Hienkonsulstva Biełarusi ŭ Rastovie-na-Donie budzie adkazvać za akupavanyja terytoryi Ukrainy
Biełaruś adkryje tam hienkonsulstva da 1 lipienia.
07.06.2024 / 13:34
Vasil Hołubieŭ i Dźmitry Kruty. Fota: donland.ru
U konsulskuju akruhu Hienieralnaha konsulstva Biełarusi ŭ Rastovie-na-Donie ŭvojduć Vałhahradskaja i Rastoŭskaja vobłaści RF, a taksama akupavanyja terytoryi Danieckaj, Łuhanskaj, Zaparožskaj, Chiersonskaj abłaściej Ukrainy, Krym i ŭkrainski horad Sievastopal.
Pra heta było zajaŭlena siońnia na sustrečy hubiernatara Rastoŭskaj vobłaści Vasila Hołubieva z pasłom Biełarusi ŭ RF Dźmitryjem Krutym na PMEF-2024, paviedamlaje pres-słužba ŭrada rasijskaha rehijonu, piša Reform.news.
«Vasil Hołubieŭ prainfarmavaŭ Dźmitryja Krutoha ab tym, što ŭžo vyznačana pamiaškańnie dla Hienieralnaha konsulstva Respubliki Biełaruś u Rastovie-na-Donie. Konsulskaja akruha budzie ŭklučać terytoryi DNR, ŁNR, Respubliki Krym, Vałhahradskaj, Zaparožskaj, Rastoŭskaj, Chiersonskaj abłaściej i Sievastopala», — havorycca ŭ paviedamleńni.
Raniej paviedamlałasia, što Biełaruś adkryje hienkonsulstva ŭ Rastovie-na-Donie da 1 lipienia 2024 hoda. Jano budzie adkryta na bazie isnujučaha ŭ horadzie adździaleńnia pasolstva Biełarusi ŭ Rasii. Takim čynam režym Łukašenki idzie na novaje abvastreńnie adnosin z Ukrainaj, aficyjna pryznajučy ŭklučeńnie ŭ RF akupavanych ukrainskich terytoryj.