U centry Kijeva źnieśli siadzibu Zialenskich
Haradskija ŭłady zajavili, što aburanyja situacyjaj i nazvali znos «dziorzkim i cyničnym samaŭpraŭstvam».
20.07.2024 / 13:53
Fota: Nacyjanalnaja palicyja
U centry Kijeva ŭčora ŭviečary, 19 lipienia, niesankcyjanava źnieśli histaryčny budynak — siadzibu Zialenskich (vulica Kaniskaha, 22), pabudavanuju ŭ 1890 hodzie. Palicyja ŭžo raspačała kryminalnuju vytvorčaść, paviedamlaje hromadske.ua.
Haradskija ŭłady zajavili, što aburanyja situacyjaj i nazvali znos «dziorzkim i cyničnym samaŭpraŭstvam».
Učora kiraŭnik departamienta, pradstaŭniki dobraŭparadkavańnia, haradskoj ułady, hramadskich arhanizacyj i žychary prybyli na miesca zdareńnia.
Tam adznačyli, što «asabliva cynična» znos vyhladaje na fonie taho, što niekalki dzion tamu hramadskaja arhanizacyja «Spadčyna Kijeŭ» padała ŭ Departamient pakiet dapracavanaj ulikovaj dakumientacyi pa prysvajeńni budynku statusu pomnika. Raniej haradski hałava padtrymaŭ pietycyju №12870 «Zachavać histaryčnuju siadzibu Zialenskich».
Zaraz Departamient vyvučaje ŭsie mahčymyja zakonnyja kroki i miery reahavańnia.
Tym časam palicyja Kijeva ŭstanaŭlivaje abstaviny znosu histaryčnaha budynka ŭ ramkach kryminalnaj vytvorčaści pavodle č. 2 art.298 Kryminalnaha kodeksa Ukrainy.
Palicyja ŭstanaviła miescaznachodžańnie techniki i kanfiskavali jaje, vyrašajecca pytańnie ab jaje aryšcie.
Tak vyhladała siadziba Zialenskich. Fota: hromadske.ua
Siadziba Zialenskich — dvuchpaviarchovy budynak u Kijevie, pabudavany z dreva i abkładzieny cehłaj. Adzin z najstarejšych budynkaŭ na vulicy Kaniskaha i apošni draŭlany budynak vulicy. Uvachodzić u «Śpis histaryčnych damoŭ, jakija majuć patrebu ŭ dadatkovaj abaronie» (ich zabaroniena znosić abo rekanstrujavać).
Budynak pabudavali jak siadzibu kupca i prafiesara Vasila Malinina, paśla ŭ 1915 hodzie tam pražyvała siamja mieščanina Jaŭmiena Zialenskaha, siadziba i była nazvana ŭ honar hetaj siamji. Siadziba maje prykmiety histaryzmu i nieareniesansu.