Rasijski sałdat prystreliŭ paranienaha kalehu. Prapahanda sprabavała śpichnuć heta na ŭkraincaŭ
Telekanał «Nastojaŝieje vriemia» i źviazany ź im rasśledavalnicki prajekt «Sistema» vypuścili rasśledavańnie ab zabojstvie vajskoŭca, jakoha zastreliŭ kaleha ŭ rajonie Rabocina ŭ Zaparožskaj vobłaści. Videa ŭ nizkim razroźnieńni, źniataje dronam, raniej šyroka razyšłosia ŭ rasijskich Z-kanałach. Taksama zapis pakazali ŭ efiry telekanała «Rasija 24», rasijskija prapahandysty śćviardžali, što heta ŭkrainskija vajskoŭcy. Nasamreč ža ŭsio akazałasia zusim naadvarot, piša «Mieduza».
18.07.2024 / 16:45
Kadr ź videa z FPV-drona, źniataha 118-j bryhadaj USU
Aŭtary rasśledavańnia praanalizavali videa zabojstva, jakoje zrabiŭ bieśpiłotnik, atrymaŭšy aryhinalny zapis u vialikim razroźnieńni ad vajskoŭcaŭ 118-j bryhady USU (hetaja bryhada zapuściła dron). Pa niekalkich prykmietach žurnalisty vyznačyli, što ŭ kadr trapili rasijskija vajskoŭcy, a nie ŭkrainskija.
U videa troje vajskoŭcaŭ u kamuflavanaj vopratcy biez apaznavalnych znakaŭ biahuć pa darozie. Pobač z adnym ź ich vybuchaje bieśpiłotnik. Vajskoviec padaje, vidavočna, atrymaŭšy ranieńni. Sasłužyviec, jaki bieh za im, padychodzić da paranienaha. Toj pakazvaje jamu na svaju hałavu. Kaleha zabivaje paranienaha strełam u hałavu. Vajskoviec, jaki atrymaŭ ranieńni i paśla zabity, pakazany ŭ videa biez zbroi.
Uvaha. U videa pakazany momant zabojstva. Zanadta čullivym ludziam nie varta hladzieć jaho.
U aryhinalnym videa, padkreślivajuć aŭtary rasśledavańnia, možna razhledzieć detali, nieprykmietnyja ŭ viersii zapisu, jaki publikavali telehram-kanały. Voś jakija momanty vyłučyli aŭtary rasśledavańnia:
- Z-pad kamuflažnych štanoŭ zabitaha vajskoŭca vysoŭvajecca pałoska nižniaj bializny. Heta kitajskija trusy BOKAI, jakija raspaŭsiudžanyja ŭ Rasii. Raniej takija trusy taksama pradavali i va Ukrainie, ale jak minimum apošnija dva hady ich amal niemahčyma kupić.
- Štany na vajskoŭcach na videazapisie padobnyja na liniejku kamuflavanaha adzieńnia A-Tacs FG, jakoje nosiać rasijskija vajskoŭcy. Pry hetym va ŭkrainskich kramach taksama možna kupić štany takoj rasfarboŭki.
- U videa možna razhladzieć aŭtamat, ź jakoha vajskoviec zabivaje kalehu. Heta AK-12, jaki «Kałašnikaŭ» zapuściŭ u vytvorčaść u 2018 hodzie. Miarkujučy ź videa na rasijskich vajskovych resursach, rasijskija sałdaty raniej vykarystoŭvali AK-12 u Rabocinie, dzie źniataje videa. Pry hetym va USU jość trafiejnyja aŭtamaty AK-12.
Žurnalisty «Nastojaŝieho vriemieni» atrymali ad USU zdymku z kamiery FPV-drona, jaki nanosić udar pa adnym z vajskoŭcaŭ. Na zapisie pakazany momant paražeńnia. «Najaŭnaść druhoj zdymki vyrazna śviedčyć pra toje, što ŭvieś siužet — nie pastanoŭka», — havorycca ŭ materyjale.
Žurnalisty pahavaryli z dvuma vajskoŭcami 118-j bryhady USU, jakija stali śviedkami taho, jak adzin vajskoviec zabivaje inšaha. Apieratar drona z pazyŭnym «Šustry», jaki źniaŭ videa, raskazaŭ, što ŭbačyŭ u tranšei čatyroch čałaviek: adzin ź ich byŭ miortvy, a troje inšych, na jaho dumku, nie, pakolki vakoł ich nie było kryvi i much. Kali da ich padlacieŭ FPV-dron, troje vajskoŭcaŭ padskočyli i pabiehli ad jaho, dron udaryŭ pa vajskoŭcu, jaki bieh u centry.
«Było vidać, što jon nie ŭstanie, što jamu pierabiła nohi i što evakuacyja da jaho tudy 100 adsotkaŭ nie dajedzie. Pobač prabiahaŭ jahony pabracim, i jon pakazaŭ jamu rukoj, maŭlaŭ, dabi mianie, kali łaska. I toj biez usialakaj spahady ŭziaŭ i imhnienna jaho prystuknuŭ. Ja byŭ trochi šakavany. Heta ž tvoj pabracim. A ty jaho biareš i tak zabivaješ. Mahli b pastaracca choć by ŭ kusty jaho adciahnuć», — raskazaŭ Šustry.
Taksama z žurnalistami pahavaryŭ ukrainski vajskoviec z pazyŭnym «Cichonia», jon kiravaŭ FPV-dronam, jaki nanios udar pa vajskoŭcu. Pa słovach Cichoni, dvoje vajskoŭcaŭ, jakija zastalisia žyvyja, uciakli i sprabavali schavacca ŭ kustach, ale chutka USU nanieśli pa ich udar inšym dronam. Šustry śćviardžaje, što nichto z troch rasijskich vajskoŭcaŭ, jakija trapili na videa, nie vyžyŭ.
Žurnalisty adznačyli, što nie zmahli niezaležna paćvierdzić infarmacyju, što dvoje astatnich členaŭ hetaj hrupy zahinuli.
Jak Ukraina vyzvalaje ź Biełarusi svaich. Tłumačeńnie ŭkrainskaha ekśpierta