Stała viadoma, chto budzie vykonvać abaviazki namieśnika Cichanoŭskaj paśla adstaŭki Kavaleŭskaha
Rašeńni ab pryznačeńni pryniała Śviatłana Cichanoŭskaja.
26.06.2024 / 15:25
Fota: OSC
Uładzimir Astapienka pryznačany v.a. pradstaŭnika pa zamiežnych spravach Kabinieta, paśla taho jak Valer Kavaleŭski skłaŭ paŭnamoctvy
Rašeńnie ab pryznačeńni Uładzimira Astapienki pryniała kiraŭnica Abjadnanaha pierachodnaha kabinieta Śviatłana Cichanoŭskaja. Da hetaha času Astapienka źjaŭlaŭsia namieśnikam pradstaŭnika pa zamiežnych spravach Kabinieta, paviedamlaje telehram-kanał APK.
Papiaredni kiraŭnik Pradstaŭnictva pa zamiežnych spravach Valer Kavaleŭski padčas pasiadžeńnia Abjadnanaha pierachodnaha kabinieta skłaŭ paŭnamoctvy.
Kiraŭnica Kabinieta Śviatłana Cichanoŭskaja prakamientavała źmieny ŭ kiraŭnictvie pradstaŭnictva:
«Udziačnaja Valeru Kavaleŭskamu za try z pałovaj hady supolnaj pracy, spačatku ŭ Ofisie, a potym i ŭ Kabiniecie. Siarod inšaha, Valeryj Hieorhijevič uzdymaŭ pytańnie Biełarusi na mižnarodnych forumach i ŭ arhanizacyjach, arhanizavaŭ pracu Misii demakratyčnaj Biełarusi ŭ Brusieli, dapamahaŭ vyrašać pytańni biełarusaŭ za miažoj.
Siońnia na naradzie Kabinieta Valer prainfarmavaŭ pra svajo rašeńnie pakinuć pasadu pradstaŭnika pa zamiežnych spravach u Abjadnanym pierachodnym kabiniecie.
Časova vykonvać abaviazki pradstaŭnika pa zamiežnych spravach budzie ambasadar Uładzimir Astapienka, kiraŭnik Misii demakratyčnaj Biełarusi ŭ Brusieli, jaki taksama byŭ namieśnikam Valera Kavaleŭskaha», — havorycca ŭ paviedamleńni APK.
Uładzimir Astapienka — dypłamat, kandydat jurydyčnych navuk. U 2020 hodzie padaŭ zajavu ab vyzvaleńni ad pasady Nadzvyčajnaha i Paŭnamocnaha pasła Respubliki Biełaruś u Arhiencinie, zajaviŭ pra šmatlikija parušeńni asnoŭnych pravoŭ i svabod hramadzian Biełarusi, zamacavanych u Kanstytucyi krainy i jaje mižnarodna-pravavych abaviazacielstvach, vidavočnyja i hrubyja falsifikacyi vynikaŭ prezidenckich vybaraŭ.
Namieśnik Cichanoŭskaj Valer Kavaleŭski pakinuŭ pasadu
Kavaleŭski piarečyć Łatušku i raskazvaje, što zapavolvaje praces z pašpartam Novaj Biełarusi