Za biełaruskuju zbornuju budzie vystupać čarhovaja rasijskaja bijatłanistka
Źmianić spartovaje hramadzianstva Ksienija Šniejder vyrašyła paśla zamužža.
14.05.2024 / 22:31
Ksienija Šniejder z mužam.
Rasijskaja bijatłanistka Ksienija Šniejder budzie vystupać za zbornuju Biełarusi. 24-hadovaja spartsmienka raniej pradstaŭlała rasijskuju Ciumienskuju vobłaść. Źmianić krainu Ksienija vyrašyła paśla taho, jak vyjšła zamuž za biełaruskaha bijatłanista Maksima Vierabja, paviedamlaje «Matč TB».
Bijatłanistku adpuskajuć u Biełaruś biez anijakich umoŭ i kampiensacyj. Pieršapačatkova płanavałasia, što Ksienija pierabiarecca ŭ novuju kamandu praz hod. Adnak maładyja paprasili kiraŭnika Biełaruskaj fiederacyi bijatłonu Adryjana Cybulskaha dapamahčy z chutkim pierajezdam.
Šniejder nie chapaje zorak ź nieba ŭ prafiesijnym bijatłonie. U minułym siezonie jana stała tolki 20-j u Kubku Rasii, nie zaniaŭšy nivodnaha pryzavoha miesca pa chodzie spabornictvaŭ.
Tradycyja vyrašeńnia kadravych prablem u zbornaj Biełarusi za košt pašpartyzacyi zamiežnikaŭ daŭniaja. Siarod rasijanak surjoznych pośpiechaŭ u zbornaj Biełarusi zmahli dabicca alimpijskaja čempijonka Nadzieja Skardzina i pryzior čempijanataŭ śvietu Volha Nazarava.
Zbornaja Biełarusi paśla pačatku poŭnamaštabnaj vajny Rasii suprać Ukrainy była adchilena ad udziełu ŭ mižnarodnych spabornictvach. Spartsmieny z 2022 hoda vystupajuć na rasijskich i sumiesnych rasijska-biełaruskich spabornictvach.