Stary paplečnik Łukašenki paraŭnaŭ jaho z ajatałoj Chamiejni. Paraŭnańnie tak sabie
Da 30-hodździa prychodu da ŭłady Łukašenki intervju haziecie «Mohilevskije viedomosti» daŭ jahony blizki paplečnik jašče z časoŭ pracy dyrektaram saŭhasa, a taksama deputactva ŭ Viarchoŭnym Saviecie XII sklikańnia Uładzimir Kanaploŭ.
19.07.2024 / 23:20
Ruchała Chamiejni. Fota: Wikimedia Commons
U 1990-ja i nulavyja Kanaploŭ zajmaŭ vysokija pasady, byŭ namieśnikam staršyni, a paśla i staršynioj Pałaty pradstaŭnikoŭ. Adnak paśla trapiŭ u apału, navat paru tydniaŭ pasiadzieŭ, u vyniku vykaraskaŭsia, ale ŭžo amal dva dziesiacihodździ zajmaje tolki ścipłuju pasadu kiraŭnika Biełaruskaj fiederacyi handboła.
U intervju jon raskazaŭ, što siabravaŭ z Łukašenkam jašče z časoŭ vučoby ŭ Mahiloŭskim piedahahičnym instytucie, paśla žyćcio ich krychu raźniesła, ale paśla pačatku pierabudovy ŭ SSSR, a značyć i adkryćcia mahčymaści zajmacca publičnaj palitykaj znoŭ źviało.
Adnosna niepasrednaj pracy z Łukašenkam ničoha asablivaha Kanaploŭ nie raskazaŭ — zbolšaha jahonyja raskazy tolki paćviardžeńnie i biez taho viadomych faktaŭ. Što i zrazumieła — być asabliva ščyrym, raskryvajučy niejkija, mahčyma, niazručnyja dla šefa tajamnicy apalnamu čynoŭniku, jaki šmat viedaje, davoli ryzykoŭna.
Ale ŭ farmavańnie kultu asoby Łukašenki, stvareńnie jakoha apošnim časam asabliva zaŭvažnaje, jahony były siabar svaju cahlinku pakłaŭ. Pry hetym vykarystaŭ vielmi aryhinalnaje i niečakanaje paraŭnańnie:
«Ciapier jon, viadoma, užo metr, heta naš biełaruski Chamiejni, jaho vybraŭ narod».
Paraŭnańnie, treba skazać, dastatkova dvuchsensoŭnaje, kali choć by paviarchoŭna viedać bijahrafiju taho čałavieka, ź jakim Kanaploŭ paraŭnaŭ Łukašenku.
Ruchała Chamiejni — heta lidar isłamskaj revalucyi 1979 hoda ŭ Iranie, stvaralnik toj Isłamskaj Respubliki Iran, jakaja isnuje siońnia i ź jakoj maje ciesnyja palityčnyja suviazi Łukašenka.
Voś tolki narod jaho nikoli nie abiraŭ navat farmalna, dy i sama relihijnaja pasada Najvyšejšaha kiraŭnika Irana (rachbara), jakuju zajmaŭ Chamiejni, hetaha nie praduhledžvaje.
Usienarodna abirajucca i pieraabirajucca ŭ Iranie, prytym rehularna dy ŭ sapraŭdy kankurentnaj baraćbie, chaj sabie i tolki ŭ ramkach sistemy, tolki śvieckija prezidenty, a rachbary pryznačajucca pažyćciova. Ich i było za ŭsiu historyju Isłamskaj Respubliki Iran pakul tolki dvoje: ciapierašni lidar, 85-hadovy Ali Chamieniei, zaniaŭ hetuju pasadu 3 červienia 1989 hoda, paśla śmierci 89-hadovaha Chamiejni.
A pryjšoŭ u svoj čas da ŭłady Ruchała Chamiejni takim sposabam, za adnu dumku pra jaki biełarusy siońnia atrymlivajuć ad łukašenkaŭskich sudoŭ vialikija terminy źniavoleńnia i hnajacca ŭ nialudskich umovach u turmach — u vyniku narodnych pratestaŭ zrynuŭšy ŭładu šacha Machamieda Reza Piechlevi, jaki pierad tym kiravaŭ krainaj bolš čym 37 hadoŭ, z 1941 pa 1979 hady.
Prytym, jak višańka na torcie, pierad prychodam da ŭłady hety čałaviek byŭ, karystajučysia paŭaficyjnaj terminałohijaj łukašenkaŭskaha režymu, «źbiehłym». Z 1964 pa 1979 hod Chamiejni žyŭ u vymušanaj emihracyi ŭ Turcyi, Iraku i Francyi, atrymlivajučy ŭ tym liku i roznaha kštałtu padtrymku ad zamiežnych uradaŭ dla baraćby z tahačasnaj prazachodniaj iranskaj manarchijaj.
Łukašenka zahadaŭ adpraŭlać na likvidacyju nastupstvaŭ urahanu palitźniavolenych
«Nie chočuć razumieć, što heta vajna!» Łukašenka vykazaŭ pretenzii paciarpiełym ad bury
Łukašenka daručyŭ arhanizavać «maštabnuju reviziju zakanadaŭstva»
Prezident Kuby zaprasiŭ Łukašenku na «Vostraŭ svabody» i paabiacaŭ tam jaho ciopła sustreć