Chakieist Dźmitryj Mialeška, čyja žonka Nadzieja pamierła ad ankałohii, vykłaŭ fota ź siabrami — i atrymaŭ chvalu paprokaŭ
Dźmitryj Mieleška, były chakieist biełaruskaj zbornaj i ŭdaviec papularnaj błohierki Nadziei Mieleška, apublikavaŭ fota z sustrečy ź siabrami. Nie ŭsim padpisčykam spadabałasia, što mužčyna pakłaŭ ruku na plačo dziaŭčyny pobač. U adkaz toj zapościŭ jašče adzin zdymak.
03.06.2024 / 10:22
Zvyčajna Dźmitryj nie vielmi aktyŭna publikuje fotazdymki na svajoj staroncy ŭ instahramie. Adzin z apošnich źjaviŭsia ŭ vieraśni minułaha hoda — u dzień, kali sa śmierci jaho žonki Nadziei prajšło roŭna paŭhoda. Jon tady napisaŭ: «Čas spyniŭsia. Ciabie niama pobač paŭhoda, ale ty zaŭsiody ŭ našych sercach… Kachajem i pamiatajem ciabie, naša rodnaja, miłaja Nadzieja».
A niekalki dzion tamu były chakieist vyrašyŭ padzialicca svaim dobrym viečaram u kampanii siabroŭ. Na fota čatyry mužčyny i čatyry žančyny — moža skłaścisia ŭražańnie, što ŭsie pryjšli parami. U kamientaryjach na Dźmitryja abrynułasia chvala narodnaha abureńnia. Šmat chto paličyŭ, što dla ŭdaŭca jašče rana demanstravać novyja adnosiny.
Dźmitryj Mialeška ź siabrami. Fota ź jaho instahrama
Sam Dźmitryj nijak nie staŭ tłumačyć svaim padpisčykam situacyju. Ale ŭ chutkim časie vykłaŭ u instahram novaje fota — na im mužčyna staić na bierazie voziera, abniaŭšysia z toj samaj dziaŭčynaj. Pad im dyskusija nakont taho, kali varta pačynać budavać asabistaje žyćcio paśla śmierci žonki, praciahnułasia jašče bolš aktyŭna. Ale ž druhi zdymak nabraŭ navat na 5 tysiač bolš łajkaŭ, čym pieršy.
Fota ź instahrama Dźmitryja
Nahadajem: u studzieni 2020 hoda ŭ Nadziei Mialeški vyjavili rak hrudziej treciaj stadyi. U lipieni taho ž hoda chvaroba ŭ błohierki pierajšła ŭ stadyju remisii. Ale ŭ sakaviku 2021-ha Nadzieja paviedamiła, što chvaroba viarnułasia, daktary znajšli ŭ jaje mietastazy ŭ piečani.
Žančyna praciahvała svajo lačeńnie ŭ Hiermanii, kudy pierajechała ź siamjoj. Jana zapuściła dabračynny fond u padtrymku ankachvorych. Pra svajo zmahańnie z ankałohijaj Nadzieja raspaviadała ŭ instahramie — na jaje staronku było padpisana kala paŭmiljona čałaviek. Žančyna napisała knihu, pryśviečanuju hetaj baraćbie, ale patrymać u rukach pieršy nadrukavany ekzemplar nie paśpieła. Kniha «Ranica nadychodzić zaŭsiody» stała ŭ Biełarusi bestseleram.
Jak kažuć siabry Dźmitryja, paśla śmierci Nadziei jon viarnuŭsia razam z dvuma synami ŭ Biełaruś.
Žonka viadomaha biełaruskaha chakieista zapuściła dabračynny fond dla chvorych na rak
Kniha biełaruskaj błohierki, jakaja zmahałasia z rakam, bje rekordy prodažaŭ