Дзмітрый Круты выказаў спачуванні загінулым падчас урагану
Падчас сённяшняй паездкі па раёнах Гомельскай вобласці, пацярпелых ад моцнага ўрагану 13-14 ліпеня, кіраўнік адміністрацыі Лукашэнкі Дзмітрый Круты сярод іншага выказаў спачуванні родным і блізкіх тых людзей, якія загінулі ў розных рэгіёнах Беларусі падчас урагану.
17.07.2024 / 22:50
«Так, першыя навіны прыйшлі сумныя — пра загінулых, сярод якіх і дзеці. Гэта вялікая страта, прыносім шчырыя спачуванні родным і блізкім. Хутчэйшага выздараўлення жадаем пацярпелым грамадзянам, многія з якіх атрымалі цяжкія траўмы, і нашы дактары робяць усё магчымае, каб людзі хутчэй аднавіліся», — заявіў Круты.
Нагадаем, што падчас моцнай буры ў гэтыя выхадныя ў Беларусі загінулі шэсць чалавек, у тым ліку двое дзяцей. Выказаныя Крутым у сераду спачуванні — фактычна першыя, якія прагучалі з вуснаў высокіх чыноўнікаў з Мінска. Дагэтуль спачуванні загінулым 15 ліпеня выказваў старшыня Гомельскага абласнога выканаўчага камітэта Іван Крупко.
Характэрна, што сёння Дзмітрый Круты таксама адразу паехаў не ў пацярпелыя раёны, а ў памятную зону «Рубеж» на мяжы Лельчыцкага і Жыткавіцкага раёнаў, дзе ўсклаў кветкі да мемарыяльнага знаку ў гонар воінаў-вызваліцеляў. Таксама для Крутога правялі экскурсію, падчас якой распавялі пра партызанскі рух, акупацыю і аперацыю «Баграціён».
Ацэньваючы, як падкрэсліваецца, па даручэнні Лукашэнкі ход выканання аднаўленчых работ, Дзмітрый Круты зрабіў акцэнт на тое, што «сёння панікі ў раёнах, пацярпелых пасля навальнічнага фронту, няма».
Мазырскія ўлады прызналі, што перабоі з водазабеспячэннем у горадзе застаюцца
Больш за 100 вайскоўцаў адправілі ў Мазыр і Лельчыцы для ліквідацыі наступстваў урагану
Мазырская вертыкальшчыца далажыла пра аднаўленне водазабеспячэння. У каментарах ёй пярэчаць