12 hadoŭ za pavietranyja šaryki. U Rasii vynieśli prysud ukraincy, jakuju padmanam uhavaryli pryjechać sa Šviejcaryi ŭ Maskvu i pravieści akcyju pratestu
U žančyny ŭ Kijevie zastalisia chvoraja na rak maci, dzied z demiencyjaj i dvoje dziaciej.
18.06.2024 / 07:58
Fota Alaksandra Astachava. Miedyjazona
Paśla ŭvarvańnia Rasii va Ukrainu Kryścina Lubašenka ź siamjoj źbiehła z Kijeva ŭ Šviejcaryju. Hrošaj na žyćcio nie chapała, i jana paddałasia na ŭhavory vypadkovaha znajomaha: pajechać u Rasiju i za ŭznaharodžańnie zapuścić u Maskvie šaryki ź bieła-sinie-biełym ściaham (kolerami pratestu). Paźniej da abiacańniaŭ hrošaj dadalisia pahrozy i šantaž, paviedamlaje «Miedyjazona».
8 maja 2023 hoda ŭkrainku zatrymali: na vyznačanym miescy zapusku jaje ŭžo čakali apieratyŭniki «Centra E». Učora 2 Zachodni akruhovy vajskovy sud prysudziŭ 35-hadovuju Kryścinu da 12 hadoŭ źniavoleńnia, paličyŭšy jaje vinavataj u raspaŭsiudzie «fejkaŭ» pra vajnu i ŭdziele ŭ terarystyčnaj arhanizacyi.
Prakuror patrabavaŭ dla Kryściny jašče bolš — 15 hadoŭ źniavoleńnia, pryčym hety termin jon prasiŭ z ulikam źmiakčalnych abstavinaŭ: raniej nie sudzimaja, u jaje maleńkija dzieci, chvoryja maci i dziadula. Pry kožnym zhadvańni pra dačok i chvoruju mamu ŭ padsudnaj u sudovym «akvaryumie» pačynali dryžać vusny.
Pavodle viersii śledstva, 8 maja 2023 hoda ŭkrainka pastaviła kałonki na akno zdymnaj kvatery ŭ padmaskoŭnym horadzie Daŭhaprudnym i hučna ŭklučyła zapis z antyvajennaj pramovaj i himnam Ukrainy; heta siłaviki paličyli raspaŭsiudžvańniem «fejkaŭ» pra vojska (punkty «b», «d» častki 2 artykuła 207.3 KK).
U toj ža dzień Lubašenka na taksi pajechała na Varabjovyja hory ŭ Maskvie i zapuściła ŭ nieba pavietranyja šaryki z pryviazanym da ich bieła-sinie-biełym ściaham.
Zapusk šaroŭ śledstva rascaniła jak udzieł u terarystyčnaj arhanizacyi (Častka 2 artykuła 205.5 KK): bieła-sinie-bieły ściah vykarystoŭvajuć mnohija rasijskija antyvajennyja aktyvisty, ale siłaviki ličać jaho ściaham lehijonu «Svaboda Rasii», pryznanaha Viarchoŭnym sudom Rasii terarystyčnaj arhanizacyjaj.
Razhlad spravy Lubašenki zaniaŭ usiaho dva dni.
Vystupajučy ŭ sprečkach 17 červienia, advakat Ludmiła Paśmitnaja raspaviała, što zdaryłasia ź jaje padabaronnaj. Kryścina Lubašenka žyła ŭ Kijevie z chvoraj na rak maci, dziadulem z demiencyjaj i dźviuma dočkami. Paśla 24 lutaha 2022 hoda siamja źbiehła ŭ Šviejcaryju i atrymała tam prytułak.
Ale hrošaj na žyćcio im ledź chapała. Adnojčy Lubašenka paznajomiłasia z susiedam pa imieni Vital Jurčanka, jaki, pa słovach advakata, «vydavaŭ siabie za ŭciekača z Ukrainy». Mužčyna spačatku davaŭ Lubašency ŭ doŭh.
Potym jon paprasiŭ pajechać u Maskvu i za hrošy pravieści tam «mirnuju akcyju suprać vajny»: zapuścić u nieba žoŭta-sinija šaryki.
«Ni pra ściah u kalarovaj hamie bieł-sinie-bieły, ni pra kałonki, ź jakich pavinien tranślavacca himn Ukrainy i tekst, nijakaj havorki na toj momant nie viałosia», — padkreśliła Paśmitnaja. Padsudnaja paćvierdziła heta.
Mienavita Jurčanka, kaža abarona, kupiŭ Kryścinie kvitok u adzin kaniec i źniaŭ kvateru ŭ Daŭhaprudnym. Jon ža, sa słoŭ advakata, staranna kantralavaŭ pieramiaščeńni žančyny i davaŭ joj daručeńni.
Lubašenka prybyła ŭ Maskvu 5 maja 2023 hoda. Paśla hetaha Jurčanka zapatrabavaŭ ad jaje vystavić z akna kvatery kałonki z antyvajennaj pramovaj.
Lubašenka kaža, što spačatku nie chacieła hetaha rabić, ale znajomy pačaŭ pahražać, što paviedamić u orhany apieki pra dačok, jakich jana pakinuła ŭ Šviejcaryi, i ich zabiaruć u dziciačy dom. Pa słovach abaroncy, pierapiska, padčas jakoj Jurčanka šantažavaŭ žančynu, jość u materyjałach spravy.
Ukrainka była vymušana pahadzicca. 8 maja jana vystaviła na aknie kałonki z zapisami suprać vajny, a potym pajechała na Varabjovy hory zapuskać šaryki. Da šaroŭ, pa zadumcy arhanizatara, pavinien byŭ być prymacavany bieł-sinie-bieły ściah, jaki toj nazvaŭ «ściaham miru».
Spačatku, raspaviała advakat, Lubašenka pavinna była zabrać ściah sa schovišča, ale ściaha tam nie akazałasia, tak što žančynie daviałosia pašyć jaho samoj ź siniaj i biełaj tkaniny.
Usimi hetymi dziejańniami kiravaŭ Jurčanka, jaki, sa słoŭ abaroncy, «dobra aryjentavaŭsia» ŭ Maskvie i Padmaskoŭi. Lubašenka zapuściła biełyja šaryki z kavałkam tkaniny, i jaje adrazu ž zatrymali. Advakat adznačyła, što pałatno było prymacavanaje da šaroŭ za adzin kaniec,
tak što raspaznać u im ściah ciažka: «da biełych šaroŭ pryviazanaja tkanina biełaha koleru, ale tak jak dadzienaja tkanina macujecca za adzin kaniec, to absalutna nie vidać, ci jość na joj pałosy».
U sudzie, jak nahadała Paśmitnaja, dapytali apieratyŭnika z Centra pa supraćdziejańni ekstremizmu, jaki zatrymlivaŭ Kryścinu Lubašenku. Sa słoŭ palicejskaha, jon zahadzia atrymaŭ ad kiraŭnictva infarmacyju, što «niejkaja asoba budzie ładzić pratesnuju akcyju» ŭ Maskvie.
Niezrazumieła, padkreślivaje abaronca, jakim čynam siłaviki zahadzia daviedalisia dakładnaje miesca i čas akcyi, pry hetym apieratyŭnik zapeŭnivaŭ, što na Varabjovych harach jany zaŭvažyli Lubašenku vypadkova.
«Jakim ža prafiesijnym niucham vałodajuć našy apieratyŭnyja supracoŭniki, — iranizavała abaronca, — što zmahli adrazu raspaznać u dziaŭčynie z šarykami, što vyjšła z taksi, ekstremistku i terarystku, bo heta tak niezvyčajna — sustreć na vulicach Maskvy dziaŭčynu z šarykami».
Vystupajučy ŭ sudzie, advakat Paśmitnaja padkreśliła, što adziny dokaz viny Lubašenki — heta pratakoły dopytu ad 10 maja z paćviardžalnymi pakazańniami, ale i tyja byli atrymanyja niezakonna.
Pa-pieršaje, dopyt nibyta prachodziŭ u IČU, dzie niama ni kampjutara, ni pryntara, adnak pakazańni nadrukavanyja, a nie napisanyja ad ruki.
Pa-druhoje, intaresy Lubašenki pa pahadnieńni pradstaŭlaŭ advakat z Rastoŭskaj vobłaści Vasil Damaradski, jakoha ni jana sama, ni chto-niebudź ź jaje blizkich nie najmaŭ. Sa słoŭ abaroncy, śledčy pryjšoŭ da Lubašenki ŭ IČU z «zahadzia składzienymi pratakołami dopytaŭ» i «kišennym» advakatam.
«Lubašenka, nie čytajučy i ŭnikajučy ŭ tekst zahadzia składzienych pakazańniaŭ, padpisvaje hetyja pratakoły, bo i śledčy, i advakat pierakonvajuć jaje, što ź joj ničoha strašnaha nie budzie, chutka spravu nakirujuć u sud, tam asudziać na ŭmoŭny termin za chulihanstva, i jana vierniecca da siabie dadomu», — raspaviała abaronca.
Spačatku ŭkraincy sapraŭdy stavili ŭ vinu tolki chulihanstva, ale paźniej zrabili bolš strohim abvinavačvańnie.
Advakat prasiła sud zakryć spravu praz adsutnaść prykmiet składu złačynstva.
Kryścina Lubašenka ŭ sprečkach vystupała na ŭkrainskaj movie. Vinavataj siabie jana nie pryznaje. «Jak cie diło zrobiłoś, ja dumaju, vam vsim zrozumiło», — skazała jana.
Znataka Illu Novikava zavočna asudzili ŭ Rasii na vosiem z pałovaj hadoŭ