Historyja vialikaha kachańnia i vialikaj adzinoty žonki Łukašenki
Siamja Alaksandra Łukašenki vialikaja i vielmi publičnaja. Dvoje jaho synoŭ, Viktar i Dźmitryj, zajmajuć vysokija pasady i časta źjaŭlajucca ŭ presie. Małodšy, Kola Łukašenka, paŭsiul supravadžaje baćku. Niaviestka Łukašenki, Hanna Siałuk, ciapier stała paetkaj i łaŭreatam mnostva dziaržaŭnych uznaharod. Navat unučka Łukašenki viadzie telepieradaču pa BT. Ale adnaho čałavieka z hetaj siamji vy nidzie nie ŭbačycie.
17.07.2024 / 17:43
Pieršaja i adzinaja žonka Łukašenki, Halina Radzivonaŭna, tak i zastałasia žyć u vioscy pad Mahilovam. Jany aficyjna nie raźviedzienyja, ale Haliny Łukašenki niama na siamiejnych fota, jana nie daje intervju i nidzie nie byvaje razam z mužam abo dziećmi.
Raskazvajem, pra pakručasty los Haliny Łukašenki, jaje znajomstva z mužam, historyju ich kachańnia i razłuki. A taksama adkazvajem na pytańni, jakim žyćciom jana žyvie ciapier, jak stavicca da Koli, čamu jaje muž nie pajšoŭ na razvod i što jana atrymaje ŭ vypadku jahonaj śmierci.
Vučylisia razam, a budučaja ciešča ŭhavaryła Łukašenku pastupać na historyka
Halina Radzivonaŭna Žaŭniarovič naradziłasia 24 studzienia 1955 hoda, na piać miesiacaŭ paźniej za svajho budučaha muža. U dziacinstvie siamja žyła ŭ Vilejskim rajonie — na radzimie baćki. Ale paśla Žaŭniarovičy pierajechali ŭ Škłoŭski rajon. Maci Alena Fiodaraŭna ŭładkavałasia nastaŭnicaj biełaruskaj movy i litaratury ŭ škołu vioski Aleksandryja, tudy ž uziali i jaje dačok.
U hetuju ž škołu chadziŭ i Alaksandr Łukašenka, jaki vyłučaŭsia siarod inšych dziaciej. Jon dobra vučyŭsia, vioŭ školnyja viečary, byŭ kamsamolskim aktyvistam i vidavočna pryciahvaŭ uvahu mnohich dziaŭčat. Ale ž, niahledziačy na svaju papularnaść, chłopiec zakachaŭsia ŭ ścipłuju Halu Žaŭniarovič, jakaja vučyłasia na adzin kłas nižej. Jak zhadvała paźniej Halina, syšlisia jany praz knižki. Bo ŭ školnyja časy Łukašenka i čytać lubiŭ, i sam pisaŭ vieršy. Jon navat nasiŭ ich u škłoŭskuju rajonku, spadziejučysia na publikacyju, ale ž — nie ŭziali. Łukašenka pryznavaŭsia, što płakaŭ paśla takoj admovy.
Sustreča z narodam. Fota: vkurier.by
Maci Haliny Žaŭniarovič była nie suprać kavalera: chłopiec byŭ razumny, vychavany i pavažlivy da jaje dački. Jon chadziŭ na spatkańni z Aleksandryi — pa čatyry kiłamietry pieški ŭ luboje nadvorje. Maładyja zvyčajna siadzieli doma, pryčym kavaler saromieŭsia baćki svajoj dziaŭčyny.
Razam z Halinaj Łukašenka atrymaŭ adnaho z samych hałoŭnych ludziej u žyćci — mienavita budučaja ciešča pierakanała chłopca pastupać na historyka. Heta, na dumku žančyny, adkryvała pierad padletkam vialikija pierśpiektyvy — jana kazała, što toj stanie dyrektaram škoły. Sam ža jon chacieŭ stać žurnalistam — ale prysłuchaŭsia da parady i padaŭ dakumienty na histaryčny fakultet mahiloŭskaha piedynstytuta.
Jak bačym, łukašenkaŭskaja ciešča mieła racyju — pierśpiektyvy, praŭda, adkrylisia nastolki vialikija, pra jakija jana i padumać nie mahła.
Praz hod za Łukašenkam na toj ža histfak taho ž mahiloŭskaha pieda pastupiła i jaho kachanaja. Jany raśpisalisia ŭ 1975-m — niaviesta tady była na trecim kursie, a žanich tolki atrymaŭ dypłom. Nijakich ramantyčnych historyj z prapanovaj ruki i serca nie było, viasielle było łahičnym praciaham stasunkaŭ. Tolki voś novaśpiečanaja ciešča była nie vielmi radaja, bo mierkavała, što jaje dačce varta było davučycca, pierš čym akunacca ŭ siamiejnaje žyćcio, ale pratestavać nie stała.
Hod u balnicach sa starejšym synam
Viančacca maładyja nie stali — choć i byli viaskovymi, ale jany byli savieckimi ludźmi, maŭlaŭ, tady takoje było nie pryniata. Nieŭzabavie paśla viasiella Łukašenku zabrali ŭ armiju, a jaho žonka zastałasia ŭ Mahilovie. Ale chutka vučoba adyšła na druhi płan, bo ŭ kancy listapada ŭsio taho ž 1975 hoda ŭ maładoj siamji naradziŭsia syn Viktar.
Alaksandr Łukašenka z synam Viktaram. Fota: president.gov.by
Mały šmat chvareŭ u dziacinstvie, praz heta jaho maci navat daviałosia zvolnicca z pracy, a siamji — pierasialicca z abłasnoha centra na Škłoŭščynu.
Jak kazała Halina ŭ adnym ź niešmatlikich intervju, amal hod jana praviała sa starejšym synam u balnicach, pakul niejki doktar nie paraiŭ im pierabracca ŭ viosku. Tak i zrabili. «Saša taksama tady nie dumaŭ pra karjeru — my ratavali syna», — kazała jana.
U vyniku, ci to sapraŭdy dapamahło viaskovaje pavietra, ci to prosta pašancavała, ale starejšy syn Łukašenak adužaŭ. A ŭ 1980-m naradziŭsia i druhi syn — Dźmitryj.
Strohija praviły ŭ siamji
Na toj momant Alaksandr Łukašenka ŭžo rabiŭ pieršyja kroki ŭ jakaści ŭpraŭlenca, ale nidzie nie moh zatrymacca nadoŭha. Jon byŭ i sakratarom kamiteta kamsamoła ŭ mahiloŭskim adździele pramhandlu, i instruktaram adnaho z rajvykankamaŭ, a taksama pasłužyŭ zampalitam u tankavaj rocie. U Škłovie jon paśpieŭ papracavać adkaznym sakratarom tavarystva «Viedy», namieśnikam staršyni kałhasa «Udarnik», sakratarom partkama kałhasa imia Lenina, i navat namieśnikam dyrektara kambinata budaŭničych materyjałaŭ. Paralelna Łukašenka zavočna advučyŭsia ŭ sialhasakademii ŭ Horkach, bo chacieŭ kiravać kałhasam, — i heta ŭsio ciaham dziesiaci hadoŭ. Jahonaja žonka ŭ hety čas pracavała ŭ dziciačym sadku, kab być pobač ź dziećmi.
U 1987-m 33-hadovaha Alaksandra Łukašenku pryznačyli dyrektaram saŭhasa «Haradziec». Heta była adna z najhoršych haspadarak u rajonie, jakuju małady kiraŭnik aktyŭna ŭziaŭsia padymać z kalenaŭ.
Fota: president.gov.by
Išła pierabudova z ekanamičnymi reformami, i małady staršynia staŭ prychilnikam arendnaha padradu. Enierhičnaha navatara zaŭvažyli na ŭzroŭni vobłaści i navat adnojčy ŭziali ŭ Maskvu na naradu da Michaiła Harbačova. U dyrektara «Haradca» z kiraŭnikom SSSR navat zdaryŭsia nievialiki dyjałoh, jaki istotna padniaŭ łukašenkaŭskuju samaacenku.
Akramia inavacyjnych mietadaŭ pracy, Łukašenka vykarystoŭvaŭ i davoli tradycyjnyja. Adnojčy na jaho zaviali kryminalnuju spravu za źbićcio traktarysta. Abvinavačany śćviardžaŭ, što ŭdaryŭ svajho padnačalenaha za toje, što toj pjanym kinuŭ traktar. Rabotniki ž kazali, što vypadak źbićcia — daloka nie adziny. U vyniku kryminalnuju spravu vynieśli na siesiju rajonnaha savieta. Na joj Łukašenku padtrymali inšyja deputaty, siarod jakich było šmat jahonych kaleh. Na hetym taja historyja i skončyłasia.
Darečy, biŭ Łukašenka nie tolki tych, z kim pracavaŭ, ale i svaich synoŭ. Jon raskazvaŭ, što vykarystoŭvaŭ remień dla vychavańnia starejšaha syna Viktara.
Alaksandr Łukašenka z synami Viktaram i Dźmitryjem. Fota: president.gov.by
Žonka ž u spravy muža nikoli nie ŭmiešvałasia. Jana ščyra pryznavałasia, što pryvykła zaŭsiody sastupać mužu.
U 1990 hodzie Łukašenka staŭ deputatam Viarchoŭnaha savieta BSSR. Z hetaha momantu pačynajecca jahonaja palityčnaja karjera, jakaja ciahniecca i pa siońnia. Adrazu ž jon vystaviŭ svaju kandydaturu na pasadu staršyni kamisii pa sielskaj haspadarcy i charčavańni. Heta b dazvoliła pierabracca ŭ Minsk i trapić u prezidyum parłamienta. Ale Łukašenku nie padtrymali inšyja deputaty, i jamu pryšłosia praciahvać kiravać saŭhasam.
Ale haspadarka turbavała Łukašenku ŭsio mienš, jon byŭ zachopleny vialikaj palitykaj, tym bolš novy status značna ablahčaŭ vyrašeńnie šmatlikich pytańniaŭ. Deputat z trybuny parłamienta raśpinaŭ kiraŭnictva krainy, spačatku savieckaje, a paśla i niezaležnaje, vystupaŭ suprać raspadu Savieckaha sajuza i navat admoviŭsia vychodzić z kamunistyčnaj partyi.
Pry padjomie pa karjernaj leśvicy žonka adyšła na druhi płan
U 1993-m nastupiŭ jahony zorny čas — Łukašenka ŭznačaliŭ časovuju kamisiju Viarchoŭnaha savieta pa baraćbie z karupcyjaj. Na adnoj ź siesij jon vystupiŭ z pałymianym dakładam. Jon emacyjna raskazvaŭ pra chabary, pra pryvatyzacyju pa zanižanych cenach i machinacyi z kredytami. Naminalnaha kiraŭnika krainy Stanisłava Šuškieviča Łukašenka abvinavaciŭ u kradziažy skryni ćvikoŭ.
Chacia ahułam ničoha novaha nie było skazana, u śviadomaści mnohich biełarusaŭ deputat zastaŭsia charyzmatyčnym zmaharom za spraviadlivaść. Bo pramovu krucili pa radyjo, i mnohija jaje słuchali. Na kani baraćby z karupcyjaj Łukašenka skača ŭsio svajo palityčnaje žyćcio, ale da kančatkovaj pieramohi jon navat nie nabliziŭsia.
Padobna, što z padjomam pa palityčnaj leśvicy na druhi płan adyšła nie tolki praca, ale i siamiejnaje žyćcio. Papularny deputat nikoli nidzie nie źjaŭlaŭsia sa svajoj žonkaj. Na adnym ź niešmatlikich videa ź jaje ŭdziełam jana zajmajecca chatnimi spravami asobna ad muža, jaki paziruje kamieram z synami.
I navat na prezidenckich vybarach 1994-ha Łukašenka hałasavaŭ tolki ŭ kampanii dziaciej, Viktara i Dźmitryja.
Halina Łukašenka (źleva). Fota: TASS
Inšych pryčyn, akramia siamiejnych prablem, składana znajści tamu faktu, što paśla abrańnia prezidentam Halina Łukašenka nie zachacieła jechać za mužam u Minsk. Tak, spačatku treba było dahladać za synam-školnikam i maci. Ale pastupova abodva syny pierabralisia da baćki ŭ stalicu, a Halina tak i zastałasia žyć adna ŭ vioscy Ryžkavičy pad Škłovam. Łukašenka nie pierakonvaŭ jaje pierajechać u Minsk, ale ŭ toj ža čas jany i nie afarmlali razvodu.
Hałasavała suprać ruskaj movy i pryvykła žyć biez muža
Cikava, što jak minimum adnojčy Halina Łukašenka rašyłasia nie pahadzicca z mužam. U 1995 hodzie jon inicyjavaŭ refierendum, adnym z pytańniaŭ jakoha było nadańnie ruskaj movie statusu dziaržaŭnaj. Narod tut kiraŭnika krainy padtrymaŭ, ale nie jahonaja žonka.
Žurnalistam jana raskazała, što hałasavała suprać. Sa słoŭ Haliny Radzivonaŭny, joj było vielmi škada, što ludzi ŭ takoj vialikaj kolkaści vykazalisia za ruskuju movu. Zrešty, žančyna vykazała ŭpeŭnienaść, što biełaruskaja mova nie źniknie. Cytata: «Matčyna mova budzie žyć zaŭsiody. Ja ŭ heta vieru».
Halina Łukašenka z synami
U 1996 hodzie pieršaja ledzi Biełarusi dała jašče adno nievialikaje intervju. Jana raskazała, što samy lubimy čas dla jaje — leta, bo na kanikuły pryjazdžajuć dzieci. Taksama Halina Łukašenka pryznałasia, što Novy hod sustrakaje razam z synami — ale nie z mužam. Voś krasamoŭnaja cytata z toj hutarki:
«Ja pryvykła žyć biez muža, i mnie heta asablivych ciažkaściaŭ nie pryčyniaje. Adzinokaj ja siabie nie adčuvaju. Sa mnoju maje dzieci».
Jašče adna nievialikaja, ale admietnaja detal. U tym ža intervju žonka nazyvaje Łukašenku nie Alaksandram ci Sašam, a imieniem pa baćku: Ryhoravič.
Padarožžy i majomaść Haliny Łukašenki
Praz paru hadoŭ svajho prezidenctva Alaksandr Łukašenka, padobna, pakłapaciŭsia pra ścipłuju karjeru žonki. U 1998 hodzie jana ŭznačaliła adździeł Mahiloŭskaha abłvykankama pa azdaraŭleńni nasielnictva. Jana zajmałasia raźmierkavańniem puciovak u sanatoryi. Na śviaty žančyna jeździła da synoŭ u Minsk, byvała i ŭ rezidencyi svajho muža, ale pryznavałasia, što haspadyniaj nikoli tam siabie nie adčuvała — bo tam nie žyvie. U stalicy pieršaja ledzi Biełarusi lubiła pajści ŭ teatry i pa kramach. U svaich niešmatlikich intervju jana raskazvała, što ščaślivaja, bo jaje nichto nie paznaje na vulicy. Taksama Halina Radzivonaŭna kazała, što Łukašenka, choć i žyvie asobna, ale dapamahaje joj materyjalna. I pryznavałasia, što ŭsio jašče kachaje svajho muža.
U siaredzinie nulavych žonka Łukašenki raskazvała, što nikoli nie była za miažoj. Ale z vychadam na piensiju heta vypraviłasia dziakujučy niaviestkam i ŭnukam.
Z 2010 hoda Halina Łukašenka dziasiatki razoŭ vylatała adpačyvać za miažu, pryčym nie zvyčajnymi rejsami, a na pryvatnych samalotach i navat na ŭradavym biznes-džecie. Hieahrafija šyrokaja — ad aŭstryjskaha Insbruka da stalicy Katara Dochi (takuju infarmacyju zdabyŭ Aljans rasśledavalnikaŭ Biełarusi z dapamohaj «Kibierpartyzanaŭ»).
Kala piaci hadoŭ tamu hałoŭnaja piensijanierka Biełarusi pierasialiłasia sa zvyčajnaha cahlanaha doma ŭ Ryžkavičach u sučasny draŭlany, aharodžany vysokim płotam i atočany videakamierami. Pobač žyvuć baćki žonki jaje syna Viktara. Cikava, što papiaredniaje žytło Haliny Łukašenki pieradali ŭ kamunalnuju ŭłasnaść, i tam niekatory čas žyŭ kiraŭnik Škłoŭskaha rajvykankama.
Dom, dzie ciapier žyvie Halina Łukašenka. Fota: «Radyjo Svaboda»
Niahledziačy na šykoŭny dom, pa dakumientach pieršaja ledzi Biełarusi žyvie vielmi ścipła. Zhodna z dekłaracyjaj, jakuju Alaksandr Łukašenka padaŭ pierad apošnimi vybarami, dachody jaho žonki składali tolki piensija i dyvidendy ad akcyj Škłoŭskaha masłarobčaha zavoda. Usiaho za 2019 hod jana atrymała 5560 rubloŭ — heta 463 rubli na miesiac, ci kala 220 dalaraŭ.
Taksama ŭ jaje va ŭłasnaści paznačany 196-mietrovy dom u Škłovie i jašče pałova, jakaja dastałasia ŭ spadčynu ad maci. U toj ža čas Alaksandr Łukašenka aficyjna zarablaŭ u 21 raz bolš za žonku — kala 10 tysiač rubloŭ štomiesiac. Ale ŭ jaho zusim nie akazałasia nijakaj majomaści.
Z hrašyma jość adzin cikavy niuans. Niadaŭna Łukašenka ŭnios źmieny ŭ zakon «Ab prezidencie Biełarusi». Zhodna ź imi, paśla śmierci kožny člen jaho siamji budzie štomiesiac atrymlivać sumu ŭ pamiery štomiesiačnaj prezidenckaj zarpłaty — a heta kala 4 tysiač dalaraŭ. Takim čynam, jak tolki jaje muža nie stanie, siaredniaja pa biełaruskich mierkach piensija Haliny Radzivonaŭny moža raptam pieratvarycca ŭ kudy bolšuju sumu.
Halina i Kola
Taksama varta zakranuć jašče adzin dalikatny momant. U krasaviku 2008 hoda Łukašenka źjaviŭsia na subotniku z maleńkim chłopčykam. Praź niekatory čas vyśvietliłasia, što heta jahony treci syn Mikałaj. A jaho maci — nie aficyjnaja žonka Halina, a asabistaja doktarka Łukašenki Iryna Abielskaja.
Temu suisnavańnia šlubu i pazašlubnaha dziciaci publična ŭzdymała tolki rasijskaja žurnalistka Ksienija Sabčak 10 hadoŭ tamu. U intervju Łukašenka nazvaŭ svaju žonku prystojniejšym čałaviekam i skazaŭ, što razvodzicca nie źbirajecca, bo nikomu ad hetaha lepš nie stanie.
Zźviartała na siabie ŭvahu ŭ hetaj razmovie jašče i vielmi ciopłaje staŭleńnie da cieščy. U haściach ŭ Aleny Fiodaraŭny Žaŭniarovič ziać sapraŭdy byvaŭ davoli časta. Pryčym nie adzin: pryvoziŭ da jaje i małodšaha syna Kolu, i ŭpłyvovych haściej. Na viadomym fota ŭ kampanii z Alenaj Žaŭniarovič i dvuma Łukašenkami stajać doktarka Śviatłana Kanašenka, śpiavačka Alona Łanskaja, televiadučaja Palina Šuba i biznesoŭcy Siarhiej Ciacieryn dy Alaksandr Šakucin. Pryčym, cikavy momant: Alena Žaŭniarovič raskazvała žurnalistam, što pra pryjezd svajho viadomaha ziacia daznavałasia nie ad jaho asabista, a praź milicyju. Maŭlaŭ, prychodzili i kazali, kab była doma. A paśla ŭžo pryjazdžaŭ Łukašenka. Pakul jon naviedvaŭ lubimuju ciešču, na vulicy vakoł chaty dziažuryli achoŭniki.
Ciešča Łukašenki Alena Žaŭniarovič. Fota: Tut.by
Taksama Alena Fiodaraŭna kazała, što lubić svajho ziacia, jak syna, i vielmi škaduje jaho. Bo bačyła, jakaja nialohkaja jahonaja praca. Žančyna dadavała, što nie bačyć jamu alternatyŭ i što kali ŭ Biełarusi ŭsio dobra, to i nie treba ničoha mianiać.
Aleny Žaŭniarovič nie stała ŭ 2019-m, jana pamierła na 91-m hodzie žyćcia. Kab raźvitacca ź cieščaj, Łukašenka navat źmianiŭ svaje pracoŭnyja płany: jon musiŭ lacieć u Armieniju. Ale adkłaŭ vylet na dzień, kab pryjści na pachavańnie.
Trapiła pad sankcyi
Apošnija zhadki pra pieršuju łedzi Biełarusi datujucca pieršymi miesiacami 2022 hoda.
Paśla rasijskaha ŭvarvańnia va Ukrainu Halina Radzivonaŭna Łukašenka trapiła pad sankcyi ZŠA, Ukrainy, Aŭstralii i navat Novaj Ziełandyi. Vidavočna, składalnikaŭ śpisu nie vielmi cikavili akaličnaści pryvatnaha žyćcia Alaksandra Łukašenki, prosta pad ban uklučyli ŭsiu jaho siamju.
Adnojčy ŭ intervju Halina Łukašenka adznačyła, što sama vybrała sabie takoje žyćcio, i adzinota jaje nie abciažarvaje. Ci praŭda heta — chto jaho viedaje. U toj čas, jak jana budzie naleta adznačać 70-hadovy jubilej, Alaksandr Łukašenka budzie iści na siomy termin va ŭładzie. Mahčymaść pažyć na piensii spakojnym viaskovym žyćciom jon daŭno upuściŭ. A dla jaho žonki Haliny viaskovaje žyćcio dy vialiki pusty dom — usio, što zastałosia ad 30-hadovaha prezidenctva muža.