Čamu zachodnija žančyny admaŭlajucca ad mužčyn
Jašče ŭ pačatku 2024-ha amierykanskaja kamiedyjantka Choŭp Vudard raskazała, što žadaje pražyć hod biez ramantyčnych adnosinaŭ: nijakaha seksu, pacałunkaŭ, spatkańniaŭ i navat pierapiski z chłopcami. Z taho času ideja amierykanki pierarasła ŭ vialiki trend.
01.07.2024 / 11:29
Novy ruch nazyvajuć słovam boysober — spałučeńnie słovaŭ boy (chłopiec) i sober (ćviarozy). 27-hadovaja Vudard raskazvaje, što choć u jaje žyćci i było šmat seksu, i va ŭsich vypadkach jana była na jaho zhodnaja, jana časta davała hetuju zhodu, tamu što «nikoli nasamreč nie mieła dazvołu damovicca». Pavodle słovaŭ amierykanki, toje, što jana na hod pastaviła paŭzu ŭ asabistym žyćci, upieršyniu dało joj adčuvańnie ŭłasnaści nad svaim ciełam.
Ale ž boysober — nie toje ž samaje, što celibat. Apošniaje — nie zaŭždy dobraachvotnaje rašeńnie, da taho ž, celibat časta źviazany z relihijnymi pryčynami. Boysober — heta chutčej pytańnie asabistaha vybaru.
Voś jak heta tłumačyć Vudard: «Ja tak mocna nienavidžu celibat, bo mnie nie chočacca prymać ideju, byccam niechta lepšy ci bolš dastojny kachańnia ci pavahi, kali ŭ jaho niama seksu. Boysober — heta pra toje, kab uziać čas na paŭzu, na toje, kab refleksavać i nanava rasstaŭlać pryjarytety, a nie pra toje, kab atrymlivać ad mužčyn uchvaleńnie».
Vudard — nie pieršaja, chto hatovy žyć biez mužčyn. Niekalki hadoŭ tamu brytanskaja aktrysa Ema Uotsan nazvała svoj ramantyčny status vyrazam self-partnered, to-bok «u partniorstvie z samoj saboj». Uotsan kazała, što jana nikoli nie vieryła ŭ mahčymaść być ščaślivaj biez partniora, ale, kali joj było 29, jana sapraŭdy adčuła siabie ščaślivaj u takim statusie.
Razam ź niekatorymi inšymi žančynami Vudard raspracavała praviły taho, što značyć być boysober.
Pierš za ŭsio, treba vydalić sa smartfona ŭsie dejtynhavyja dadatki — Tinder, Bumble, Pure i ŭsie mahčymyja inšyja prahramy takoha kštałtu. Hetyja dadatki časam dapamahajuć znajści kahości cikavaha, ale ŭ toj ža čas možna trapić ad ich u zaležnaść i zanadta zachapicca stvareńniem svajho idealnaha vobrazu.
Jašče adno praviła — admovicca ad spatkańnia ź inšymi ludźmi, zamiest hetaha možna schadzić na spatkańnie z saboj, naprykład, u kino ci spa-centr. I, jak by heta ni było spakušalna, nie treba pisać byłomu chłopcu, bo vy nie viedajecie, nakolki jon nasamreč varty vašaj uvahi ciapier.
Vudard asobna raić ustrymlivacca ad adnosinaŭ ź niezrazumiełymi miežami — taho, što pa-anhlijsku nazyvajuć situationship. Takija adnosiny stvarajuć umovy dla nieparazumieńnia, błytaniny i, narešcie, bolu dla ich udzielnikaŭ.
Boysober — heta nie tolki pra admovu ad seksu, heta i pra zabaronu na pacałunki i navat abdymki. Heta nie admienić žadańnie fizičnaha kantaktu, ale stvaralnicy trendu rajać pačakać z takoj blizkaściu, pakul vy nie sustreniecie kahości sapraŭdy vartaha.
Kałumnist brytanskaha Independent Olivier Kins ličyć, što novy ruch — pryčyna zadumacca dla mužčyn:
«Majo žyćcio zavalena ludźmi, jakija sustrakalisia ci ciapier sustrakajucca z mužčynami, jakija nie razumiejuć emocyj ci emacyjna niedastupnyja, z tymi, u kaho niebiaśpiečna mała pryrodnaha spačuvańnia, z zanadta hanarlivymi ci tymi, chto baicca navat paśmiajacca ź siabie, abo chto niazdolny zadavolić seksualnaje žadańnie tak, kab heta nie było prosta simulacyjaj porna.
Kali b ja moh prosta ciapier prakryčać niešta adno pakaleńniu mužčyn za 20, ja prapanavaŭ by im parazvažać nad tym, što, na dumku žančyn, jany musiać masava ad vas admovicca, kab vieści stabilnaje i ščaślivaje žyćcio. Ustrymlivajciesia ad žadańnia dałučycca da niehatyŭnaj reakcyi na trend na žanočanienaviśnickich resursach i doŭha dy ŭvažliva pryhledźciesia da siabie ŭ lusterku».