Stracili kaštoŭnaść. U Vierchniadźvinskim rajonie źniali achovu z pomnikaŭ pryrody
Achoŭnaha statusu byli pazbaŭleny hidrałahičny pomnik pryrody «krynica ahraharadka Kachanavičy» i bataničny pomnik pryrody «haradski park horada Vierchniadźvinska».
21.07.2024 / 17:30
Haradski park horada Vierchniadźvinska. Fota: Minpryrody
Adpaviednaje rašeńnie pryniaŭ Vierchniadźvinski rajvykankam 20 červienia 2024 hoda.
Pavodle jaho abiedźvie asabliva achoŭnyja pryrodnyja terytoryi stracili bijałahičnyja kaštoŭnaści, z metaj zachavańnia jakich jany byli abvieščany pomnikami pryrody. Jak tak stałasia i chto ŭ hetym vinavaty — nie ŭdakładniajecca.
Abiedźvie pryrodnyja terytoryi atrymali achoŭny status u 2011 hodzie. Da hetaha rašeńnia ŭ Vierchniadźvinskim rajonie naličvałasia 25 pomnikaŭ pryrody.
Praŭda, pavodle infarmacyi Minpryrody, z 1 sakavika 2016 hoda krynica ŭ Kachanavičach pieratvorana ŭ pomnik pryrody respublikanskaha značeńnia, jaki moža być likvidavany tolki rašeńniem viedamstva, a nie miascovych uładaŭ.
Śviaty kluč u Kachanavičach Vierchniadźvinskaha rajona. Fota: Minpryrody
Siarod miascovych žycharoŭ krynica viadomaja pad nazvaj Śviaty kluč. Kala Śviatoha kluča ŭ Kachanavičach na Trojcu ładzilisia kirmašy. U pačatku XX stahodździa pobač z krynicaj raźmiaščaŭsia majontak Salusina z młynam, jaki naležaŭ Chrapaŭnickaj. Reštki siadzibnaha parku taksama rekamiendavanyja śpiecyjalistami da ŭziacca pad achovu jak pomnik pryrody miascovaha značeńnia.
Śviaty kluč u Kachanavičach Vierchniadźvinskaha rajona. Fota: Minpryrody
Haradski park u Vierchniadźvinsku viadomy tym, što ŭ im pieravažaje chvoja zvyčajnaja ŭzrostam kala 80 hadoŭ, i tolki ŭ nievialikaj kolkaści prysutničajuć klon vastralisty, jasień vysoki, biaroza pavisłaja, dub čareščaty i alešyna šeraja. Na terytoryi parku vyjaŭleny 66 vidaŭ sasudzistych raślin.
Pad Maładziečnam adkryli novy zakaźnik
Jakija aziory Biełarusi samyja prazrystyja?
Jakuju ekaściežku ŭ Biełarusi abrać dla padarožža vychadnoha dnia?