«Няпрофільны дакумент». Акадэмія навук падрыхтавалася да знішчэння кніг
Па новай інструкцыі з бібліятэчных фондаў будуць выключаць літаратуру і дакументы, прызнаныя экстрэмісцкімі матэрыяламі.
19.07.2024 / 15:46
Фота: афіцыйны сайт НАН Беларусі
Аб'яднанне былых сілавікоў «Белпол» піша, што нядаўна Нацыянальная акадэмія навук Беларусі прыняла пастанову — «Інструкцыю аб парадку выключэння інфармацыйнай прадукцыі, якая прызнана экстрэмісцкімі матэрыяламі, з бібліятэчных фондаў бібліятэк Нацыянальнай акадэміі навук Беларусі і падначаленых ёй арганізацый».
Дакумент ускладае на кіраўнікоў бібліятэк персанальную адказнасць за несвоечасовае выяўленне і выключэнне згаданай літаратуры і несанкцыянаванае яе выкарыстанне.
У кожнай падведамаснай бібліятэцы цяпер будзе спецыяльная асоба, якая не радзей за раз на тыдзень будзе правяраць фонды, новыя паступленні, а таксама ліцэнзаваныя электронныя базы даных на наяўнасць у іх дакументаў, якія ўключаны ў Рэспубліканскі спіс экстрэмісцкіх матэрыялаў.
Калі такія выявяць, то іх будуць выключаць з фондаў з выдаленнем усёй інфармацыі з інфармацыйных рэсурсаў і з даведачна-бібліяграфічнага апарату. Выключыць такое выданне і інфармацыю пра яго павінны на працягу 30 дзён пасля ўнясення дакумента ў спіс.
У якасці падставы для выключэння будзе пазначацца «няпрофільны дакумент».
Калі экстрэмісцкі дакумент будзе знойдзены ў ліцэнзаванай базе даных, то на адрас пастаўшчыка будзе накіроўвацца паведамленне з патрабаваннем на працягу 30 дзён выключыць яго з доступу.
Пакуль на заканадаўчым узроўні не вызначаць, як знішчаць экстрэмісцкія матэрыялы, яны будуць захоўвацца. Для гэтага Цэнтральная бібліятэка выдзеліць шафу з замком, закрыты стэлаж ці асобнае памяшканне.
Доступ туды будзе мець толькі спецыяльна прызначаная асоба.
Кнігі Геніюш, Арсенневай і Някляева трапілі ў спіс экстрэмісцкіх матэрыялаў
«Экстрэмісцкую літаратуру» складаем асобна». У бібліятэках рыхтуюцца да адкрыцця спецхранаў
Улады ўпершыню пацвердзілі, што знішчаюць выданні, якія абвяшчаюць экстрэмісцкімі