«Nie dazvalajcie śpiecsłužbam Biełarusi vykarystoŭvać vas». MZS Polščy vypuściŭ rolik dla patencyjnych mihrantaŭ
Dyppradstaŭnictvy Polščy na Blizkim Uschodzie, a taksama ŭ krainach Azii i Afryki publikujuć videa ŭ ramkach novaj infarmacyjnaj kampanii.
12.07.2024 / 14:59
Skrynšot videa
MZS Polščy zapuściła infarmacyjnuju kampaniju, zaklikanuju adpudzić patencyjnych nielehalnych mihrantaŭ ad sprobaŭ pierasiekčy polskuju miažu z dapamohaj biełaruskich i rasijskich śpiecsłužbaŭ.
Dyppradstaŭnictvy Polščy ŭ krainach Blizkaha Uschodu, Afryki i Azii publikujuć videa, na jakim vyjaŭlenyja ŭzbrojenyja sałdaty, što achoŭvajuć polska-biełaruskuju miažu.
«Nie dazvalajcie biełaruskim i rasijskim słužbam vykarystoŭvać vas. Tyja, chto kaža, što polska-biełaruskuju miažu lohka pierasiekčy, padmanvajuć vas. Tyja, chto kaža, što za hrošy vas pieraviazuć u Jeŭropu praz polska-biełaruskuju miažu, rabujuć vas», — havorycca ŭ roliku.
Zakadravy hołas nahadvaje, što miažu achoŭvajuć niekalki tysiač sałdat, pamiežniki, a taksama płot, bałoty i puščy. Aŭtary videa zaklikajuć nie paddavacca na niadobrasumlennaje vykarystańnie pravadnikami, a taksama nie dazvalać manipulavać saboj śpiecsłužbam Biełarusi i Rasii.
«Polskaja miaža — heta nie adkrytaja brama dla nielehalnaj mihracyi», — zajaŭlajecca ŭ videa.
Roliki padrychtavanyja ŭ šaści moŭnych viersijach: ruskaj, arabskaj, francuzskaj, anhlijskaj, tureckaj i polskaj. Videa źbirajucca raspaŭsiudžvać pa roznych kanałach u krainach, adkul rodam bolšaść nielehalnych mihrantaŭ.
Absalutnaja bolšaść palakaŭ padtrymlivaje zakryćcio čyhunačnych znosin ź Biełaruśsiu
Ułady Polščy paprosiać u sajuźnikaŭ pa NATA padmacavańnie dla achovy miažy ź Biełaruśsiu
Polšča choča pryciahnuć pamiežnikaŭ ź Finlandyi, Hiermanii i Hrecyi dla abarony miažy ź Biełaruśsiu