Адзін з галоўных кандыдатаў на пасаду кіраўніка Інтэрпала падазраецца ў выкраданні людзей
Намеснік камісара паліцыі Замбіі Мубіта Нава з'яўляецца адным з галоўных кандыдатаў на пасаду прэзідэнта Інтэрпала і быў падтрыманы ўсімі краінамі Афрыкі. Але напярэдадні асноўнага галасавання супраць чыноўніка ўсплылі вельмі сур'ёзныя абвінавачанні.
24.06.2024 / 18:20
Мубіта Нава, намеснік камісара паліцыі Замбіі. Фота: старонка Linkedin Мубіты Навы
Намесніка камісара паліцыі Замбіі Мубіту Наву, аднаго з чатырох асноўных кандыдатаў на пасаду прэзідэнта Інтэрпала, падазраюць у датычнасці да выкрадання, незаконнага затрымання, нападу і спробы вымагальніцтва ў дачыненні да двух індыйскіх бізнэсменаў у 2022 годзе.
Адпаведную скаргу афіцыйна накіравалі ў Інтэрпал адвакаты пацярпелых мужчын, паведамляе выданне The Guardian.
Паводле скаргі, Мабіта Нава, калі быў намеснікам дырэктара замбійскага Дэпартамента крымінальных расследаванняў, непасрэдна ўдзельнічаў у арганізацыі засады на братоў Вінада і Удзіта Садху, кіраўнікоў індыйскай фармацэўтычнай кампаніі Sun Pharmaceuticals, якая перад гэтым перамагла ўрад Замбіі ў судзе за парушэнне ўмоў крэдытавання з боку замбійскага Банка развіцця.
«Браты Садху тады дамагліся ад Замбіі вялікай грашовай кампенсацыі, але пасля суда на братоў Садху напалі людзі, якія выдавалі сябе за паліцыянтаў, і пагрузілі іх у фургон без апазнавальных знакаў, пасля чаго адвезлі ў нейкі прыватны дом, дзе падвергнулі пагрозам і прымусу, пакуль аднаму з палонных не ўдалося скарыстацца схаваным тэлефонам і выклікаць дапамогу.
Далей індыйскіх бізнэсменаў адвезлі ў аддзяленне паліцыі, дзе іх працягнулі падвяргаць пагрозам і прымусу ўжо непасрэдна з боку Мабіты Навы, каб браты Садху адмовіліся ад сваіх судовых прэтэнзій да Замбіі», — піша The Guardian са спасылкай на афіцыйную скаргу адвакатаў братоў Садху.
З тых часоў, як сцвярджаюць пацярпелыя, ніводны нападнік не быў прыцягнуты да адказнасці, а прысуджаная грашовая кампенсацыя ад Замбіі так і не была выплачаная кампаніі братоў Садху.
Цяпер бізнэсмены спадзяюцца, што Інтэрпал падрабязна вывучыць пытанне і не дапусціць Мабіту Наву да прэзідэнцкага крэсла арганізацыі.
Паліцыя Замбіі, у сваю чаргу, адпрэчыла ўсе абвінавачванні ў бок Мабіты Навы, сцвярджаючы, што яго рэпутацыю «спецыяльна хочуць сапсаваць да будучых выбараў кіраўніка Інтэрпала». А саміх братоў Садху ведамства назвала «ашуканцамі, якія сваімі скаргамі спрабуюць адцягнуць увагу ад сваіх фінансавых злачынстваў у Замбіі».
Адзначым, што па індэксе ўзроўню ўспрымання карупцыі за 2023 год Замбія паказала адзін з найгоршых вынікаў у свеце і мела столькі ж балаў, колькі і Беларусь. Бядотнае становішча ў Замбіі таксама займае сітуацыя з правамі чалавека і палітычнымі рэпрэсіямі ў дачыненні да няўрадавых структур.
Беларусь выдала Літве двух абвінавачаных, якіх шукаў Інтэрпал
Інтэрпал адмовіўся выдаць ордар на арышт польскага суддзі Шміта