Stała viadoma, u čym źvinavacili paleskaha błohiera Alaksandra Ihnaciuka, asudžanaha da 6 hadoŭ źniavoleńnia
Stolinski rajvykankam 10 lipienia apublikavaŭ na svaim sajcie pastanovu suda pa spravie błohiera Alaksandra Ihnaciuka, asudžanaha try miesiacy tamu da šaści hadoŭ źniavoleńnia. Sud prachodziŭ u zakrytym režymie, nahadvaje BAŽ.
11.07.2024 / 14:22
Praces pa kryminalnaj spravie błohiera i byłoha redaktara haziety «Viečiernij Stolin» Alaksandra Ihnaciuka ciahnuŭsia ŭ sudzie Stolinskaha rajona try tydni i adbyvaŭsia za začynienymi dźviaryma.
U vyniku 5 krasavika 2024 hoda sudździa Siarhiej Nasienia pryznaŭ Alaksandra Ihnaciuka vinavatym i pryhavaryŭ da 6 hadoŭ pazbaŭleńnia voli ŭ kałonii ŭzmocnienaha režymu. Błohier taksama byŭ aštrafavany na 200 bazavych vieličyniaŭ (8000 rubloŭ).
Jaho vinavacili pavodle troch artykułaŭ Kryminalnaha kodeksa: u arhanizacyi akcyj pratestaŭ u Stolinie i Minsku (častka 1 artykuła 342 KK), paklopie na Alaksandra Łukašenku (častka 2 artykuła 367 KK) i vymahalnictvie (častka 2 artykuła 208 KK).
Naprykancy maja Brescki abłasny sud adchiliŭ apielacyjnuju skarhu Alaksandra Ihnaciuka, i prysud nabyŭ moc.
Bolš čym praz try miesiacy paśla suda pieršaj instancyi na sajcie Stolinskaha rajvykankama źjaviłasia padrabiaznaja infarmacyja pra toj sudovy praces. Čym vyklikana takaja ŭvaha — nie zrazumieła, bo raniej miascovy rajvykankam nie vystaŭlaŭ padobnyja naviny na svoj infarmacyjny resurs.
U apublikavanaj sudovaj pastanovie paviedamlajecca, u čym vinavacili błohiera:
— Što ŭ žniŭni 2020 hoda «raźmiaściŭ u sacyjalnych sietkach publikacyi z zaklikam da hrupavych dziejańniaŭ, jakija hruba parušajuć hramadski paradak i spałučanyja ź jaŭnym niepadparadkavańniem patrabavańniam pradstaŭnikoŭ ułady».
— U žniŭni 2020 hoda raźmiaściŭ u Internecie infarmacyju ŭ dačynieńni Alaksandra Łukašenki, jakaja ŭtrymlivaje źviestki, što «nie adpaviadajuć rečaisnaści, hańbiać honar i hodnaść, (…) złučanyja z abvinavačańniem u ździajśnieńni ciažkaha i asabliva ciažkaha złačynstvaŭ».
— «Ciaham 2021 i 2022 hoda z karysnych metaŭ i žadańnia abahacicca za košt inšych hramadzian pad pahrozami raspaŭsiudu paklopnickich źviestak i ahałošvańnia inšych źviestak, jakija paciarpiełyja chacieli zachavać u tajamnicy (…), nieadnarazova vymahaŭ hrašovyja srodki i inšuju majomaść u pradprymalnikaŭ Stolinskaha rajona».
U chodzie sudovaha pracesu Alaksandr Ihnaciuk častkova pryznaŭ vinu pa artykułach za zakliki da masavych biesparadkaŭ i paklopie na Łukašenku, ale całkam adrynuŭ abvinavačańnie ŭ vymahalnictvie.
Stała viadoma, što akramia vyniasieńnia bujnoha štrafu sud abaviazaŭ Alaksandra Ihnaciuka spłacić majomasny ŭron u pamiery 1800 rubloŭ «na karyść paciarpiełaha Ch.».
Taksama sudździa Nasienia pastanaviŭ kanfiskavać u błohiera na karyść dziaržavy noŭtbuk jak «srodak ździajśnieńnia złačynstva» i «majomaść, nabytuju na srodki, što byli atrymanyja złačynnym šlacham». Pra jakuju majomaść viadziecca havorka ŭ pastanovie nie ŭdakładniajecca.