Bajden źviarnuŭsia da nacyi ŭ suviazi z zamacham na Trampa
Džo Bajden vystupiŭ sa zvarotam da amierykanskaha naroda ŭ suviazi sa sprobaj zamachu na byłoha kiraŭnika Biełaha doma i kandydata ŭ prezidenty ZŠA ad respublikancaŭ Donalda Trampa. U zajavie, jakuju prezident zapisaŭ u Avalnym kabiniecie, jon zaklikaŭ amierykancaŭ admovicca ad hvałtu ŭ palitycy.
15.07.2024 / 07:17
Džo Bajden vystupiŭ sa zvarotam da amierykanskaha naroda ŭ suviazi sa sprobaj zamachu na Donalda Trampa. Fota: Pool / Getty Images
«Nam treba źnizić tempieraturu ŭ našaj palitycy, — zajaviŭ Bajden. — Nielha dazvolić, kab taki hvałt staŭ normaj. Palityčnaja rytoryka ŭ našaj krainie stała vielmi haračaj. Para jaje astudzić. Zrabić heta — adkaznaść usich nas».
Bajden skazaŭ, što palityka pavinna być «arenaj mirnych debataŭ» i hvałt nikoli nie moža być adkazam.
Prezident pažadaŭ Trampu chutčejšaha vyzdaraŭleńnia i nazvaŭ hierojem 50-hadovaha Kory Kampieratary, jaki byŭ zabity ŭ časie mitynhu Trampa, kali prykryvaŭ ad kul členaŭ svajoj siamji.
«Stralba ŭ Tramp stała sihnałam dla ŭsich nas zrabić krok nazad» — skazaŭ Bajden.
«U Amierycy my vyrašajem našyja roznahałośsi na vybarčych učastkach. Voś jak my heta robim. Z dapamohaj urnaŭ dla hałasavańnia. Nie z dapamohaj kul», — dadaŭ Bajden padčas pramovy, jakaja doŭžyłasia kala siami chvilin i tranślavałasia najbujniejšymi ahulnanacyjanalnymi telekanałami.
Hety vystup z Avalnaj kabinieta sa zvarotam pa pytańniach, jakija majuć vialikaje značeńnie dla amierykancaŭ, staŭ trecim dla Bajdena z taho času, jak jon pryjšoŭ da ŭłady ŭ 2021 hodzie, piša «Hołas Amieryki».
Raniej u niadzielu Bajden zahadaŭ pravieści pravierku fiederalnaj biaśpieki paśla taho, jak Donald Tramp byŭ paranieny, a jaho prychilnik zahinuŭ na palityčnym mitynhu ŭ Piensilvanii.
Strałok zdoleŭ abyści ahientaŭ Sakretnaj słužby, jakija adkazvajuć za achovu Trampa, padniaŭsia na dach budynka pobač ź miescam vystupu kandydata i zrabiŭ niekalki strełaŭ, pierš čym byŭ zabity supracoŭnikami pravaachoŭnych orhanaŭ.
Vystupajučy ŭ Biełym domie, Bajden skazaŭ, što daručyŭ Sakretnaj słužbie pierahledzieć usie miery biaśpieki, pryniatyja dla Respublikanskaha nacyjanalnaha kanvienta, jaki projdzie ŭ Miłuoki na hetym tydni, i dzie Tramp budzie aficyjna vyłučany kandydatam u prezidenty ad Respublikanskaj partyi.
Pieradvybarčy štab Bajdena prybraŭ usiu palityčnuju rekłamu, jakaja krytykuje Trampa.
Bajden raspavioŭ, što ŭ jaho była karotkaja, ale dobraja razmova z Trampam u subotu ŭviečary, i što jon «ščyra ŭdziačny, što [Tramp] adčuvaje siabie dobra i adnaŭlajecca».
«U Amierycy niama miesca dla takoha kštałtu hvałtu ci luboha hvałtu ŭvohule. Sproba zabojstva supiarečyć usiamu, za što my staim… jak nacyja — usiamu», — dadaŭ jon.
Što źmianiaje zamach na Trampa?
U mašynie chłopca, što stralaŭ u Trampa, znajšli vybuchoŭku
FBR nazvała imia taho, chto stralaŭ u Trampa
Zamach na Donalda Trampa: u jaho stralali ŭ čas vystupu ŭ Piensilvanii