Rasijski servis nie raźmiaściŭ biełaruskamoŭnuju pieśniu — paličyŭ, što trek prapahanduje nacyjanalizm ci hvałt
Pra niepryjemny vypadak u svaich sacyjalnych sietkach raspaviała biełaruskaja śpiavačka PAULINN, jakaja ciapier žyvie ŭ Polščy.
26.06.2024 / 18:06
Śpiavačka PAULINN. Fota: jaje staronka ŭ fejsbuku
Niekatory čas tamu PAULINN zaŭvažyła, što pieśni jaje inšaha prajekta Plater čamuści źnikli sa stryminhavych placovak. Artystka vyrašyła pasprabavać znoŭ ich zahruzić u internet.
— Spačatku ja šukała mižnarodnyja servisy dystrybucyi, ale paśla niekalkich hadzin pošukaŭ biaspłatnaha servisu z padtrymkaj kantentu na biełaruskaj movie, kinuła pošuki i pasprabavała znoŭ praz stary dobry freshtunes, — napisała PAULINN. — Viedaju, viedaju, sajt rasijski… Ale ž praź jaho ja ŭžo nie adnojčy zahružała biełaruskamoŭny kantent i ŭsio było dobra. Hetym razam atrymałasia nie tak…
Ruskamoŭnuju pieśniu «Ałhoritmy» servis chutka apublikavaŭ biez dadatkovych pytańniaŭ. A voś ź biełaruskamoŭnaj pieśniaj «Mama» adrazu ŭźnikli prablemy. Siervis freshtunes zapatrabavaŭ dokazy aŭtarstva, a taksama niekatoryja dakumienty kštałtu pašpartu śpiavački. PAULINN dasłała ŭsio, što było patrebna, ale nie atrymała nijakaha adkazu. A siońnia pabačyła ŭ asabistym kabiniecie, što trek vydaleny, bo «zabaroniena vykarystoŭvać kantent, źviazany z nacyjanalizmam, ekstremizmam, prapahandaj zbroi, hvałtu». Śpiavačka miarkuje, što prablemy ŭźnikli mienavita praz movu pieśni, bo ni pra jaki hvałt ci zbroju havorki tam nie idzie.
Taki adkaz ad servisu atrymała śpiavačka. Fota: jaje staronka ŭ fejsbuku
— U suviazi z hetym u mianie pytańnie da biełaruskamoŭnych tvorcaŭ: praź jakich dystrybjutaraŭ vy vykładajecie svaje pieśni na stryminhi? Ci jość tam opcyja «biełaruskaja mova» dla kantentu? — spytała PAULINN.
Marharyta Laŭčuk znajšła, jak vyrašyć prablemy z prysudam u Biełarusi
Na Słavianskim bazary vystupić adna artystka z Ukrainy. Čamu ŭ Ani Łorak takaja pazicyja?
Bank Anhlii adkładzie panižeńnie klučavoj staŭki z-za kancertaŭ Tejłar Śvift