Biurakratyja i vajna: čamu ŭ Mazyrskim rajonie amal dvoje sutak nie mahli adnavić elektrazabieśpiačeńnie
Amal dvoje sutak u 105-tysiačnym Mazyry i rajonie nie mahli adnavić elektrazabieśpiačeńnie paśla stychii, jakaja abrynułasia na rehijon 14 lipienia. Abiastočanymi akazalisia bolšaja častka paŭdniovaha zachadu Homielskaj vobłaści — heta nie tolki Mazyrščyna, ale i Naraŭlanski, Jelski, Lelčycki rajony.
16.07.2024 / 14:35
Fota: Minenierha
U pryvatnaści, u Mazyry z-za adsutnaści elektryčnaści bolš za sutki nie było vady — miascovym žycharam davodziłasia stajać u vializnych čerhach da aŭtacysternaŭ z vadoj. Nie pracujuć chaładzilniki i sapsavanyja pradukty, niemahčymaść zaradzić mabilnyja telefony — heta tolki častka prablem, jakija adčyli mazyranie. Čamu tak doŭha ŭ rajon nie mahli viarnuć elektrazabieśpiačeńnie, daviedaŭsia «Fłahštok».
Mazyrščyna akazałasia abiastočanaj z-za pavalenaj apory linii elektrapieradač 330 kiłavolt — z-za hetaha linija akazałasia adklučanaja. A padać elektryčnaść ź inšaj vobłaści akazałasia niemahčymym, rastłumačyŭ miascovy enierhietyk:
«Pa-dobramu, bujnyja padstancyi pamiž saboj zakalcavany, i Mazyr z Homielem byŭ zakalcavany praz terytoryju Ukrainy. U pačatku vajny liniju Homiel — Čarnihaŭ ukraincy adklučyli (paśla ŭvarvańnia vojskaŭ RF z terytoryi Homielskaj vobłaści — Red.). Tamu zakalcoŭki ŭ našaj vobłaści faktyčna niama», — raspavioŭ śpiecyjalist.
Schiema Biełenierha, na jakoj bačna zakalcoŭka linii Mazyr — ČAES — Čarnihaŭ — Homiel
U 2022 hodzie enierhietyki pačali śpiešna karektavać situacyju i rabić inšuju zakalcoŭku: budavać ŁEP z Mazyra i Pietrykava — na Salihorsk. Jaje da hetaha času nie ŭviali ŭ ekspłuatacyju:
«Vierahodnaja pryčyna — prablemy z ekałahičnaj ekśpiertyzaj. Atrymlivajecca, zakalcoŭki niama, linija abvaliłasia — i ŭsio, katastrofa».
Tamu žycharam rajona, pradpryjemstvam, miedustanovam pryjšłosia čakać, pakul adnoviać apiryšča ŁEP, ale enierhietyki svaimi siłami heta zrabić nie mohuć — patrebnaja śpiecyjalizavanaja arhanizacyja.
Jaje ŭ terminovym paradku vyklikali, adnak z-za biurakratyi paŭdnia nie dapuskali da pracy:
«Ni ŭ kaho nie chapiła śmiełaści časova zakryć vočy na šmatlikija instrukcyi, kab chutčej dać dopusk na pracy i jak maha chutčej prystupić da likvidacyi nastupstvaŭ avaryi».
Jak paviedamiła Minenierha, tolki ŭ 10 hadzin ranicy 16 lipienia elektraenierhija pačała pastupać na Mazyrskuju CEC.
Žychary Mazyra stali ŭ hihanckuju čarhu, kab padzaradzić telefony VIDEA
Jak vyhladaje čarha pa vadu ŭ Mazyry