Adpačynak na pryrodzie. Top-5 malaŭničych miescaŭ u Biełarusi, dzie varta pabyvać hetaj viasnoj
Niahledziačy na ŭsie ciažkaści, dla biełarusaŭ usio ž jašče zachoŭvajucca mahčymaści dla adpačynku za miažoj. Adnak nie varta zabyvać, što i doma jość niamała ŭnikalnych i pryhožych miescaŭ, jakija dapamohuć adpačyć na łonie pryrody. Naviedvańnie nacyjanalnych parkaŭ i zapaviednikaŭ padoryć nie mienš uražańniaŭ, čym pajezdka na mory. Ekatury pa Biełarusi tolki pačynajuć nabirać papularnaść u apošnija hady. Vydańnie Myfin.by vyrašyła vyvučyć, jakija napramki dla ekałahičnaha turyzmu možna vybrać i ŭ kolki abyjdziecca pajezdka.
06.04.2024 / 16:56
Zdymak ilustracyjny. Fota: sportishka.com
Zakaźnik «Sporaŭski»
Dzie znachodzicca: Bresckaja vobłaść.
Zakaźnik «Sporaŭski» znachodzicca na terytoryi adrazu čatyroch rajonaŭ Bresckaj vobłaści: Biarozaŭskaha, Drahičynskaha, Ivanaŭskaha i Ivacevickaha. Na vielizarnych prastorach zakaźnika možna lubavacca pryhažościu bałot, rek i azioraŭ.
Fota: sporava.by
Dziakujučy tamu, što miascovaść zastałasia praktyčna ŭ niekranutym vyhladzie, tut udałosia zachavać redkija vidy raślin, ptušak i žyvioł. Mnohija ź ich zaniesienyja ŭ Čyrvonuju knihu. Tut jość mahčymaść panazirać za redkimi rybami, sysunami i kuzurkami.
Varta adznačyć, što hety zakaźnik — pieršaja terytoryja ŭ našaj krainie, jakaja atrymała mižnarodny status achovy «Ramsarskija ŭhodździ».
Košt
Kab daviedacca bolš pra miesca, u jakim znachodziciesia, zamoŭcie ahladnuju abo indyvidualnuju ekskursiju — cana składzie 13-50 rubloŭ. Arenda altanak abyjdziecca ŭ 10-90 rubloŭ, a pražyvańnie — 25-35 rubloŭ na čałavieka. Dadatkova pryjdziecca ŭnieści ŭ vydatki košt prajezdu da zakaźnika na ŭłasnym transparcie. Kali ž vybrać arhanizavany tur, to jaho košt budzie ad 180 rubloŭ na adnaho čałavieka.
Nacyjanalny park «Prypiacki»
Dzie znachodzicca: Homielskaja vobłaść.
Adpraŭlajemsia ŭ jašče adno malaŭničaje miesca, jakoje znachodzicca ŭ Homielskaj vobłaści, — park «Prypiacki». Jahonyja hałoŭnyja słavutaści — raka Prypiać i pryrodnyja kompleksy.
Fota: npp.by
Miesca padydzie jak dla spakojnaha, tak i dla aktyŭnaha adpačynku. Tut možna naviedać safary-park, u jakim ubačycie dzikich žyvioł u naturalnym asiarodździ.
Taksama jość historyka-kulturny kompleks «Muziej pad adkrytym niebam». U hetym miescy možna daviedacca pra biełaruskuju historyju i tradycyi, adčuć miascovy kałaryt. A na naziralnaj viežy adkryvajucca vydatnyja vidy na raku.
Stvoranyja ŭsie ŭmovy i dla amataraŭ rybałki. U aziorach žyvie kala 37 vidaŭ ryb. Jość prapanovy dla palaŭničych — pasprabavać zdabyć baravuju dzičynu, kapytnych žyvioł i mnohich inšych. Praŭda, ideja ekaturyzmu mała spałučajecca z palavańniem.
Kali ž chočacca spakojna pravieści čas, to možna prahulacca na ciepłachodzie, katamaranie abo matornaj łodcy. Abo vybrać hatovyja ekatury, jakija prapanuje park.
Košt
Pražyvańnie budzie kaštavać ad 24 rubloŭ (u zaležnaści ad abranaha kompleksu i kolkaści čałaviek u pakoi). Naviedvańnie safary-parku abyjdziecca ŭ 10-30 rubloŭ, a muzieja — 3-5 rubloŭ (dadatkova možna zamović pasłuhi ekskursavoda — 10-30 rubloŭ). Račnyja prahułki kaštujuć 20-260 rubloŭ, a hatovyja ekaekskursii — ad 10 rubloŭ. Na amatarskuju rybałku pryjdziecca vydatkavać da 150 rubloŭ.
Tak što vynikovaja suma za padarožža budzie zaležać ad vašych pieravah padčas adpačynku. Jašče treba dadać vydatki na darohu. Ź Minska arhanizavanyja tury pradajucca pa canie ad 130 rubloŭ.
Nacyjanalny park «Naračanski»
Dzie znachodzicca: na terytoryi Minskaj, Viciebskaj i Hrodzienskaj abłaściej.
Vielizarny park «Naračanski» — heta nie tolki pryhožyja piejzažy, ale jašče i miesca dla adpačynku. Adnoj z hałoŭnych jaho fišak źjaŭlajucca terytoryi vodnych ekasistem. Kožnaje voziera maje svaje reljefy i indyvidualnaść. U parku možna znajści redkija i achoŭnyja vidy raślin, taksama tam zarehistravana bolš za 300 vidaŭ pazvanočnych žyvioł. U vadajomach žyvie kala 35 vidaŭ ryb.
Foto: narochpark.by
Nacyjanalny park «Naračanski» prapanuje mnostva roznych ekskursij na luby hust. Naprykład, ekskursija pa ekałahičnaj ściežcy pryrodnaha kompleksu «Błakitnyja aziory» — «padarožža ŭ pryrodu», naviedvańnie safary-parku abo dendrałahičnaha sadu. Papularnyja viełamaršruty i ahladnyja ekskursii pa terytoryi parku.
Dla tych, kaho cikavić palavańnie i rybałka, jość prapanovy pa arhanizacyi i takoha volnaha času.
Košt
Košt za pražyvańnie budzie zaležać ad abranaha kompleksu i składzie jak minimum 80 rubloŭ. Ceny na ekskursii roznyja. Naprykład, naviedvańnie safary-parku na hrupu z 18 čałaviek abyjdziecca ŭ 237 rubloŭ, a dendrałahičnaha sadu — kala 6 rubloŭ. Aktualnyja ceny lepš daviedvacca pierad pajezdkaj.
Taksama varta ŭličvać košt prajezdu da parku. Arhanizavany tur ź Minska možna nabyć ad 50 rubloŭ.
Respublikanski łandšaftny zakaźnik «Zvaniec»
Dzie znachodzicca: Bresckaja vobłaść.
Najbujniejšaje ŭ Jeŭropie nizinnaje bałota miezatrofnaha typu ź vialikaj kolkaściu adkrytych minieralnych «astravoŭ» znachodzicca na terytoryi zakaźnika «Zvaniec».
Fota: zvanec.by
Fłora i fauna miesca sapraŭdy ŭražvaje: možna ŭbačyć bolš za 650 vidaŭ raślin, 125 vidaŭ ptušak i 5 vidaŭ reptylij. Mnohija ź ich znachodziacca na miažy źniknieńnia i zaniesienyja ŭ Čyrvonuju knihu.
Zakaźnik vydatna padychodzić dla ekałahičnaha turyzmu. Tut prapanujuć ekaturystyčnyja maršruty, dzie ŭsie achvotnyja pabačać unikalnuju pryrodu, słavutaści i paznajomiacca z raślinnym i žyviolnym śvietam.
Ekałahičnyja ściežki raźličanyja na prachodžańnie za 2-3 hadziny. Pa miery prachodžańnia maršrutu ŭbačycie stendy ź infarmacyjaj pra žyvioł i raśliny. Taksama hrupu supravadžaje hid, jaki padzielicca cikavymi i važnymi faktami.
Košt
Pražyvańnie abydziecca ŭ 20 rubloŭ na čałavieka. A ekskursii — ad 7 da 50 rubloŭ (u zaležnaści ad kolkaści čałaviek u hrupie). Dadatkova varta raźličyć sumu, jakuju vydatkujecie na darohu.
Centr ekałahičnaha turyzmu «Stańkava»
Dzie znachodzicca: Minskaja vobłaść.
Naprykancy — pra miesca, da jakoha nie pryjdziecca daloka dabiracca ź Minska. Na terytoryi Centra ekałahičnaha turyzmu «Stańkava» dla naviedvalnikaŭ jość zaasad, park dzikich žyvioł, koniefierma i kompleks zabavak. Dla turystaŭ taksama praduhledžanaja arenda altanak.
Fota: ecopark.by
Miesca vydatna padydzie dla adasoblenaha adpačynku na pryrodzie. U zaasadzie i parku dzikich žyvioł bolš za 40 vidaŭ ptušak i sysunoŭ. Tut jość strausy, paŭliny, zubry, aleni, łamy i mnohija inšyja. Pa pierymietry sadu prakładzieny piešachodny maršrut dla haściej, kab było zručniej nazirać za jaho žycharami.
Na koniefiermie možna pabačyć koniej roznych parod i zrabić konny špacyr pad kiraŭnictvam instruktaraŭ. Paśla adpačynku jość mahčymaść naviedać łaźniu i restaran.
Košt
Arenda damkoŭ dla pražyvańnia — ad 300 rubloŭ. Naviedvańnie zaasada na adnaho čałavieka abyjdziecca ŭ 10 rubloŭ, a konnyja prahułki — ad 4 da 40 rubloŭ. Dadatkova treba ŭličyć apłatu charčavańnia ŭ restaranie i prajezd da «Stańkava».
Čytajcie taksama:
Suła, Dudutki, Dukora — kolki kaštuje adpačynak u biełaruskich parkach kultury i historyi
Charyzmatyčny drapiežnik našych lasoŭ. Tajamnicy biełaruskaj rysi