Biełaruś pabuduje ŭ Murmansku port dla pieravałki hruzaŭ mahutnaściu 25-30 młn ton
Budaŭnictva płanujuć zaviaršyć da 2028 hoda. Inviestycyi buduć «vialikimi».
22.04.2024 / 15:36
Hubiernatar Murmanskaj vobłaści Andrej Čybis i hienieralny dyrektar TAA «Marski terminał «Varoty Arktyki» Andrej Bunakoŭ (źleva) padčas padpisańnia pahadnieńnia. Fota: urad Murmanskaj vobłaści
Kampanija ź Biełarusi pabuduje ŭ Murmansku da 2028 hoda vialiki port dla pieravałki hruzaŭ z respubliki, acenačnaja mahutnaść składzie 25-30 młn ton hruzaŭ u hod, paviedamiŭ hienieralny dyrektar TAA «Marski terminał «Varoty Arktyki» Andrej Bunakoŭ pa vynikach padpisańnia adpaviednaha pahadnieńnia z hubiernataram Murmanskaj vobłaści Andrejem Čybisam.
«Pra abjomy pieravałki: my raźličvajem praduhledzieć prajektnym rašeńniem abjomy da 25-30 młn ton u hod. Ja paćviardžaju hetuju ličbu, nad hetym my budziem pracavać. Heta budzie multymadalny kompleks, my raźličvajem na roznyja hruzy, jak sypkija, tak i naftapradukty. Nu i razhledzim jašče mahčymaść raźmiaščeńnia kantejniernaha terminała. Aceńvajem, što ŭ 2028 hodzie pieršyja hruzy ŭžo pavinny pastupać», — skazaŭ Bunakoŭ.
Jak paviedamiŭ Čybis, kampanija «Marski terminał «Varoty Arktyki» ŭžo zarehistravanaja ŭ Kolskim rajonie.
Kiraŭnik rehijona adznačyŭ, što budaŭnictva marskoha terminała pa pieravałcy hruzaŭ daść mahčymaść pavysić inviestycyjnuju pryvabnaść Murmanskaj vobłaści, a taksama stvoryć novyja pracoŭnyja miescy.
«Budaŭnictva porta dla Murmanskaj vobłaści — heta, u tym liku, raźvićcio najvažniejšych inviestycyjnych prajektaŭ, pavieličeńnie mahutnaściaŭ čyhunačnaj infrastruktury. Ciapier razhladajecca mahčymaść pieravałki 25 młn ton hruzu ŭ hod. Zrazumieła, inviestycyi ŭ hety prajekt buduć vielmi vialikimi», — adznačyŭ hubiernatar.
«Respublika Biełaruś atrymaje kruhłahadovy transpartny kalidor dla dostupu svaich tavaraŭ i hruzaŭ na suśvietnyja rynki», — havorycca na aficyjnym sajcie ŭrada Murmanskaj vobłaści.
Pa słovach Bunakova, port buduć budavać na pryvatnyja inviestycyi, u dalejšym miarkujecca vykarystoŭvać instrumient «pryvatnaha dziaržaŭnaha partniorstva».
U lutym pasoł Biełarusi ŭ RF Dźmitryj Kruty kazaŭ, što Pucin i Łukašenka pastavili zadaču zabiaśpiečyć abjom pieravałki biełaruskich hruzaŭ praz rasijskija party na ŭzroŭni 20 młn ton da kanca 2026 hoda.
Dla pašyreńnia padychodaŭ da Bałtyki dla biełaruskich hruzaŭ treba $1,7 młrd
Biełaruskija party ŭ Rasii: usio nie tak chutka abo nasamreč nikoli?