Čym zajmajecca eks-viadučaja ANT Volha Sulimava, jakaja pierajechała ź siamjoj u Łondan?
Volha Sulimava (da zamužža — Kuryška) pačynała karjeru na Biełaruś-1, a potym praciahnuła pracu viadučaj na ANT. Jašče ŭ Biełarusi paralelna z pracaj na telebačańni Volha pačała vykładać kursy aratarskaha majsterstva (u pryvatnaści, u škole svajho muža «Lidar»), a ciapier pierabrałasia ź siamjoj u Łondan i pieraklučyłasia na nastaŭnictva całkam.
08.05.2024 / 07:00
Volha Sulimava. Fota z sacyjalnych sietak
Sulimava — prafiesijnaja viadoŭca: jana skončyła Vyšejšuju nacyjanalnuju škołu telebačańnia i radyjo ŭ Maskvie pa śpiecyjalnaści «Viadoŭca teleprahram».
Za pieryjad bolš čym 15-hadovaha televizijnaha stažu było miesca nie tolki pramym efiram i navinam, ale i kala 100 intervju (najbolš sama Volha hanarycca takimi surazmoŭcami, jak Iryna Chakamada, Uładzimir Poźnier, Ivan Achłabyścin, Alaksandr Mašenski, Hryhoryj Leps).
Viadučaja ź Ivanam Achłabyścinym. Fota: fejsbuk
Hledačy mohuć jaje pamiatać taksama pa šou — naprykład, pa «Zornych tancach» ci konkursach pryhažości. Darečy, sama Volha hanaravanaja tytułam «Mis Minsk 2004» i «Vice-mis Biełaruś».
Adzin ź jaje apošnich praciahłych aŭtarskich prajektaŭ na ANT — «Subotni vypusk». U adnym ź ich, naprykład, Volha chvaliłasia papularnaściu videa kaleh pra «abasranych karovaŭ». Rolik naviedvańnia Łukašenkam ahrachołdynhu «Kupałaŭskaje» ŭ Škłoŭskim rajonie ŭ 2019-m sapraŭdy raźlacieŭsia pa siecivie i paradziŭ šmat miemaŭ. Asabliva kamientar: «Ty pahladzi na hetuju skacinu, jana ž usia abasranaja!»
U pačatku 2020 hoda Sulimava paśpieła atrymać padziaku z ruk Łukašenki za «vysoki prafiesijanalizm, značny asabisty ŭniosak u raźvićcio dziaržaŭnaj infarmacyjnaj palityki». Što kankretna staić za hetaj uznaharodaj? Naprykład, šmatlikija pajezdki ŭ rehijony i kamplimientarnyja siužety adtul. Tranślavańnie pazityvu (86% biełarusaŭ hanaracca svajoj krainaj, «Biełaruś u čaćviorcy eksparcioraŭ syru i tvarahu», «nie treba panikavać padčas kavidu») i ŭsich ciełaruchaŭ Łukašenki ŭ Pałacy niezaležnaści (i nie tolki), uchvaleńnie daterminovaha hałasavańnia.
Fota z sacyjalnych sietak
Za dzień da vybaraŭ-2020 Volha pytała z ekranaŭ: «Zrujnavać dziela pryvidnych abiacańniaŭ? A što naŭzamien hatovyja prapanavać tyja, chto hetyja abiacańni razdaje?» — majučy na ŭvazie apazicyju.
Śpiecyjalny repartaž hetaha vypusku pad nazvaj «Na ciomnym baku» byŭ pryśviečany ruchu «Kraina dla žyćcia». «U karobkach — listoŭki i mietaličnyja pradmiety, padobnyja na supraćtankavyja vožyki», — pužaŭ zakadravy hołas u siužecie, demanstrujučy kadry apieratyŭnaj zdymki, namiakajučy, što pradstaŭniki abjadnanych štabaŭ rychtavalisia ŭzbroić biełarusaŭ da «tak zvanych mirnych pratestaŭ».
Ale nieŭzabavie siamja ŭsim składam pierajechała na Bali. Paśla troch hod žyćcia tam Sulimavy raspačali čarhovy novy etap: vosieńniu 2023-ha hoda ich dzieci pajšli ŭ škołu Łondana. Muž Volhi Siarhiej zmoh pierajechać tudy pa vizie talentaŭ.
Siamja Sulimavych u Łondanie. Muž Volhi Siarhiej — biznesoviec, deviełapier, piśmieńnik, zasnavalnik škoły anhlijskaj movy EnglishPapa i apart-hatela Aviator na Bali. Fota: fejsbuk
Volha ž praciahvaje vykarystoŭvać svoj bekhraŭnd i vučyć ludziej hučać bolš upeŭniena, pracujučy jak trenierka pa hołasie i maŭleńni.
«Vy ŭłaśnik biznesu ci top-mieniedžar i chočacie natchniać i matyvavać? Vy ekśpiert svajoj spravy i chočacie pierakanaŭča dzialicca viedami? Vy błohier, ale ad vašaha hołasu nie biahuć muraški ŭ słuchačoŭ? Vy marycie pracavać u kadry i vystupać pierad publikaj? Vy chočacie ŭzmacnić asabisty brend i raści ŭ karjery, kab zarablać bolšyja hrošy?», — zavablivaje Volha patencyjnuju metavuju aŭdytoryju na svaim sajcie.
Zajmacca svaim hołasam z eks-viadučaj možna jak indyvidualna, tak i ŭ hrupie. Košt takich zaniatkaŭ rozny, u zaležnaści ad vybaru pakieta: naprykład, piersanalnyja štotydniovyja videazadańni z razboram anłajn abyjducca ŭ $100 za hety samy tydzień (dadatkova navučencam adkryvajucca videaŭroki). Miesiačnaje navučańnie ŭ hrupie na 8 čałaviek kaštuje $200.
Čytajcie taksama:
Były viadučy BT Aŭčyńnikaŭ raskazaŭ pra zakuliśsie pracy, rasčaravańni i dapamohu palitviaźniam