«Supracoŭnik biaskonca staviŭ usim admovy». Biełaruska raskazała, jak ź siamjoj atrymlivała turystyčnyja vizy ŭ ZŠA
Zusim niadaŭna biełaruska Alona razam ź siamjoj pierajechała ŭ Łos-Andželes. U svaim błohu «Pryvitańnie z Kalifornii» na YouTube dziaŭčyna raskazvaje pra dośvied atrymańnia turystyčnaj vizy ŭ Amieryku. Samaje cikavaje sabraŭ CityDog.io.
05.07.2024 / 19:13
Pa słovach Alony, pieršym u Amierycy pabyvaŭ jaje muž Alaksandr — jašče ŭ 2016 hodzie. Praz paŭhoda žyćcia tam mužčyna viarnuŭsia ŭ Biełaruś, padaŭ dakumienty na praciahvańnie vizy — i atrymaŭ admovu.
Kab paśla takoha vyniku atrymać zapavietny štamp, treba niešta źmianić u svaim žyćci, kaža dziaŭčyna: naprykład, ažanicca, zavieści dzicia, kupić nieruchomaść, adkryć biznes. Žyćcio išło, Alona i Alaksandr pažanilisia, u ich źjavilisia dzieci.
I voś hod tamu siamja źviarnułasia ŭ turahienctva, kab pasprabavać adkryć turystyčnuju vizu. Tam paru papiaredzili, što adrazu na ŭsiu siamju naŭrad ci jaje daduć, tamu lepš padavać dakumienty spačatku tolki na adnaho. Vyrašyli, što heta budzie muž Alony.
«U 2023 hodzie prosta zapisacca na vizu kaštavała 400 rub. na čałavieka», — adznačaje žančyna i dadaje, što ŭ hetuju sumu nie ŭvachodzić konsulski ŭznos.
Krychu paźniej było vyrašana padać dakumienty ŭsio ž taki i na Alonu, i na jaje muža. Zaklučyli damovu — i siamja pajechała ŭ padarožža pa Jeŭropie.
Jak prachodziła sumoŭje
U pasolstvie ŭ ankiecie, jakuju padavali hieroi artykuła, treba było pakazać, kudy jany źbirajucca jechać, na kolki i kali. Kansultantka, jakaja dapamahała z dakumientami, zapeŭniła, što padčas intervju nijakich dadatkovych pytańniaŭ zadavać nie buduć — tolki tyja, što ŭ ankiecie. A Alaksandr raskazvaŭ žoncy, što jość usiaho 10 standartnych pytańniaŭ, jakija pryniata zadavać padčas hutarki.
«U samim pasolstvie treba pavodzić siabie niazmušana: śmiajacca, uśmichacca, rabić vyhlad, jak byccam tabie ŭsio adno — zajšoŭ prosta kavu ŭziać, ułasna kažučy. Pažadana apranucca ŭ śvietłuju vopratku, nie nadziavać niejkich kidkich darahich upryhožvańniaŭ: usio supierminimalistyčna, prosta, pryhoža. I nijakaha supieriarkaha makijažu», — raskazvaje Alona.
Taksama dziaŭčyna kaža, što, kali idziacie ŭ ambasadu, rečy treba pakinuć doma: navat telefon u vas zabiaruć — patrebnyja tolki dakumienty. Dziaciej para taksama z saboj na intervju nie brała.
Užo ŭ samim pasolstvie sužoncaŭ zapytali, na jakoj movie jany chočuć vieści hutarku — na ruskaj ci anhlijskaj. Spynilisia na druhim varyjancie: «I dobra, što tak vyrašyli, tamu što supracoŭnik, jaki havaryŭ na ruskaj movie, biaskonca staviŭ usim admovy».
Pierš za ŭsio Alonu i Alaksandra spytali, ci žanatyja jany, na što para adkazała: «Tak, i ŭ nas jość dzieci, my ź imi ŭžo šmat padarožničali, chočam bieź ich palacieć». Dalej pacikavilisia, kolki jany zarablajuć (paćviardžeńnia nie prasili), ci jość u ich žyllo ŭ Biełarusi i jakoje («u nas jość kvatera, ale płanujem kuplać dom»), kim jany pracujuć. I plus u Alaksandra jašče ŭdakładnili pra papiaredniuju pajezdku ŭ ZŠA.
«My razmaŭlali chvilin ź piać — i naša viza była ŭchvalenaja», — kaža biełaruska.
Jak atrymali vizy na dziaciej i jaki dalejšy płan
Praź niekatory čas Alona i Alaksandr atrymali svaje vizy, było vyrašana zapisać na sumoŭje i dziaciej. Ale, pa słovach dziaŭčyny, ich brać z saboj u ambasadu było nie abaviazkova — dastatkova tolki baćkoŭ.
Padača na vizu vypała na 24 lutaha, a pierad hetym — 19 studzienia — Alona z mužam palacieli ŭ Amieryku. Užo ŭ pasolstvie padčas hutarki jany raskazali, što paśla pajezdki jany zachacieli adpravicca ŭ padarožža i ź dziećmi: padzialilisia płanam pajezdki, nazvali miescy, praź jakija chočuć prajechać. Z dakumientaŭ paprasili dać tolki pašparty ŭsich členaŭ siamji. U vyniku vizy dzieciam taksama ŭchvalili.
Ciapier usia siamja znachodzicca ŭ Amierycy pa turystyčnaj vizie (lehalna jany mohuć znachodzicca tam da listapada) i paralelna rychtuje dakumienty na vizu talentaŭ.
«Ale padavacca adrazu na jaje nielha: treba vyčakać niejki čas, u našym vypadku heta try miesiacy», — adznačaje Alona.
Kudy biełarusam nie patrebna viza? Tut śpis krain, kudy možna palacieć choť prosta ciapier