭ, što «polski šantaž» pravaliŭsia.
Adkazvajučy na pytańnie ab mierkavanym zakryćci miažy, Sikorski padkreśliŭ, što heta suvierennaje prava Polščy, a biełaruskija ŭłady mohuć nie pakinuć joj inšaha vyjścia.
«Heta našaje suvierennaje prava. Bolšaść pamiežnych pierachodaŭ užo začynienyja, što vidavočna źviazana ź niazručnaściami roŭna jak dla prostych biełarusaŭ, tak i našych hramadzian. Ale režym moža nam nie pakinuć inšaj mahčymaści», — skazaŭ jon.
«Nakolki viedaju, na hetaj miažy ŭžo dachodziła da zatrymak, źviazanych z bolš dbajnym kantrolem i našaj nieabchodnaściu vykonvać sankcyi ŭ dačynieńni da tavaraŭ, jakija mohuć mieć padvojnaje pryznačeńnie. Jeŭrapiejskija kampanienty nie pavinny znachodzicca ŭ rasijskich dronach, rakietach», — dadaŭ ministr.
U adkaz na pramoje pytańnie, ci dapamoža zakryćcio miažy vyzvalić Andžeja Pačobuta i zabiaśpiečyć vydaču mihranta, jaki ź śmiarotna paraniŭ polskaha sałdata, Sikorski zajaviŭ, što «Biełaruś viedaje, što treba zrabić, kab adnosiny palepšylisia». Jon taksama padkreśliŭ, što znachodžańnie ŭ źniavoleńni dziejača polskaj dyjaspary, žurnalista, jak i navučańnie ahresiŭnych mihrantaŭ zjaŭlajucca nieprymalnymi dla polskaha boku.
Niadaŭna namieśnik Sikorskaha Andžej Šejna nazvaŭ try ŭmovy dla adnaŭleńnia adnosin pamiž Varšavaj i Minskam: spynieńnie hibrydnych atak na miažy, vyzvaleńnie Andžeja Pačobuta i vydača mihranta, jaki padazrajecca ŭ zabojstvie polskaha sałdata.
Namieśnik kiraŭnika MZS Polščy nazvaŭ try ŭmovy narmalizacyi adnosin ź Minskam
Donald Tusk pryznaŭ źnižeńnie mihracyjnaha cisku na polska-biełaruskaj miažy
Stali viadomyja padrabiaznaści sustrečy Dudy i Si Czińpina nakont režymu Łukašenki