U rasijskaj kałonii pamior hramadski aktyvist Ihar Pakusin
Jaho asudzili na vosiem hadoŭ za «padrychtoŭku da dziaržzdrady».
14.06.2024 / 14:09
Ihar Pakusin. Fota z sacsietak
Pamior abakanski hramadski dziejač Ihar Pakusin, asudžany na 8 hadoŭ za «padrychtoŭku da dziaržzdrady», paviedamili krynicy «Sibir.Realii», blizkija da siamji Pakusina.
61-hadovy Pakusin pamior 11 červienia. Pryčyna śmierci pakul nie paviedamlajecca.
U studzieni 2024 hoda suda ŭ Abakanie pryznačyŭ Pakusinu vosiem hadoŭ i miesiac kałonii, pryznaŭšy jaho vinavatym u sprobie pierajści na bok USU. Pryčym prakuratura prasiła dla Pakusina mienšy termin — 7 hadoŭ i 1 miesiac u kałonii.
Upieršyniu Pakusina, jaki naradziŭsia i vyras va Ukrainie, zatrymali ŭ mai 2022 hoda — pa padazreńni ŭ psavańni banieraŭ u padtrymku vajny. Jamu stavili ŭ vinu kryminalny artykuł pra vandalizm za toje, što jon abliŭ žoŭtaj i siniaj farbaj z-banier ź litaraj Z i napisaŭ «Słava Ukrainie» na ścianie muzieja ŭ Abakanie, dzie da hetaha źjaviŭsia śvietłavy ekran ź litaraj Z.
Pakusinu dali padpisku ab niavyjeździe. U lipieni taho ž hoda jaho zatrymali znoŭ — u krasnajarskim aeraporcie i pasadzili pad chatni aryšt.
7 śniežnia jamu pryznačyli paŭhoda ŭmoŭna pa spravie ab vandaliźmie. Užo na nastupny dzień jaho zatrymali znoŭ — užo pa spravie ab dziaržzdradzie. Praz paŭhoda ŭ FSB vyrašyli, što ŭ krasnajarskim aeraporcie jon sprabavaŭ pakinuć krainu, kab dałučycca da USU.
U śniežni ŭ dačynieńni da jaho raspačali kryminalnuju spravu pavodle artykuła ab zamachu na dziaržzdradu. Pavodle viersii FSB, sprabavaŭ pakinuć krainu, kab dałučycca da ŭzbrojenych sił Ukrainy. Paźniej artykuł pierakvalifikavali na »pryhatavańnie da dziaržzdrady». U spravie fihuravali razmovy Pakusina ź siabrami, u jakich jon pryznaŭsia, što choča pajechać va Ukrainu i pracavać u hramadzianskaj avijacyi. Pa danych krynicy «Sibir.Realii», blizkaha da siamji Pakusina, jon nie płanavaŭ ustupać va USU, a tolki chacieŭ źjechać z Rasii.
***
U 2012 hodzie Pakusin ładziŭ adzinkavyja pikiety ŭ Abakanie z patrabavańniem pierahledzieć spravu syna, jakoha asudzili za zbyt narkotykaŭ. Pakusin abvinavačvaŭ sud u źniščeńni dokazaŭ nievinavataści syna.
Jon arhanizavaŭ hramadski ruch «Dokole», členy jakoha zmahalisia sa złoŭžyvańniami supracoŭnikaŭ pravaachoŭnych orhanaŭ. U pryvatnaści, siabry ruchu sustrelisia z udzielnikami Savieta pa pravach čałavieka pry prezidencie Rasii, jakija pryjechali ŭ Chakasiju paśla masavych skarhaŭ svajakoŭ, jakija skardzilisia na drennuju pracu śledčych.
U 2013 hodzie Ihar Pakusin, pradstaŭlajučy partyju «Parnas», sprabavaŭ atrymać rehistracyju kandydata na vybarach deputataŭ Viarchoŭnaha savieta Chakasii. Vybarkam admoviŭ jamu ŭ rehistracyi.