Nie tolki mašyny z abjomam ruchavika, bolšym za 1,9 litra. Jakija jašče aŭto nielha budzie pryhaniać u Biełaruś
U apublikavanym dniami rehłamiencie Jeŭrasajuza sotni mytnych kodaŭ tavaraŭ, jakija nielha pastaŭlać u Biełaruś. Siarod ich ź dziasiatak tyčycca transpartnych srodkaŭ. Pahladzieli, jakija aŭto traplajuć pad zabaronu na ekspart u Biełaruś.
06.07.2024 / 16:47
Ilustracyjny zdymak. Fota: «Naša Niva»
Sajuz adzin, a patrabavańni roznyja
Prynamsi pakul u Polščy, Litvy i Łatvii dziejničajuć roznyja patrabavańni pa afarmleńni ekspartu mašyn i inšych transpartnych srodkaŭ u Biełaruś.
Polšča jašče z 23 krasavika nie vypuskaje ŭ Biełaruś lubyja aŭto z abjomam, bolšym za 1,9 litra, niezaležna ad cany, hoda vypusku i inšych paramietraŭ.
Litva z 4 červienia spačatku poŭnaściu spyniła propusk aŭto ŭ Biełaruś uzrostam da 5 hadoŭ. Ale ŭžo bližej da siaredziny miesiaca dała zialonaje śviatło mašynam z abjomam da 1,9 litra va ŭzroście da 5 hadoŭ. Taksama biez abmiežavańniaŭ jechali mašyny, starejšyja za 5 hadoŭ, niezaležna ad abjomu i typu ruchavika.
Pa Łatvii infarmacyi vobmal. Adnyja śćviardžajuć, što tam takija ž patrabavańni, jak i ŭ Litvie. Inšyja kažuć, što praz hetuju krainu dahetul vyjazdžajuć padsankcyjnyja ŭ Rasii aŭto.
Ilustracyjny zdymak. Fota: «Naša Niva»
Što dakładna nielha
Vyhladaje, što novy pakiet sankcyj i padrabiazny rehłamient ES, pryniaty 29 červienia, pavinien prynieści jasnaść. Ale heta nie dakładna.
Adziny rehłamient Jeŭrasajuza padrabiazna apisvaje, jakija aŭtamabili zabaronienyja dla ekspartu ŭ Biełaruś. U im źjaŭlajecca taki novy važny paramietr, jak vyšynia darožnaha praśvietu (klirens).
Pad zabaronu traplajuć:
— lubyja aŭto, daražejšyja za 50 tysiač jeŭra;
— aŭtamabili z abjomam ruchavika, bolšym za 1,9 litra, z klirensam, vyšejšym za 165 milimietraŭ (za vyklučeńniem aŭtamabilaŭ chutkaj dapamohi);
— elektramabili i hibrydy z klirensam, vyšejšym za 165 milimietraŭ.
Jakija transpartnyja srodki zastalisia «prachadnymi»
Dla ŭvozu prachodziać pa rehłamiencie:
— lubyja aŭtamabili koštam da 50 tysiač jeŭra z abjomam ruchavika da 1,9 litra niezaležna ad hodu vypusku i vyšyni darožnaha praśvietu (klirensu);
— aŭtamabili z abjomam ruchavika ad 1,9 litra i z vyšynioj darožnaha praśvietu (klirensu) da 165 mm;
— matacykły koštam da 5 tysiač jeŭra.
Što atrymlivajecca ŭ vyniku?
Z paramietraŭ rehłamientu vynikaje, što ŭ Biełaruś bolš niemahčyma budzie pryhnać bolšaść parkietnikaŭ, usiedarožnikaŭ i mikraaŭtobusaŭ. Usio praz toje, što ŭsie jany majuć bolš vysoki darožny praśviet, čym dazvalaje rehłamient.
Vyklučeńnie tolki dla tych madyfikacyj, dzie jość ruchavik z abjomam da 1,9 litra, a takich nie tak užo i šmat.
Ilustracyjny zdymak. Fota: «Naša Niva»
Siarod papularnych madelaŭ ź Jeŭropy heta: VW Tiguan, Nissan Qashqai, Renault Kadjar, Audi Q3. Sa Štataŭ — Ford EDGE, Escape, GMC Terrain, Buick Encore.
Usie inšyja ŭsiedarožniki — takija, jak BMW X3, Ch5, Audi Q5, Q7, VW Touareg — pryvieźci ŭ Biełaruś niemahčyma. Prynamsi lehalnym čynam biez schiematozaŭ z dastaŭkaj praz Turcyju.
Zabyvajemsia nie tolki na džypy, ale i na mikraaŭtobusy
Aproč usiedarožnikaŭ, pad zabaronu na ekspart trapiŭ amal uvieś kamiercyjny transpart. Siarod hruzavych busaŭ, navat pad katehoryju «V», amal adsutničajuć varyjanty z abjomam matora, mienšym za 1,9 litra. Tamu praz patrabavańni pa kliransie pad sankcyjami apynulisia amal usie mikraaŭtobusy.
Usiedarožnik BMW i mikraaŭtobus VW. Ab pryhonie padobnych aŭto ź Jeŭropy možna zabycca. Fota: «Naša Niva»
Ź inšaha boku, rehłamient dazvalaje ekspart u Biełaruś lehkavikoŭ z abjomam ruchavika, bolšym za 1,9 litra, klirensam da 16,5 sm i koštam da 50 tysiač jeŭra ŭ niezaležnaści ad hoda vypusku. Ale sankcyi zabaraniajuć pastaŭki takich aŭto ŭ Rasiju, tamu tut jość niuans.
Choć z rehłamientu vynikaje, što situacyja nie takaja ŭžo i drennaja i navat krychu lepšaja za rasijskuju, na praktycy nijakich pazityŭnych źmien u dačynieńni da mašyn ź vialikim abjomam ruchavika moža nie adbycca.
Farmalna ni Polšča, ni Litva nie zabaraniali ekspart u Biełaruś mašyn z ruchavikom, bolšym za 1,9 litra. Prosta dla afarmleńnia takich mašyn jany pačali patrabavać pakazać daviedku ad aŭtavytvorcy, kab być upeŭnienymi, što takoje aŭto nie nakiroŭvajecca ŭ Rasiju. Atrymać taki dakumient faktyčna niemahčyma.
Tamu nielha vyklučać, što aŭtamabili z abjomam ruchavika, bolšym za 1,9 litra, hibrydy i elektramabili da 5 hadoŭ tak i nie buduć vypuskać u Biełaruś, pakolki pakupniki nie zmohuć pakazać jeŭrapiejskaj mytni daviedku ad aŭtavytvorcaŭ.
Padsankcyjnyja aŭto i hruzaviki ŭsio adno traplajuć u Biełaruś i Rasiju, ale jość niatanny niuans
Pierahonščyki luksavych aŭto znajšli novy maršrut, kab dastaŭlać sankcyjonku ŭ Rasiju ŭ abychod Biełarusi