ЕС увёў санкцыі супраць Беларускага саюза моладзі, Паліны Гагарынай, Шамана і не толькі
Рада ЕС зацвердзіла 14-ы пакет санкцый супраць Расіі. У ім — пашыраныя персанальныя абмежаванні, пад якія трапілі 116 фізічных асоб і арганізацый.
24.06.2024 / 13:33
У 14-ыс пакет ЕС уключыў Беларускі саюз моладзі за садзейнічанне ў дэпартацыі ўкраінскіх дзяцей з незаконна акупаваных тэрыторый, а таксама яго лідара Аляксандра Лук'янава персанальна.
Таксама ў санкцыйны спіс уключылі спявачку Паліну Гагарыну, спевака Шамана (Яраслаў Дронаў), акцёра Івана Ахлабысціна.
Акрамя таго, у спіс ўвайшоў міжнародны дзіцячы цэнтр «Артэк», «Уральскія авіялініі», фонд імя Кадырава, дзяржсакратар Саюзнай дзяржавы Дзмітрый Мезенцаў, галоўнакамандуючы ВМФ Расіі адмірал Аляксандр Майсееў.
Таксама ўведзеныя абмежаванні ў дачыненні да так званага «ценявога» расійскага флоту, пад іх трапілі 27 судоў.
ЕС у новым пакеце санкцый забараніў СМІ, партыям і аналітычным арганізацыям ЕС прымаць фінансаванне з расійскіх крыніц.
Разам з гэтым Брусэль увёў санкцыі супраць кампаній з Кітая, Казахстана, Кіргізіі, Турцыі і ААЭ за абыход абмежаванняў у дачыненні да Масквы.