Ułady źbirajucca likvidavać abjadnańnie tataraŭ, jakoje ŭznačalvaje muftyj Biełarusi
Minski haradski sud 18 červienia razhledzić pazoŭ Ministerstva justycyi z patrabavańniem likvidavać Biełaruskaje hramadskaje abjadnańnie tataraŭ «Zikr ul-Kitab», piša «Pozirk».
09.06.2024 / 12:14
Sudździa Alena Siamak pačnie praces a 10:00.
Pavodle źviestak z Adzinaha dziaržaŭnaha rehistra jurydyčnych asob i indyvidualnych pradprymalnikaŭ, arhanizacyja zarehistravanaja 5 lipienia 1993 hoda (da 2000-ha — Biełaruskaje hramadska-kulturnaje abjadnańnie tataraŭ-musulman «Al-Kitab»). Razam z Musulmanskim relihijnym abjadnańniem u Respublicy Biełaruś sadziejničaje budaŭnictvu i adnaŭleńniu miačeciaŭ, kulturnych centraŭ, škoł, muziejaŭ, biblijatek i inš.
Staršynioj «Zikr ul-Kitab» zjaŭlajecca muftyj Abu-Biekir Šabanovič, jaki z 2005 hoda ŭznačalvaje zhadanaje Musulmanskaje relihijnaje abjadnańnie. Šabanovič udzielničaje ŭ šmatlikich praŭładnych akcyjach, dziaržaŭnyja miedyja pradstaŭlajuć jaho lidaram biełaruskich musulman. U 2017 hodzie Alaksandr Łukašenka ŭznaharodziŭ jaho premijaj «Za duchoŭnaje adradžeńnie».
Kala vytokaŭ «Zikr ul-Kitab» i I Usiebiełaruskaha zjezda musulman, pa rašeńni jakoha ŭ 1994 hodzie było stvorana Musulmanskaje relihijnaje abjadnańnie, stajaŭ adzin ź lidaraŭ tatarskaj dyjaspary, viadomy historyk Ibrahim Kanapacki (pamior 9 vieraśnia 2005 hoda va ŭzroście 56 hadoŭ).
10 kastryčnika 2023 hoda źviazany ź siłavikami telehram-kanał apublikavaŭ videazapis z zatrymanaj Zarynaj Kanapackaj — dačkoj Ibrahima Kanapackaha, jakaja na toj momant była staršym navukovym supracoŭnikam adździeła historyi Biełarusi IX-XVIII stahodździaŭ i archieahrafii Instytuta historyi Nacyjanalnaj akademii navuk. Na zapisie jana — nie pa ŭłasnaj voli — kaža, što «była padpisana na ekstremisckija kanały, bot «Pieramoha», «znachodziłasia pobač ź mitynhami, fatahrafavałasia na fonie pratesnaha natoŭpu».
Ci było joj vinavata ŭ vinu štości kankretnaje, nieviadoma.
Apielacyju žurnalista Karnieja adchilili, jon rychtujecca da kałonii, skardzicca na cyharetny dym
Stała viadomaja data suda nad piensijanierkaj Halinaj Łahackaj