Hałoŭny ŭrač i supracoŭnica sanatoryja «Biełaruś» u Druskienikach atrymali vializnyja terminy za špijanaž na karyść Litvy
Šeść hadoŭ pazbaŭleńnia voli — taki prysud nibyta za ahienturnuju dziejnaść vynies siońnia Minski haradski sud Alenie Ramanaŭskienie, supracoŭnicy sanatoryja «Biełaruś» u litoŭskich Druskienikach.
11.06.2024 / 13:03
Razhlad spravy prachodziŭ u zakrytym režymie. Pavodle viersii śledstva, zahadčyca markietynhavaj słužby i dyrektar sanatoryja byli zavierbavanyja litoŭskaj śpiecsłužbaj bolš za 10 hadoŭ tamu, piša ANT.
«Jany nieadnarazova padavali źviestki pra pastajalcaŭ, jakija prybyvali na adpačynak, u tym liku i pra vysokapastaŭlenych biełaruskich čynoŭnikaŭ», — paviedamlaje telekanał.
Pavodle abvinavačańnia, supracoŭniki pieradavali litoŭskaj śpiecsłužbie roznyja dakumienty, a dyrektar ustanovy daŭ padpisku ab sakretnym supracoŭnictvie z DDB i rehularna braŭ chabary. Jaho asudzili na 9 hadoŭ pazbaŭleńnia voli, jon užo adbyvaje pakarańnie, piša ANT.
Imavierna, prapahandysty majuć na ŭvazie nie dyrektara, a byłoha hałoŭnaha ŭrača biełaruskich sanatoryjaŭ u Druskienikach i Sočy Andreja Kobiela. Sud nad im pačaŭsia 16 žniŭnia ŭ Minskim haradskim sudzie ŭ zakrytym režymie. Kobiela abvinavačvali pavodle artykuła «Zdrada dziaržavie», jak vynikała z raskładu suda. Pra prysud ničoha nie paviedamlałasia.
Andrej Kobiel pracavaŭ hałoŭnym uračom u sanatoryi «Biełaruś» u Druskienikach, a paśla — na toj ža pasadzie ŭ sanatoryi ŭ Sočy. Paźniej kiravaŭ adździełam RNPC u Minsku.
Pra Kobiela raskazvali na dziaržtelebačańni ŭ śniežni 2023 hoda. Pavodle aficyjnaj viersii, jaho nibyta zavierbavali litoŭskija śpiecsłužby pad pahrozaj šantažu. Ad jaho, jak śćviardžałasia, patrabavałasia źbirać i pieradavać źviestki pra tych, chto adpačyvaje ŭ sanatoryjach, a taksama źviestki pra rezidencyju Alaksandra Łukašenki ŭ Sočy, jakaja znachodzicca na terytoryi sanatoryja. Taksama śćviardžałasia, što jon uładkoŭvaŭ na pracu supracoŭnikaŭ pa patrabavańni Departamienta dziaržbiaśpieki Litvy.
59-hadovaja Alena Ramanaŭskienie — hramadzianka Litvy, uradženka Biełarusi. Zatrymać jaje mahli letaś, kali jana viartałasia ŭ Litvu ź Biełarusi, dzie naviedvała rodnych. Svajaki žančyny ad kamientaroŭ litoŭskamu vydańniu admovilisia.
Zatrymanaja litoŭskaja «špijonka» akazałasia supracoŭnicaj sanatoryja «Biełaruś»
Byłoha hałoŭnaha lekara biełaruskich sanatoryjaŭ u Druskienikach i Sočy buduć sudzić za «špijanaž»
Za špijanaž aryštavali hramadzianku Litvy Alenu Ramanaŭskienie