Litoviec raskazaŭ, jak patrapiŭ u połk Kalinoŭskaha
«Mnie chočacca abaraniać Litvu va Ukrainie, a nie čakać, pakul vorah pryjdzie da nas i pačnie rujnavać našy harady».
16.07.2024 / 16:44
Bajec pałka Kalinoŭskaha Albiertas z pazyŭnym «Dantyst». Skryn videa: CurrentTimeBelarus / YouTube
Svaju historyju žychar Litvy Albiertas z pazyŭnym «Dantyst» raskazaŭ jutub-kanału «Nastojaŝieje vriemia. Biełaruś».
Pa słovach litoŭca, u śniežni 2021 hoda jon pryjechaŭ va Ukrainu lačyć zuby.
«Za paŭtara-dva miesiacy, na praciahu jakich ja žyŭ va Ukrainie, ja paśpieŭ palubić hety narod, ludziej, jakija dobra da mianie stavilisia».
Kali pačałasia vajna, chłopiec vyrašyŭ zastacca i dapamahčy ŭkrainskamu narodu. Spačatku byŭ miedykam u składzie adnaho z bataljonaŭ terytaryjalnaj abarony Kijeva. U hety pieryjad, pa jaho słovach, adnoj z hałoŭnych składanaściaŭ była ŭkrainskaja mova.
«U pačatku vajny ja razumieŭ jaje dzieści na 50 pracentaŭ, davodziłasia vučyć. A zatym uźnikła składanaść, kali ja pryjšoŭ u biełaruski połk imia Kastusia Kalinoŭskaha. Tam daviałosia vučyć biełaruskuju movu, što było ŭžo lahčej».
U pałku Kalinoŭskaha Albiertas z červienia 2022 hoda:
«U kancy maja (2022-ha. — NN) ja ŭbačyŭ artykuł pra litoŭskaha sapiora Rymasa Armajcisa, jaki ŭ toj čas razam ź biełarusami słužyŭ u pałku. Ja pračytaŭ i zrazumieŭ, što tam słužać i litoŭcy. U hety čas jakraz na staroncy pałka ŭ fejsbuku źjaviłasia abviestka ab nabory rekrutaŭ-miedykaŭ. Ja śpisaŭsia praz čat-bot. Mianie zaprasili na intervju, i tak ja patrapiŭ u połk».
Pa słovach chłopca, da svajoj słužby ŭ pałku Kalinoŭskaha jon nie byŭ znajomy ź biełarusami:
«Ja pačaŭ paznavać biełarusaŭ tolki ŭ pałku. U pieršuju čarhu heta vielmi dobryja, ciarplivyja ludzi, vielmi adkaznyja i lubiać pracavać. Zaŭsiody radyja novym znajomstvam i adkrytyja dla stasunkaŭ».
Pa słovach Albiertasa, jon udziačny biełarusam za toje, što jany pryniali da siabie hramadzianina inšaj krainy.
«Mianie pryniali całkam jak svajho i da hetaj pary tak da mianie staviacca. Ja nikoli za ŭvieś čas nie adčuvaŭ u pałku niejkaj dyskryminacyi adnosna siabie ci da inšych litoŭcaŭ. (…) U nas adziny vorah, i ŭsie niejkija kanflikty paviny vyrašacca paśla našaj ahulnaj pieramohi».
Chłopiec adznačaje, što ŭzajemaadnosiny pamiž Litvoj i Biełaruśsiu pavinny vybudoŭvacca paśla pieramohi ŭ vajnie, kali Biełaruś stanie svabodnaj. Albiertas havoryć, što źjaŭlajecca prychilnikam Bałta-Čarnamorskaha sajuza.
«Heta samaja vysokaja meta. A jak minimum pavinny być adekvatnyja adnosiny, jak u lubych susiedziaŭ», — ličyć bajec.
U pałku Kalinoŭskaha Albiertas jak bajavy miedyk evakujuje paranienych z pola boju na śpiecyjalna abstalavanym aŭtamabili:
«Maja zadača — prosta vyjhrać čas, akazać čałavieku minimalnuju miedyčnuju dapamohu pa darozie. Zrabić tak, kab jon dabraŭsia da prafiesijanalnych daktaroŭ jak maha chutčej».
Pa słovach Albiertasa, za čas vajny ŭ jaho raźvićci jak vajennaha miedyka adbylisia istotnyja źmieny:
«Ukrainski vajenny miedyk uzoru 2022 hoda i ŭzoru 2024-ha — heta dastatkova roznyja miedyki. Ciapier davodzicca časam vykonvać abaviazki vadziciela, pracavać z kartami, trochi pracavać z radyjosuviaźziu, minimalna ŭ joj raźbiracca.
Davodzicca pravodzić miedycynskuju raźviedku, šukać šlachi evakuacyi, kali pryjazdžajem u novy rajon bajavych dziejańniaŭ. Davodzicca vyvučać roznyja typy min, jak pracujuć drony, bo za apošni hod miedyki stali vielmi žadanaj cellu dla voraha».
Mužčyna zaŭvažaje, što za čas vajny źjaviłasia adčuvańnie, što jon pastareŭ na 10 hadoŭ.
«Ciapier 30, a adčuvaju, što mnie prykładna 40. Pryčyny hetamu — stomlenaść, pastajanny stres. Ale ź inšaha boku, možna vynieści i stanoŭčyja źmieny: bolš surjozny padychod da žyćcia, da niejkich rečaŭ, zadač. Za dva z pałovaj hoda navučyŭsia canić drobiazi žyćcia».
«Mnie chočacca abaraniać Litvu va Ukrainie, a nie čakać, pakul vorah pryjdzie da nas i pačnie rujnavać našy harady», — havoryć Albiertas.
Kamandzir Pałka Kalinoŭskaha raskazaŭ, kolki ŭ im ciapier ludziej
BČB-ściah Pałka Kalinoŭskaha razharnuli va ŭkrainskaj Radzie
Połk Kalinoŭskaha ciapier vajuje na Charkaŭščynie
Połk Kalinoŭskaha abvierh paviedamleńnie Minabarony Biełarusi ab hibieli Jana Rudzika