Siońnia hadavina samaha hučnaha zamachu na Hitlera
Siońnia spaŭniajecca 80 hadoŭ z dnia apieracyi «Valkiryja» — niaŭdałaj zmovy niamieckich hienierałaŭ suprać Adolfa Hitlera. Jaje lidaram byŭ pałkoŭnik viermachta Kłaus Šenk fon Štaŭfienbierh. Jaho ŭnuk zajaŭlaje pra pahrozy.
20.07.2024 / 11:56
Kłaŭsa fon Štaŭfienbierha rasstralali na nastupny dzień. Fota: Wikimedia Commons
U hadavinu putču intervju Bild daŭ jaho 53-hadovy ŭnuk Karł Hraf Štaŭfienbierh. Jon pradstaŭlaje libieralnuju partyju Svabodnych demakrataŭ u sielskaj akruzie Ron-Hrabfield u Bavaryi. Unuk vystupaje suprać ekstremizmu i ličyć heta praciaham spravy svajho dzieda. Za heta jamu i jahonym svajakam uvieś čas pastupajuć abrazy i pahrozy ŭ internecie.
Ultrapravyja, takija jak Bjorn Chiokie z «Alternatyvy dla Hiermanii», sprabujuć prypisać Štaŭfienbierha sabie: «Jany chacieli pakazać jaho jak niamiecki nacyjanalny simvał, navat paviesić jaho fatahrafiju ŭ svaich ofisach — ja chacieŭ kryčać ad hnievu».
Unuk upeŭnieny, što dzied nie byŭ by siońnia ź imi: «Jon, napeŭna, byŭ by ŭ CHDS/CHSS. Kansiervataram, ale sapraŭdy nie ŭ AdH. I choć jon pieražyŭ krach Viejmarskaj respubliki i spačatku byŭ spakušany dyktaturaj, siońnia jon byŭ by pierakananym demakratam».
Hałoŭnaj pahrozaj unuk ličyć padryŭ sistemy padziełu ŭładaŭ, što ŭžo adbyvajecca ŭ Polščy i Vienhryi: «Ja mahu ŭjavić, što i Tramp budzie imknucca da novaha terminu, kali znoŭ budzie abrany sioleta. Uładzimir Pucin pakazaŭ hety šlach u Rasii».
«U Hiermanii ŭžo 79 hadoŭ panuje mir, my žyviem u svabodnaj krainie, dzie kožny moža kazać i rabić, što choča. Ale palityčna situacyja abvastrajecca, stanovicca ŭsio bolš papulizmu. Niebiaśpieka dla našaj demakratyi realnaja. I kožny hramadzianin abaviazany stajać za jaje zachavańnie. Svabodu nielha ŭsprymać jak niešta, što samo saboj razumiejecca», — papiaredziŭ Štaŭfienbierh.