«Moj šlach daŭžynioju ŭ 24 hady ŭ UFC padyšoŭ da zaviaršeńnia». Lehiendarny biełaruski bajec Andrej Arłoŭski abviaściŭ pra zaviaršeńnie karjery
Pra heta 45-hadovy bajec źmiašanych adzinaborstvaŭ ź Biełarusi raspavioŭ u svaich sacsietkach.
06.07.2024 / 11:57
Andrej Arłoŭski. Fota: living.alot.com
Arłoŭski pryznaŭsia, što zaviaršaje svoj amal čverćviekavy šlach u bajach biez praviłaŭ, paviedamlaje biełaruskaja «Kamsamołka».
— Moj šlach daŭžynioju ŭ 24 hady ŭ UFC padyšoŭ da łahičnaha zaviaršeńnia, ale heta tolki kaniec adnaho raździeła ŭ majoj knizie, u majoj MMA-karjery, a tak jašče ŭsio napieradzie! — zrabiŭ zajavu spartoviec.
Jašče Arłoŭski padzialiŭsia z padpisantami navinami pra toje, što adpraŭlajecca ź siamjoj u adpačynak, paśla jakoha vierniecca z novaj infarmacyjaj.
Uradženiec Babrujska pačynaŭ svoj spartyŭny šlach u bajavym samba. Jaho trenieram byŭ zasłužany majstar sportu SSSR, zasłužany rabotnik fizkultury i sportu Biełarusi Anton Novik.
Debiut Arłoŭskaha ŭ prafiesijnych MMA adbyŭsia ŭ krasaviku 1999-ha, na žal, z parazy ad rasijanina Viačasłava Dacyka. A ŭžo ŭ UFC biełarus upieršyniu vystupiŭ u 2000-m, a praź piać hadoŭ babrujčanin zavajavaŭ tytuł čempijona UFC u ciažkaj vazie.
Paśla hetaha dvojčy Arłoŭskamu ŭdavałasia abaranić svoj čempijonski pojas. Siarod viadomych supiernikaŭ Arłoŭskaha: amierykancy Cim Silvia i Roj Nelsan, brazilec Antoniu Siłva, rasiejec Fiodar Jemialjanienka i inšyja.
Za svaju bajcoŭskuju karjeru Arłoŭski pravioŭ 60 bajoŭ, u jakich atrymaŭ 34 pieramohi, paciarpieŭ 24 parazy, i jašče dva bai paličyli, što nie adbylisia.