У Пецярбургу выпадкова знайшлі кнігу, якая належала асабіста Сімяону Полацкаму
Пра нечаканае і ў пэўнай ступені выпадковае адкрыццё напісаў у фэйсбуку супрацоўнік Расійскай нацыянальнай бібліятэкі, адзін з найвядомейшых прадстаўнікоў беларускай дыяспары ў Санкт-Пецярбургу Мікалай Нікалаеў.
18.06.2024 / 16:35
Фота: фэйсбук-старонка Мікалая Нікалаева
«Пазванілі рэстаўратары: мы тут кніжку рэстаўравалі, Евангелле на арабскай і лацінскай мовах з друкарні Медзічы, Рым, 1591 год. І знайшлі ў напаўненні пераплёту шмат грэчаскіх рукапісных лісткоў. А на апошняй старонцы нейкія славянскія і лацінскія запісы. Можа, глянеце?
Падыйшоў, глянуў: лацінскай мовай пра прыналежнасць кнігі іераманаху базыльянскага ордэна Сімяону Піятроўскаму Сітнятовічу. Што значыць — Сімяону Полацкаму. Яго рукой», — напісаў Нікалаеў.
«Сенсацыя. Пасля вывучэння моцна прагучыць», — падсумоўвае ён знаходку.
Сімяон Полацкі (1629-1680) — беларускі і расійскі царкоўны і грамадскі дзеяч, паэт, мысліцель, прапаведнік. Арганізатар друкарні ў Крамлі. Пісаў свае творы на розных мовах — старабеларускай, расейскай, царкоўнаславянскай, польскай, лацінскай. Быў выхавальнікам і настаўнікам царскіх дзяцей, сярод ягоных вучняў — расійскія цары Фёдар Аляксеевіч і Пётр І.
Нацыянальная бібліятэка набыла першы паэтычны пераклад Псалтыра на царкоўнаславянскую мову
Каля Акадэміі навук адкрылі помнік сямі знакамітым беларусам