«Taki dyjahnaz va ŭmovach Paliny — jak śmiarotny prysud». Svajaki palitźniavolenaj Šarendy-Panasiuk daviedalisia pra jaje chvarobu
Staŭ viadomy dyjahnaz Paliny Šarendy-Panasiuk, piša Radyjo Svaboda.
18.07.2024 / 14:52
Aktyvistka «Jeŭrapiejskaj Biełarusi», palitźniavolenaja Palina Šarenda-Panasiuk chvoraja na «chraničny pankreatyt siaredniaj ciažkaści» — vielmi niebiaśpiečnuju dla zdaroŭja chvarobu, lačeńnie ad jakoj uskładniajecca va ŭmovach źniavoleńnia. Pra dyjahnaz svajakam palitźniavolenaj stała viadoma z aficyjnaha adkazu administracyi papraŭčaj kałonii № 24, dzie jašče niadaŭna adbyvała pakarańnie aktyvistka ź Bieraścia.
Ciapier Palinu Šarendu-Panasiuk utrymlivajuć u homielskim SIZA, suprać jaje viadziecca novaja kryminalnaja sprava pavodle 411 artykułu Kryminalnaha kodeksu («złosnaje niepadparadkavańnie zakonnym patrabavańniam administracyi papraŭčaj ustanovy»).
Muž palitźniavolenaj Andrej Šarenda raskazaŭ Svabodzie, jak stała viadoma pra dyjahnaz jahonaj žonki i čamu jon ličyć jaje zachvorvańnie vielmi niebiaśpiečnym dla jaje žyćcia.
«Simptomy hetaha zachvorvańnia — boli ŭ straŭniku, słabaść i rezkaja strata vahi. Chvaroba vielmi niebiaśpiečnaja, bo razburaje padstraŭnikavuju załozu, adbyvajecca niezvarotnaja źmiena struktury jaje tkanak. Što jana chvoraja na pankreatyt, my nie viedali, ale dachodzili źviestki, što ŭ Paliny boli ŭ straŭniku i zdarajecca rezkaja strata vahi.
Adnojčy jana tak rezka schudnieła, što stała važyć usiaho 50 kiłahramaŭ. Adnak na ŭsie zapyty ŭ kałoniju nam aficyjna adkazvali, što Palina zdarovaja i nibyta atrymlivaje nieabchodnuju dapamohu ŭ poŭnaj miery.
Miž tym u Paliny byli prablemy ź piačonkaj, joj byli patrebnyja peŭnyja leki, jakija my joj słali, ale ich nie pieradavali. Tady ja źviarnuŭsia ŭ Kamitet likvidacyi dyskryminacyi ŭ dačynieńni žančyn (KŁDŽ) AAN. Sioleta ŭ studzieni maju skarhu zarehistravali, a ŭ sakaviku Kamitet AAN zapatrabavaŭ ad Biełarusi terminova pryniać časovyja miery dla abarony Paliny. Biełaruskija ŭłady musili adkazać na hetaje rašeńnie i voś tolki ź ichnaha adkazu nam stała viadoma, što ŭ Paliny chraničny pankreatyt, pryčym užo ŭ siaredniaj stadyi. Ale heta žachlivy dyjahnaz: faktyčna va ŭmovach, u jakich jana znachodzicca, heta jak śmiarotny prysud», — skazaŭ muž palitźniavolenaj.
Andrej Šarenda patłumačyŭ, čamu ličyć, što žyćciu jahonaj žonki pahražaje śmiarotnaja niebiaśpieka.
«Jak patłumačyli mnie śpiecyjalisty i jak pišuć u internecie, hetaja chvaroba pastupova razburaje straŭnik. Pry takim zachvorvańni abaviazkovaja admysłovaja dyjeta, admysłovaje lačeńnie, supraćpakazanyja nahruzki, abaviazkovyja dobryja ŭmovy i tryvały miedycynski nahlad. Usiaho hetaha Palina pazbaŭlenaja.
Bolš za toje, joj naŭmysna stvarajuć całkam procilehłyja ŭmovy: daŭhija etapy, drennaje charčavańnie, nie prapuskajuć joj patrebnyja leki, błakujuć charčovyja pieradačy z domu. I heta pry tym, što tam dobra viedajuć jaje dyjahnaz. Tamu ja i kažu, što faktyčna maju žonku pavolna zabivajuć. Jana musiła vyjści na volu jašče ŭ traŭni, a zamiest hetaha novaja sprava, rasśledavańnie i etap u Navinki. Heta žach, što jany robiać z majoj Palinaj!» — aburajecca muž palitźniavolenaj.
***
Palinu Šarendu-Panasiuk zatrymali ŭ studzieni 2021 hoda ŭ Bieraści, u jejnym domie. U červieni 2021 hoda sud Maskoŭskaha rajona Bieraścia pryhavaryŭ žančynu da 2 hadoŭ pazbaŭleńnia voli va ŭmovach ahulnaha režymu pavodle art. 364 («hvałt u dačynieńni supracoŭnika orhanaŭ unutranych spraŭ»), 369 («abraza pradstaŭnika ŭłady») i 368 («abraza prezidenta») KK.
U krasaviku 2022 hodu palitźniavolenuju pryhavaryli jašče da adnaho hodu źniavoleńnia pavodle č. 1 art. 411 KK, u kastryčniku 2023-ha — jašče da adnaho hodu pavodle taho ž artykułu. Palina Šarenda-Panasiuk musiła vyjści na volu ŭ kancy traŭnia 2024 hodu, ale suprać jaje była zaviedzienaja novaja kryminalnaja sprava.
Andrej Šarenda skazaŭ Svabodzie, što prainfarmuje Kamitet AAN u likvidacyi dyskryminacyi ŭ dačynieńni žančyn adnosna realnaj situacyi sa zdaroŭjem jahonaj žonki.
«Taksama źviartajusia praź miedyja z zaklikam da mižnarodnaj supolnaści dapamahčy vyratavać Palinu, bo jaje žyćcio jak nikoli ŭ niebiaśpiecy», — skazaŭ muž palitźniavolenaj Andrej Šarenda.
Palinie Šarendzie-Panasiuk pryznačyli čarhovuju psichołaha-psichijatryčnuju ekśpiertyzu
Palinu Šarendu-Panasiuk etapavali na psichijatryčnuju ekśpiertyzu ciaham dzieviaci dzion
Palitźniavolenaja Palina Šarenda-Panasiuk praviała 70 dzion u ŠIZA z pačatku hoda
«Psichałahičny stan vielmi składany». Źjavilisia naviny pra palitźniavolenuju Šarendu-Panasiuk
Na Palinu Šarendu-Panasiuk znoŭ zaviali kryminalnuju spravu za niepadparadkavańni administracyi