500 pajezdak va Ukrainu: što viadoma pra asudžanaha za «zdradu dziaržavie» stolinskaha elektramanciora
Vyśvietlić asobu Alaksandra Skarachoda atrymałasia dziakujučy «Kibierpartyzanam». Jamu mahli prysudzić ad siami da piatnaccaci hadoŭ kałonii.
11.05.2024 / 18:39
Alaksandr Skarachod. Fota «Kibierpartyzanaŭ», vyjava na fonie kai Stachowiak/CC0 Public Domain, kałaž «Našaj Nivy»
Asudžanaha kličuć Alaksandr Skarachod. Jamu 46 hadoŭ. Rodam mužčyna ź vioski Charomsk Stolinskaha rajona Bresckaj vobłaści, tam i chadziŭ u škołu.
Paśla skončyŭ kaledž na elektramanciora. Zhodna z bazami «Kibierpartyzanaŭ», jon nieŭzabavie ŭładkavaŭsia pa śpiecyjalnaści ŭ Departamient achovy MUS u Stolinie. Pracavaŭ taksama elektramancioram u pryvatnaj firmie.
Nieviadoma, što adbyłosia paśla, ale Skarachod pierajechaŭ u rabočy pasiołak Rečyca Stolinskaha rajonu, jaki znachodzicca za šeść kiłamietraŭ ad miažy z Ukrainaj. Apošnija hady jon žyŭ tam z žonkaj i dvuma małymi dziećmi — chłopčykam i dziaŭčynkaj.
Alaksandr Skarachod. Fota ź jahonaj staronki ŭ Adnakłaśnikach
Nieviadoma, čym Skarachod jašče zajmaŭsia, ale z červienia 2018 da pačatku 2020 jon vyjazdžaŭ va Ukrainu 500 razoŭ i nieŭzabavie viartaŭsia nazad, časta pa dva-try razy za sutki. Vidavočna, što jon niešta vaziŭ praź miažu, ale ci była heta aficyjnaja praca i ŭ čym była sutnaść, niezrazumieła.
Dakładnaja data zatrymańnia Alaksandra nieviadomaja, ale staronka ŭ Adnakłaśnikach, jakuju jon aktyŭna vioŭ, pierastała abnaŭlacca ŭ kastryčniku 2021-ha. Mahčyma, tady jaho i zatrymali. Pratesnych supołak u jahonych sacsietkach my nie adšukali, jak i niejkaj pratesnaj aktyŭnaści.
Sud nad Alaksandram skončyŭsia 1 lutaha 2024-ha hoda. A 19 krasavika prajšła apielacyja. Sudzili Skarachoda za «zdradu dziaržavie» (č. 1 art. 356 KK RB). Sankcyja artykuła praduhledžvaje pakarańnie ad siami da piatnaccaci hadoŭ turmy. Prysud nieviadomy, jak i sutnaść abvinavačańnia.
«Chacieła adznačyć jubilej ź siamjoj». Što viadoma pra Alaksandru Kasko, jakoj prysudzili 10 hadoŭ paśla viartańnia ŭ Biełaruś
Jak pravilna pačyścić smartfon pry pierasiačeńni miažy