Дзеці праводзяць дні ў чарзе па апастыль на атэстат
Каб пацвердзіць юрыдычную сілу атэстата, учорашнія школьнікі прыязджаюць з рэгіёнаў і селяцца ў сталічных хостэлах за 30 рублёў за суткі, піша Tochka.by
20.06.2024 / 09:48
Адзінаццацікласнікі атрымалі атэстаты 14 чэрвеня, шэсць дзён таму. Здавалася б, школьнікі выдыхнулі, бо ўсе ЦЭ і ЦТ ужо мінулі. Але не ўсё так проста.
Выпускнікі, якія вырашылі паступаць не ў беларускія ВНУ, а паспрабаваць свае сілы за мяжой, павінны прайсці праз дадатковую працэдуру — легалізацыю ўласнага дакумента аб адукацыі.
Калі абраная краіна, дзе плануецца навучанне, уваходзіць у Гаагскую канвенцыю, на атэстат прастаўляюць апастыль. Займаюцца гэтым у Дэпартаменце кантролю якасці адукацыі Мінадукацыі.
Менавіта пад яго будынкам ужо некалькі чэрвеньскіх дзён стаіць доўгая чарга з ахвотных легалізаваць дакумент аб адукацыі.
Журналісты пагаварылі з беларусамі, якія спрабавалі падаць дакументы на апастыль.
Як паставіць апастыль
Сітуацыя з легалізацыяй атэстатаў хутка мяняецца, нюансы і асаблівасці працэдуры карэктуюцца літаральна на вачах.
Так, першапачаткова ўсе ахвотныя запісваліся ў неафіцыйную чаргу. Спіс вялі ў сшытку, дзе кожнаму прысвойвалі парадкавы нумар, у адпаведнасці з якім людзі і падаваліся на апастыль.
Нюансы абмяркоўвалі ў створаных чатах у месенджарах. Праўда, інфармацыя пра іх не занадта разышлася. Таму некаторыя ў пятніцу, 14 чэрвеня, адстойвалі жывую чаргу без папярэдняга запісу; а даведаўшыся, што ёсць нейкі парадак, моцна нерваваліся.
Ужо ў аўторак, 18 чэрвеня, Мінадукацыі абвясціла пра змену правілаў прастаўлення апастылю з 1 ліпеня. Так, планавалі ўвесці папярэдні запіс у самім Дэпартаменце, а таксама прымаць дакументы і выдаваць ужо аформленыя на працягу аднаго працоўнага дня.
Аднак да змены правілаў у падпарадкаваным Міністэрству ведамстве прыступілі ўжо на наступныя суткі.
Так, прыём дакументаў на апастыль з 20 чэрвеня будзе праходзіць выключна па папярэднім запісе, які вядзе сам Дэпартамент.
Такім чынам, у сераду, 19 чэрвеня, чэргаў у беларусаў стала дзве: «па сшытку» для падачы дакументаў і «за талонам» з указаннем даты, калі можна прынесці атэстат на легалізацыю.
Зняла хостэл дзеля апастыля
Міхаіл (імя зменена па просьбе героя) прыехаў з Брэста. Герой прыцягнуў нашу ўвагу чорным бліскучым чамаданам на колцах: хлопец толькі з цягніка. Аб чаце ў месенджары загадзя не ведаў. Спасылку на яго атрымаў выпадкова ад сваякоў у дзень паездкі.
Таму навіна пра дзве чаргі Міхаіла не збянтэжыла: адразу стаў за талонам.
«Адбываецца так: той, хто быў запісаны ў сшытак, падае дакументы сёння, а тыя, хто крыху далей [у пераліку. — Tochka.by], цяпер стаяць у чарзе, каб атрымаць талон», — растлумачыў хлопец.
У чарзе «ад Дэпартамента» Міхаіл быў прыкладна паўтары гадзіны. На момант размовы хлопец быў бліжэй да ўваходу ў будынак, чым да канца «шарэнгі».
Як пазней растлумачылі ў чаце, талоны выдавалі з разліку прыкладна 80-90 чалавек на падачу ў адзін дзень. Хто ішоў пазней гэтай адзнакі, атрымліваў запіс на наступныя даты.
Так, у 15:20 паказвалі, што талоны выдавалі на 26 чэрвеня.
Дні чакання апастыль Міхаіл правядзе ў гасцях у сваякоў.
У Ганны сітуацыя больш складаная. Падчас нашай гутаркі яна спрабавала падаць дакументы на легалізацыю ўжо трэці дзень. Дзеля юрыдычнай працэдуры дзяўчына прыехала з Гродна. Жыве ў сталічным хостэле, за суткі плаціць Br30.
«Сваякі запісалі мяне [у сшытак. — Tochka.by] на падачу яшчэ на мінулым тыдні. І я была аптымістычна настроена, думала, што прымуць хутка. Спадзявалася, што падамся ў панядзелак, але не выйшла», — прызналася Ганна.
Не атрымалася аддаць дакументы і ў аўторак, 18 чэрвеня. У сераду — трэцяя спроба, на якую дзяўчына ўскладала вялікія надзеі.
Тэрмін разгляду атэстатаў
Вольга з дачкой да 11 раніцы паспелі прастаяць у двух чэргах: на выпадак, калі не паспеюць падацца ў «сшыткавых», узялі талон у «афіцыйнай».
«Знаёмыя прыйшлі падавацца раней за восем. Папрасілі іх заняць нам чаргу, а самі прыйшлі да дзевяці. Таму талон узялі за паўгадзіны. Думаю, тыя, хто пазней прыехаў, прастаяць даўжэй», — падзялілася сваімі назіраннямі Вольга.
Сярод планаў у мамы з дачкой — замежны адпачынак, таму займацца апастыль трэба менавіта цяпер.
У чарзе з фізічных асоб знайшліся і юрыдычныя асобы —прадстаўнікі бюро перакладаў. Па даверанасці яны падаюць на апастыль паперы сваіх кліентаў.
«[Чарга. — Tochka.by] гэта штогадовая сітуацыя, бо для падачы дакументаў ёсць абмежаванні па часе. Гатовыя легалізаваныя паперы трэба падаць у тэрмін», — распавяла прадстаўніца бюро.
Паводле яе слоў, легалізацыяй атэстатаў і дыпломаў звычайна займаюцца аж да пачатку жніўня.
Па афіцыйных дадзеных, тэрмін прастаўлення апастыля складае адзін дзень. Аднак некаторыя ўдзельнікі чата сцвярджалі, што атэстаты, пададзеныя юрасобамі, спецыялісты дэпартамента могуць разглядаць да 15 дзён.
Мінадукацыі з 1 ліпеня мяняе графік прыёму дакументаў на апастыль — РАСКЛАД
Мінадукацыі адрэагавала на звароты грамадзян наконт апастылю