U Trampa byŭ efiektyŭny kozyr suprać Bajdena. Ciapier jon moža viarnucca bumieranham
Voś pra što idzie razmova.
24.07.2024 / 09:00
Donald Tramp. Fota: Bill Pugliano / Getty Images
Amal ŭsia ciapierašniaja pieradvybarnaja kampanija Donalda Trampa budavałasia na naratyvie, što Džo Bajden «mientalna niekampietentny i zanadta stary dla pasady prezidenta ZŠA, i tym samym jon hańbić Amieryku na ŭvieś śviet».
U asnovu naratyvu lehli rehularnyja łahičnyja niedakładnaści i niepamiatlivaść Bajdena padčas publičnych vystupaŭ, a taksama jaho niaŭdałyja debaty z Trampam u kancy červienia, paśla jakich bolšaść demakrataŭ zachacieła, kab Bajden syšoŭ z prezidenckaj honki. Što na dniach i adbyłosia.
Sapraŭdy, prezident ZŠA Džo Bajden nie raz traplaŭ u kamičnyja i niedarečnyja situacyi z-za svajoj niepamiatlivaści. Tak, naprykład, Bajden błytaŭ Zialenskaha z Pucinym, a svajho vice-prezidenta Kamału Charys nazyvaŭ Trampam.
Jašče Bajden raz-poraz hublaŭ raŭnavahu i aryjentacyju ŭ prastory, padčas samitaŭ i sustreč chadziŭ u pamyłkovych kirunkach i vitaŭsia ź ludźmi, pramachvajučysia z pociskam ruki.
Hetyja pavodziny Bajdena vyklikali ŭ častki jaho asiarodździa i asabliva ŭ supiernikaŭ žadańnie pravieryć prezidenta ZŠA na mientalnyja zdolnaści pry dapamozie śpiecyjalnych niezaležnych testaŭ.
Dalej za ŭsich u hetym namiery pajšoŭ Tramp, jaki niadaŭna prapanavaŭ Bajdenu prajści mientalny test razam, pavieryŭšy ŭ svaju pieravahu nad Bajdenam paśla debataŭ. Adnak ciapier hety vyklik moža paviarnucca katastrofaj dla samoha Trampa.
Tramp i Bajden padčas debataŭ u kancy červienia. Fota: AP
Sprava ŭ tym, što Tramp pa svaim ŭzroście amal nie sastupaje Bajdenu — palitykam 78 i 81 hod adpaviedna. Paśla sychodu Bajdena z prezidenckaj honki, Tramp staŭ samym pažyłym kandydatam na pasadu prezidenta ZŠA ŭ historyi.
I da jaho razumovych zdolnaściaŭ u ludziej uźnikaje pytańniaŭ nie mienš, čym da Bajdena.
Tramp taksama nie raz rabiŭ łahičnyja pamyłki na publicy, z-za čaho traplaŭ u kurjoznyja situacyi. Uvahi hetamu nadavałasia mienš, čym pamyłkam Bajdena, bo ŭ apošniaha bolš važnaja pasada i bolš vysoki aficyjny status.
Tym nie mienš, voś niekalki prykładaŭ niedakładnaściaŭ i niedarečnaściaŭ, u jakich byŭ zaŭvažany Tramp.
- Nazvaŭ vienhierskaha premjera Viktara Orbana «lidaram Turcyi», a samu Turcyju nazyvaŭ hieahrafičnym susiedam Rasii.
- Rehularna błytaŭ Džo Bajdena z byłym prezidentam ZŠA Barakam Abamaj. Tolki za apošnija paŭhoda heta adbyłosia trojčy, kali Tramp vystupaŭ na mitynhach.
- U minułym hodzie skazaŭ, što paŭnočnakarejski dyktatar Kim Čen Yn «uznačalvaje Kitaj i kiruje 1,4 miljarda ludziej».
-
Pad čas uzhadvańnia historyi amierykanskaj Vajny za niezaležnaść (1770-yja hady) Tramp zajaviŭ publicy, što brytanskaja armija vykarystoŭvała suprać amierykanskich kałanistaŭ avijacyju, a sami kałanisty potym «zachapili brytanskija aeraporty». Pieršyja ž samaloty źjavilisia praz stahodździe.
Akramia taho, Tramp nie raz zabyvaŭ, dzie jon znachodzicca, a taksama časam nie pryznavaŭ čalcoŭ svajoj siamji. Niekatoryja ludzi z atačeńnia palityka nazyvali takija pavodziny jak prykmietaj mientalnych adchileńniaŭ, tak i niedastatkovymi viedami pra śviet.
Usio vyšejskazanaje moža zhulać z Trampam u zły žart, bo jaho bolš vierahodnaja supiernica ad demakrataŭ Kamała Charys (jakoj 59 hadoŭ i jakaja ciapier apiaredžvaje Trampa pa śviežych apytańniach) moža skarystacca vyklikam Trampa prajści mientalnyja testy i vykarystać ich vyniki, vystaviŭšy Trampa na vačach u ZŠA takim ža «słabym dziedam», jakim toj dahetul vystaŭlaje Bajdena.
U dadatak da hetaha Charys moža pryniać jašče adzin vyklik na debaty ad Trampa, jaki pieršapačatkova byŭ adrasavany Bajdenu paśla jaho niaŭdałaha vystupu. Tramp, kaniečnie, moža admovicca zmahacca na publicy z maładziejšaj i badzioraj Charys, adnak heta moža być rasceniena jaho elektaratam jak spałoch, što drenna paŭpłyvaje na rejtynhi miljardera.
Miž tym u Bajdena navat hałava nie tresłasia
Jak apytańni aceńvajuć šansy Kamały Charys pieramahčy Donalda Trampa na vybarach u ZŠA