Kiraŭnika «Biełmiedtechniki» i jahonaha namieśnika sudziać za niajakasnyja miedyčnyja vyraby i pieravyšeńnie paŭnamoctvaŭ
Na miesca aryštavanaha Dźmitryja Straździna Łukašenka letaś naznačyŭ inšaha čałavieka, kab toj «navioŭ paradak u hetaj śfiery».
06.06.2024 / 14:11
Źleva naprava: Dźmitryj Straździn i Maksim Zajcaŭ. Fota: luka.zone, belmt.by
Na łavie padsudnych apynulisia kolišni hienieralny dyrektar «Biełmiedtechniki» Dźmitryj Straździn i jahony namieśnik Maksim Zajcaŭ (jaho imia pakul navat nie prybrali z sajta arhanizacyi).
Straździn atrymaŭ miedycynskuju adukacyju. Pracavaŭ u roznych miescach u Minsku — u niekalkich haradskich paliklinikach, minskaj balnicy chutkaj dapamohi, sanatoryi «Junactva», centry paśladypłomnaj adukacyi ŭ Minsku.
Z 2018 pa 2020 byŭ hałoŭnym uračom Respublikanskaj kliničnaj balnicy miedycynskaj reabilitacyi. Za hetuju pracu atrymaŭ padziaku ad Łukašenki.
Dźmitryj Straździn. Fota z avatarki jahonaha telehram-akaŭnta
Kiraŭnikom «Biełmiedtechniki» Straździna pryznačyli ŭ sakaviku 2020-ha. Pradpryjemstva zajmajecca impartam miedycynskaj techniki i abstalavańnia.
U 2020-m jon byŭ namieśnikam vybarčaj kamisii Kastryčnickaha rajona Minska, kudy patrapiŭ ad Biełaruskaj asacyjacyi ŭračoŭ. Uznačalvaje asacyjacyju adyjozny kiraŭnik Čyrvonaha kryža, deputat Dźmitryj Šaŭcoŭ.
Darečy, papiaredni hiendyrektar «Biełmiedtechniki» Alaksandr Šarak taksama za kratami — jon nabraŭ chabaraŭ na niekalki socień tysiač dalaraŭ i atrymaŭ 6,5 hoda kałonii. U Šaraka kanfiskavali 420 tysiač dalaraŭ.
Maksim Zajcaŭ maje bolš ścipłuju bijahrafiju. Jon nie ŭrač, a inžynier-zabieśpiačeniec. U 2007-m jon skončyŭ Mižnarodny instytut pracoŭnych i sacyjalnych znosinaŭ, a ŭ 2021-m — Akademiju kiravańnia. Pieravažna pracavaŭ na Homielščynie, a z 2011 pa 2014 — u Rasii.
Maksim Zajcaŭ. Fota ź jahonaj staronki Ukantakcie (archiŭnaja kopija)
Pa viartańni pačaŭ pracavać ekanamistam u Homielskim abłasnym patołahanatamičnym biuro. U 2018-m pierajšoŭ u «Biełmiedtechniku», a ŭ 2021-m jaho pryznačyli namieśnikam hienieralnaha dyrektara pradpryjemstva.
U abaviazki Zajcava ŭvachodziła zaklučeńnie damovaŭ na pastaŭki techniki i tavaraŭ. Taksama jon sačyŭ za tym, jak pracavali adździeły zakupak, zborki i roźničnaha handlu pradpryjemstva.
Zatrymali Straździna naprykancy 2022-ha abo napačatku 2023-ha. U sakaviku 2023 hoda na pasadu kiraŭnika «Biełmiedtechniki» pryznačyli Ihara Dziemidzienku, byłoha pieršaha namieśnika Dziaržaŭnaha vajenna-pramysłovaha kamiteta. Łukašenka tady adznačyŭ, što ŭ «Biełmiedtechnicy» «niamała prablemaŭ i treba navodzić paradak». Mienavita hetym tłumačyłasia naznačeńnie na pasadu «vajennaha čałavieka».
Ihar Dziemidzienka. Fota SB
Sud nad Dźmitryjem Straździnym i Maksimam Zajcavym pačaŭsia 3 červienia 2024 hoda ŭ Minskim haradskim sudzie. Mužčyn vinavaciać pa dvuch artykułach — «Vytvorčaść, uvoz, zachoŭvańnie abo prodaž falsifikavanych, niajakasnych, niezarehistravanych lekaŭ abo miedycynskich vyrabaŭ hrupaj asobaŭ» (č. 2 art. 338 KK) i «Pieravyšeńnie ŭłady abo słužbovych paŭnamoctvaŭ, ździejnienaje asobaj, jakaja zajmaje adkaznaje stanovišča» (č. 3 art. 426 KK).
Nieviadoma, ci znachodziacca jany pad vartaj i kaho ź ich vinavaciać pa jakim z artykułaŭ — moža być, što abodvuch vinavaciać pa dvuch artykułach, abo niekaha pa adnym. Nieviadomaja i sutnaść spravy. Ale pa artykule 426 moža pahražać ad troch da dziesiaci hadoŭ turmy.
Za bujny chabar sudziać dyrektara «Minskrambuda» i tyłavoha načalnika z Departamienta achovy MUS
Namieśniku kiraŭnika pradpryjemstva z hrupy kampanij «Santa» dali 10 hadoŭ za bujny chabar