ES choča zabaranić ekspart u Biełaruś pradukcyi i technałohij padvojnaha pryznačeńnia
Novy pakiet sankcyj nakiravany na toje, kab zakryć ščylinu, jakaja dazvalała Maskvie impartavać raskošnyja aŭtamabili i inšyja zachodnija tavary, zabaronienyja sankcyjami.
23.05.2024 / 10:27
U prajekcie čarhovaha pakietu sankcyj, ź jakim aznajomiłasia vydańnie The Financial Times, adznačana, što novyja abmiežavańni, što abmiarkoŭvajucca ŭ ES, nakiravanyja na toje, kab «minimizavać ryzyku abychodu».
Sankcyi zabaroniać ekspart u Biełaruś a taksama praź jaje technałohij i tavaraŭ, jakija mohuć mieć vajennaje pryznačeńnie, a taksama zvadkavanaha pryrodnaha hazu.
ES taksama spynić impart ałmazaŭ ź Biełarusi, uśled za niadaŭniaj anałahičnaj zabaronaj adnosna hetych kaštoŭnych kamianioŭ rasijskaha pachodžańnia.
Akramia hetaha, pad zabaronu patrapiać pastaŭki aŭtamabilaŭ kłasa luks. Viadoma, što pry isnujučaj zaraz sistemie jeŭrapiejskija aŭtavytvorcy nie mohuć pradavać svaje darahija mašyny ŭ Rasiju, ale im nie zabaroniena ich pastaŭlać u Biełaruś.
«Ludzi z atačeńnia Łukašenki, jakija byli źviazanyja z Rasijaj, atrymali ad hetaha vialikuju vyhadu. Jany ŭzbahačalisia… My taksama viedajem, jak pradmiety raskošy traplajuć u Rasiju — praź Biełaruś», — cytuje vydańnie dyrektara prajekta analityčnaha centra Freedom House u Vilni Vicisa Jurkonisa.
The Financial Times źviartaje ŭvahu na istotnyja źmieny pakazčyku štomiesiačnaha patoku aŭtamabilaŭ i zapčastak da ich z krain ES u Biełaruś. Kali ŭ studzieni 2022 hoda jon składaŭ $50 młn, to praz dva hady, u studzieni 2024 hoda — $268 młn.
Najbolšy rost ekspartu zafiksavany ŭ katehoryjach samych darahich aŭtamabilaŭ — tych, jakija trapili pad sankcyi ES u dačynieńni da Rasii. Mytniki ES ličać, što biełaruskija kampanii stali klučavoj častkaj rasijskich kantrabandnych sietak, jakija pastaŭlajuć u Maskvu najnoŭšyja zachodnija aŭtamabili.
Tak adpaviedna handlovym źviestkam, u 2023 hodzie ŭ Rasiju praź biełaruskich pastaŭščykoŭ było ŭvieziena jak minimum 28 aŭtamabilaŭ Maybach, siaredni košt jakich składaje $217 tysiač. Taksama praź Biełaruś u Rasiju patrapiŭ Rolls-Royce Cullinan Black Badge koštam $630 tysiač, vypuščany ŭ kancy 2022 hoda.
Pa słovach premjer-ministra Litvy Inhrydy Šymanite, «dla rasijanina atrymać mašynu ŭ Biełarusi nie prablema». Palityk havoryć, što nievialikaja mytnaja słužba Litvy ź ciažkaściu spraŭlajecca sa «składanaj» sistemaj zabaronienych tavaraŭ pry nadhladzie hruzaŭ, jakija nakiroŭvajucca ŭ susiedniuju Biełaruś, a praduchileńnie abychodu sankcyj źjaŭlajecca «vielmi ciažkaj pracaj».
Pa infarmacyi Vilniusa, tolki za 2023 hod mytnia krainy admoviła ŭ afarmleńni hruzaŭ 39 tysiač razoŭ i nakiravała ŭ inšyja dziaržavy-členy ES zvyš 15 tysiač spravazdač ab ryzykach sa spasyłkaj na patencyjnyja parušeńni sankcyj.
Pa słovach Šymanite, adroźnieńni ŭ dvuch režymach sankcyj pakinuli «vielmi vidavočnyja dzirki».
Vydańnie adznačaje, što i premjer Litvy, i ministr zamiežnych spravaŭ Polščy Radasłaŭ Sikorski nastojvajuć na tym, kab ES nie abmiažoŭvaŭsia biahučymi pieramovami ab uzhadnieńni sankcyj pa kožnym siektary. Pa ich słovach, lepšy sposab harantavać, što Rasija bolš nie zmoža vykarystoŭvać bolš słabyja sankcyi Biełarusi — poŭnaje ŭzhadnieńnie dvuch abmiežavalnych režymaŭ.
Ab nieabchodnaści sinchranizacyi sankcyj vydańniu zajaviła i Śviatłana Cichanoŭskaja:
«Novy pakiet žyćciova važny, ale niedastatkovy. Sankcyi, uviedzienyja suprać Rasii ci suprać biełaruskaha režymu, nie mohuć dziejničać efiektyŭna kali jany nie sinchranizavanyja. … Dyktatary vykarystoŭvajuć adzin adnaho, kab abyści sankcyi i praciahvać handlavać. Biełaruski režym nabyvaje vajennuju techniku, raskošnyja aŭtamabili … dla Rasii».
Vydańnie piša, što Cichanoŭskaja taksama pa-raniejšamu zaniepakojenaja tym, jak mała ES zrabiŭ dla vykanańnia sankcyj. «U Jeŭropie niama miechanizmu zabieśpiačeńnia vykanańnia sankcyj», — cytuje The Financial Times Cichanoŭskuju i nahadvaje, što tolki letaś ES pryznačyŭ śpiecyjalnaha pasłańnika pa sankcyjach dla baraćby ź ich abychodam.
Vialikabrytanija ŭviała sankcyi suprać biełaruskaha aluminiju
Łatuška raskazaŭ, jak sprabavali vyzvalić palitviaźniaŭ u abmien na dopusk Biełarusi da Alimpijady
Jeŭrasajuz rychtuje bolš surovyja sankcyi suprać Biełarusi, ale dla kaliju mohuć zrabić vyklučeńnie