U Tadžykistanie sud pryhavaryŭ piaciarych fihurantaŭ spravy ab vykradańni i zabojstvie bankira da pažyćciovych terminaŭ
Jany try hadziny katavali Šuchrata Ismatułojeva, a potym zabili.
18.03.2024 / 15:17
Šuchrat Ismatułojeŭ
Viarchoŭny sud Tadžykistana prysudziŭ da pažyćciovaha źniavoleńnia piaciarych fihurantaŭ spravy ab vykradańni i zabojstvie namieśnika kiraŭnika «Aryjonbanka» Šuchrata Ismatułojeva. Pra heta paviedamlaje tadžykskaja słužba Radyjo Svaboda/Azodzi sa spasyłkaj na krynicy.
Da pažyćciovaha źniavoleńnia prysudzili Dyłšoda Saidmurodava, Kamaruzamona Azizava, Akbara Achmadava, Bachtavary Safarava i Šachrucha Chudžajeva.
Akramia pazbaŭleńnia voli? Saidmurodavu, jak hałoŭnamu arhanizataru vykradańnia i zabojstva Ismatułojeva, pryznačyli kanfiskacyju majomaści.
Dzieviać inšych udzielnikaŭ złačynstva ŭ zaležnaści ad toj roli, jakuju adyhrali ŭ vykradańni, katavańniach i zabojstvie Šuchrata Ismatułojeva, pryhavorany da terminaŭ ad 1 da 8 hadoŭ turmy.
Cieła namieśnika kiraŭnika «Aryjonbanka» Šuchrata Ismatułojeva znajšli 15 žniŭnia ŭ horadzie Piendžykiencie. Pa viersii śledstva, 23 červienia bankira vykrała złačynnaja hrupa Dyłšoda Saidmurodava, siłkom pasadziła Ismatułojeva ŭ aŭtamabil z pryciemnienym škłom i paviezła ŭ napramku vioski Šadob-1.
«Hetyja asoby ŭ adnym z damoŭ nazvanaha siała da troch hadzin 24 červienia katavali Ismatułojeva z užyvańniem fizičnaj siły, elektrašokiera, aŭtafiena i inšych srodkaŭ i paśla zabili jaho. Zatym z metaj utojvańnia śladoŭ złačynstva skinuli cieła zabitaha i aŭtamašynu ŭ raku Zarafšan na 130-m kiłamietry aŭtadarohi Dušanbe — Čanak», — havorycca ŭ paviedamleńni Hienprakuratury Tadžykistana.
U toj ža dzień, pa źviestkach viedamstva, Saidmurodaŭ i Achmiedaŭ źbiehli ŭ Rasiju, a Chudžajeŭ i Ašuraŭ — u Turcyju. Praź piać dzion Ašuraŭ akazaŭsia ŭ aeraporcie Kišyniova, dzie adkryŭ stralbu, zabiŭšy dvaich aficeraŭ i paraniŭšy pasažyra. Pry zatrymańni Ašuraŭ atrymaŭ šmatlikija kulavyja ranieńni, ad jakich paśla pamior.
49-hadovy Šuchrat Ismatułojeŭ byŭ bratam Dyłšoda Ismatułozada, eks-hiendyrektara avijakampanii «Tadžyk Ejr». Jon adzin z nabližanych ludziej Chasana Asadułazoda, staršyni «Aryjonbanka» i švahra prezidenta krainy Emamali Rachmona.
Čytajcie taksama:
U Biełarusi zatrymali ŭradženca Tadžykistana, jaki ŭchiliŭsia ad słužby ŭ vojsku RF
U Dušanbe adklučanyja elektryčnaść, aciapleńnie, vada, pieraboi sotavaj suviazi i internetu