Pamior mastak Valeryj Čajka. Jon afarmlaŭ minskaje mietro
Viadomaha mastaka-manumientalista nie stała na 74-m hodzie žyćcia.
15.07.2024 / 16:03
Valeryj Čajka z albomam, u jakim adlustravana stancyja mietro «Instytut kultury», nad afarmleńniem jakoj jon pracavaŭ. Fota: fejsbuk Biełaruskaha sajuza mastakoŭ
Pra śmierć paviedamiŭ Biełaruski sajuz mastakoŭ.
Valeryj Paŭłavič Čajka naradziŭsia 2 śniežnia 1950 hoda ŭ Tahanrohu Rastoŭskaj vobłaści, adnak tvorčaje žyćcio źviazaŭ ź Biełaruśsiu.
U 1976 hodzie jon skončyŭ Biełaruski teatralna-mastacki instytut, dzie vučyŭsia ŭ Haŭryły Vaščanki.
Pačaŭ svaju tvorčuju dziejnaść u 1976 hodzie. Pracavaŭ u manumientalna-dekaratyŭnym i afarmlenčym mastactvie, u mastackim prajektavańni.
Siarod tvoraŭ: mastackaje afarmleńnie interjeraŭ i eksterjeraŭ BDU, eksterjera abłasnoha radzilnaha doma (abodva 1978), prajekt interjera i lustry ŭ aeraporcie «Minsk-2» (1988—1989), razmaloŭka ŭ restaranie «Biełaruś» (1995), razmaloŭka i vitražy ŭ restaranie «Haściny dvor» (1996), abjomna-prastoravyja kampazicyi dla Pałaca Respubliki (2000) — usie ŭ Minsku. Adzin z aŭtaraŭ vitražoŭ z razmaloŭkaj i abjomna-prastoravaj kampazicyi dla chrama Sv. Ducha ŭ Biełastoku (Polšča, 2001, z S. Rabaščukom i B. Skramblevičam).
Stancyja mietro «Instytut kultury», nad afarmleńniem jakoj pracavaŭ Valeryj Čajka. Fota: Anłajnier
U 1984 hodzie ŭdzielničaŭ u raspracoŭcy prajekta interjera i stvareńni vitražoŭ dla stancyi mietro «Instytut kultury». Na abiedźviuch puciavych ścienach Čajkam vykanany pa 12 pajasoŭ, ź litoha žoŭtaha, aranžavaha i čyrvonaha škła, jakija nazyvajucca «Historyja raźvićcia kultury Biełarusi». Na ich adlustravanyja biełaruskija majstry za pracaj: hančary, kavali, dojlidy, tkačy i inšyja.
Vitražy na stancyi mietro «Instytut kultury», vykananyja Valeryjem Čajkam. Fota: Anłajnier
Tvory Čajki vyłučajucca vysokaj mastackaj kulturaj, šmatpłanavaściu źmiestu, harmaničnym uklučeńniem u architekturnaje asiarodździe.
Pryniaty ŭ Biełaruski sajuz mastakoŭ u 1984 hodzie. Z 1998 pa 2004 hady byŭ staršynioj siekcyi manumientalna-dekaratyŭnaha mastactva, u 2002—2004 hady vybiraŭsia prezidyuma Savieta i staršynioj praŭleńnia BSM.
Za kompleksnaje mastackaje rašeńnie interjeraŭ Pałaca Respubliki ŭdastojeny ŭ 2004 hodzie ŭ składzie aŭtarskaha kalektyva Dziaržaŭnaj premii Respubliki Biełaruś u halinie litaratury, mastactva i architektury. U 2011 hodzie staŭ łaŭreatam premii «Za duchoŭnaje adradžeńnie».
Pamior biełaruski kampazitar Leanid Hucin
Pamior biełaruski saksafanist Vital Jamuciejeŭ
Pamierła aktrysa Šeli Dziuval — zorka filma «Źziańnie»