Памёр Ханс Георг-Вік, які на стыку стагоддзяў спрабаваў аб'яднаць беларускую апазіцыю
Нямецкі дыпламат і разведчык пражыў доўгае і змястоўнае жыццё: 96 гадоў.
25.05.2024 / 15:36
Ханс-Георг Вік. Фота: Еўрарадыё
Як стала вядома «Нашай Ніве», памёр Ханс-Георг Вік. Ён памёр 15 мая, але вядома стала толькі сёння.
Спадар Вік нарадзіўся 28 сакавіка 1928 года ў Гамбургу. Скончыў Гамбургскі ўніверсітэт, дзе вывучаў права і філасофію. З 1954 па 1993 гады працаваў у Міністэрстве замежных спраў ФРГ. У 1974—1977 гадах быў паслом ФРГ у Іране, у 1977—1980 — паслом ФРГ у СССР, у 1980—1985 — пастаянным прадстаўніком ФРГ у «Паўночнаатлантычнай радзе» (НАТА) у Бруселі.
У 1985—1990 гадах быў кіраўніком Федэральнай разведвальнай службы.
З 1998 па 2001 гады — Ханс-Георг Вік быў кіраўніком Кансультатыўнай назіральнай групы АБСЕ ў Беларусі, марна спрабуючы аб'яднаць беларускую апазіцыю.
Напярэдадні прэзідэнцкіх выбараў 2001 года з’явіўся артыкул у «Советскай Белоруссии» «Аперацыя «Белы бусел», дзе ў найлепшых традыцыях канспіралогіі газета намалявала Х.-Г. Віка як ворага, што пляце змовы, у якіх удзельнічае беларуская апазіцыя. З іншага боку, аматары тэорыі змовы з іншага боку малявалі яго, як прыхільніка беларускіх уладаў.