«Sprava vielmi surjoznaja». U Polščy praciahvajecca sprava padazravanych u dyviersijach i sabatažy
Dyviersii płanavalisia ŭ Polščy, Litvie, Łatvii i Šviecyi.
21.05.2024 / 08:08
Ilustracyjnaje fota. AP Photo/Petr David Josek
U Polščy raniej aryštavanyja dzieviać čałaviek, jakija padazrajucca ŭ padrychtoŭcy aktaŭ sabatažu pa zadańni rasijskich śpiecsłužbaŭ, paviedamiŭ viečaram u paniadziełak premjer-ministr Polščy Donald Tusk, piša TVN24.
«Što tyčycca aktaŭ sabatažu i dyviersii, to sprava vielmi surjoznaja. Heta tyčycca niekalkich jeŭrapiejskich krain. Na hety momant, biezumoŭna, Litvy, Łatvii, Polščy. Sa Šviecyi taksama pastupajuć sihnały ab tym, što jany zaniepakojenyja tym, što niekatoryja ź dziŭnych padziej taksama mohuć być vynikam sabatažu», — raskazaŭ Tusk.
Tusk raskazaŭ, što na hety momant aryštavanyja dzieviać padazravanych, jakija niepasredna na daručeńnie rasijskich słužbaŭ udzielničali ŭ aktach sabatažu ŭ Polščy.
«My havorym pra najomnych ludziej. Časam heta ludzi z kryminalnaha śvietu. Heta tyčycca jak ukrainskich, tak i biełaruskich hramadzian Polščy», — adznačyŭ jon.
Tusk raskazaŭ, što va Urocłavie była sarvanaja sproba padpału zavoda pa vytvorčaści farbaŭ, pobač znachodziŭsia chimičny zavod.
«I heta było na daručeńnie rasiejskich słužbaŭ, što było zajaŭlena ŭžo biassprečna», — raskazaŭ polski premjer.
Jon taksama adznačyŭ, što akt sabatažu mieŭ miesca ŭ Vilni na minułym tydni, kali adbyŭsia pažar na składzie ŭ Ikea.
«Tyja ž ludzi, jakija byli zatrymanyja tam, mohuć taksama mieć dačynieńnie da sprobaŭ dyviersijnych akcyj, havorka idzie ŭ asnoŭnym ab padpałach, u tym liku na terytoryi Polščy», — dadaŭ jon.
Udakładnieńnie
Z pačatkovaha varyjantu tekstu vynikała, što aryšty adbylisia niadaŭna. Nasamreč, heta nie tak. Havorka pra dzieviać čałaviek, aryštavanych raniej pa spravach dyviersij u Polščy.
Amal dźvie traciny palakaŭ padtrymlivajuć umacavańnie miažy ź Biełaruśsiu
Polšča ŭkładzie va ŭzmacnieńnie abarony ŭschodniaj miažy 2,5 młrd dalaraŭ
Tusk: Polšča pačała intensiŭnuju pracu nad fartyfikacyjaj miažy ź Biełaruśsiu