Śpievaka — pastajannaha ŭdzielnika aficyjnych kancertaŭ — buduć sudzić za pratesty
Biełaruskaha śpievaka Rusłana Muśvidasa buduć sudzić za ŭdzieł u pratestach. Praces nad im pačniecca ŭ piatnicu, 26 lipienia, u sudzie Partyzanskaha rajona Minska. Infarmacyja ab hetym zjaviłasia na sajcie Viarchoŭnaha suda, zaŭvažyła «Lusterka». Jašče 9 maja Rusłan vystupaŭ na aficyjnym śviatočnym kancercie.
24.07.2024 / 12:15
Rusłan Muśvidas. Fota: Nacyjanalny akademičny kancertny arkiestr imia Finbierha
Abvinavačańnie 47-hadovamu muzyku vystaŭlena pa «narodnym» 342-m artykule Kryminalnaha kodeksa za «aktyŭny ŭdzieł u hrupavych dziejańniach, jakija hruba parušajuć hramadski paradak». Mienavita pa hetym artykule sudziać usich šarahovych udzielnikaŭ mirnych pratesnych maršaŭ, abvinavačvajučy ich, jak praviła, u tym, što jany išli pa prajeznaj častcy, pieraškadžajučy ruchu transpartu, i vykrykvali łozunhi.
Rusłan Muśvidas — šmathadovy salist Nacyjanalnaha akademičnaha kancertnaha arkiestra imia Finbierha. Jak havorycca ŭ jaho bijahrafii, Muśvidas z Bresta, naležyć da staražytnaha šlachieckaha rodu, muzyka ŭ čaćviortym pakaleńni (jaho dziadula byŭ skrypačom u litoŭskim vajskovym arkiestry) i vystupaje na scenie ź piaci hadoŭ. Pieramahaŭ na mnostvie fiestyvalaŭ i vakalnych konkursaŭ, a zaraz vybiraje pieramožcaŭ sam: jon byŭ u žury prajekta X Factor Belarus, jaki prachodziŭ na telekanale «Biełaruś 1».
Rusłan Muśvidas na solnym kancercie da svajho 45-hodździa. Fota: telekanał «Łahuna TB»
U śpievaka troje dziaciej. Chrosnym baćkam adnaho ź ich, padobna, zjaŭlajecca śpiavak i televiadučy Tea (Juryj Vaščuk), jaki pradstaŭlaŭ Biełaruś na «Jeŭrabačańni»: u Instagram Rusłan padpisaŭ zdymak ź im, nazvaŭšy Tea «siabram, paplečnikam i kumam». Starejšy syn Muśvidasa, Jan, užo taksama śpiavaje na scenie, vystupaŭ na šou «Va ŭvieś hołas» na telekanale «Mir» u kamandzie Biełarusi pad kiraŭnictvam Rusłana Alachno.
Rusłan Muśvidas i Tea. Fota z Instagram
Rusłan Muśvidas zjaŭlajecca na bolšaści dziaržaŭnych kancertaŭ — na śviatach, «Słavianskim bazary», respublikanskim vypusknym viečary i hetak dalej, zdymajecca ŭ navahodnich telekancertach
Śpiavaje jon i na vybarach. U adziny dzień hałasavańnia 25 lutaha 2024 hoda vystupaŭ na «zabaŭlalnaj prahramie dla žycharoŭ Zavodskaha rajona» na adnym z vybarčych učastkaŭ. Vystupleńnie jon anansavaŭ u sacsietcy i nie zabyŭsia zhadać, što treba schadzić prahałasavać. Za hety kancert Muśvidas atrymaŭ hanarar 1600 rubloŭ.
Rusłan Muśvidas. Fota z Instagram
A jašče niadaŭna, 9 maja, Rusłan śpiavaŭ na śviatočnym kancercie la Pałaca sportu. «Ech, puť-dorožka frontovaja, nie strašna nam bombiežka lubaja», — videa vykanańnia hetaj pieśni jon apublikavaŭ tady ŭ Instagram. Z taho času publikacyj na staroncy nie było.
Rusłan Muśvidas na kancercie da Dnia Pieramohi 9 maja 2024 hoda. Skrynšot: videa z Instagram
Ciapier Rusłanu Muśvidasu pahražaje pakarańnie ŭ vyhladzie aryštu (da 3 miesiacaŭ), albo abmiežavańnia voli na termin ad 2 da 5 hadoŭ, albo pazbaŭleńnia voli na termin da 4 hadoŭ.
Sudździoj pa spravie pryznačany Alaksandr Supičenka. Jon pracuje na pasadzie sudździ tolki dva hady, prysiahu prynios u červieni 2022-ha i byŭ pryznačany ŭ sud Partyzanskaha rajona na 5 hadoŭ. Supičenka paśpieŭ vynieści ŭžo mnostva palityčna matyvavanych prysudaŭ, jak i jaho kaleha z hetaj fatahrafii Volha Jemialjančanka.
Novyja sudździ na pryniasieńni prysiahi. Fota: Viarchoŭny sud
Ab zatrymańni Rusłana Muśvidasa nie paviedamlałasia. Mahčyma, siłaviki zacikavilisia im pa vynikach abłavy na ivent-ahienctvy. U kancy maja — pačatku červienia 2024 hoda siłaviki ŭčynili abłavu na niełajalnych kiraŭnikoŭ i supracoŭnikaŭ śviatočnych ahienctvaŭ Biełarusi. Byli zatrymanyja pradstaŭniki TAA «AP Ivent», «Hrafimił», TAA «Ivent-Kafe», «Ružovaj ziebry», a taksama dydžei i viadučyja. Tady zjavilisia i «pakajannyja» videa. Adno ź ich zapisaŭ viadomy śpiavak Saša Niema, skazaŭšy, što jon udzielničaŭ u pratestach u 2020 hodzie.
Palitźniavolenuju mamu błohierki Volhi Takarčuk pačnuć sudzić 1 žniŭnia
Stała viadoma pra aryšt historyka Ihara Mielnikava
Čarhovy chapun u Baranavičach — zatrymali adrazu piać čałaviek
Siońnia pačynajuć sudzić čarhovuju ajcišnicu, jakaja viarnułasia dadomu z Polščy