«Ukraina Biełarusi nie pahražaje, my vymušanyja abaraniacca». Ukrainskaja pamiežnaja słužba adkazała biełaruskaj
Pres-sakratar Dziaržaŭnaj pamiežnaj słužby Ukrainy Andrej Dziemčanka u kamientary «Radyjo Svaboda» adkazaŭ na abvinavačvańni z boku biełaruskich pamiežnikaŭ na adras Ukrainy.
28.06.2024 / 18:31
Fota ilustracyjnaje
U Dziaržaŭnym pamiežnym kamitecie Biełarusi siońnia zajavili, što ŭ Žytomirskaj vobłaści ŭ zonie adkaznaści ŭkrainskich pamiežnikaŭ padraździeły Rasijskaha dobraachvotnickaha korpusa nibyta pravodziać raźviedku, u tym liku «z vychadam da dziaržaŭnaj miažy Respubliki Biełaruś».
U Ministerstvie abarony Biełarusi, u svaju čarhu, zajavili, što na bajavoje dziažurstva na miažy dla abarony nibyta ad ukrainskaj pahrozy vyvieli sistemu «Pałaniez» z poŭnym bojekamplektam.
Pres-sakratar Dziaržaŭnaj pamiežnaj słužby Ukrainy Andrej Dziemčanka na prośbu «Radyjo Svaboda» prakamientavaŭ zajavy z boku biełaruskich pamiežnikaŭ na adras Ukrainy:
«Apošnim časam Biełaruś aktyvizavała piarečańni suprać uzmacnieńnia Ukrainy ŭ Žytomirskaj vobłaści. Pryjemna, zrazumieła, što jany nie zabyvajuć pra našu dziaržavu, ale chaj nie pierajmajucca.
Ukraina im nie pahražaje, naadvarot, my vymušanyja abaraniacca, u tym liku i na biełaruskim kirunku, bo Biełaruś praciahvaje padtrymlivać terarystaŭ i ŭ svoj čas adkryła miažu dla rasijskich akupantaŭ.
Nu i, viadoma, jak zaŭsiody, u styli Biełarusi kazać to pra zbroju i srodki teroru z Ukrainy, to pra pravakacyi, na jakija buduć žorstka reahavać, i h. d. Niahledziačy na ŭsio heta, pakul Biełaruś zastajecca ŭ arbicie ŭpłyvu krainy-terarysta, Ukraina budzie naroščvać svaju abaronazdolnaść, kab dać adpor usim, chto idzie da nas ź Biełarusi z vajnoj».
Varta adznačyć, što manitorynhavaja hrupa «Biełaruski Hajun», praanalizavaŭšy najaŭnuju situacyju, taksama robić adnaznačnuju vysnovu, što
«Dziaržpahrankamitet sumiesna z MA RB pravodzić skaardynavanuju IPSA».
«Biełaruski Hajun» źviartaje ŭvahu, što akurat ciapier adbyvajecca padrychtoŭka da samaha maštabnaha vajskovaha paradu ŭ historyi suvierennaj Biełarusi na 3 lipienia, i paralelna z hetym biełaruskija siłaviki, vidać, vyrašyli pravieści «maleńkuju pieramožnuju vajnu» ŭ infarmacyjnaj prastory. Jakaja ŭpisvajecca i ŭ bolš hłabalny paradak dnia:
«U situacyi, kali rasijski nastup u Charkaŭskaj vobłaści zachłynuŭsia, a Maskva «choć zaŭtra» hatovaja sieści za stoł pieramovaŭ, možna paniervavać ukrainskuju infarmacyjnuju prastoru «pahrozaj ź biełaruskaha kirunku».
Padsumoŭvajučy, manitorynhavaja hrupa zaklikaje «nie vieścisia na čarhovaje IPSA», padkreślivajučy:
«Na siońnia pieradumoŭ paŭtareńnia ŭvarvańnia z terytoryi Biełarusi (u tym liku pry ŭdziele US RB) niama».