Hramadski transpart u Minsku atrymaje pryjarytet na śviatłaforach
Toj, chto časta jeździć na hramadskim transparcie, napeŭna viedaje, jak niepryjemna akazacca ŭ situacyi, kali patrebny aŭtobus, tralejbus ci tramvaj poźnicca. Kab pryvieści hrafik u paradak, u Minsku vyrašyli pratestavać pryjarytetnuju sistemu ruchu.
18.03.2024 / 14:54
Ilustracyjnaje fota «Naša Niva»
«Kali aŭtobus, tralejbus ci tramvaj adstaje ad zadadzienaha hrafika, jon «prosić» u sistemy pryjarytetny prajezd, — patłumačyŭ namieśnik načalnika UDAI HUUS Minharvykankama Dzianis Livanovič. — Za peŭnuju adlehłaść da śviatłafora (naprykład, 300 mietraŭ) hramadski transpart u aŭtamatyčnym režymie padaje sihnał. Paśla hetaha čyrvonaje śviatło źmianiajecca zialonym. Aŭtobus prajechaŭ — i cykł pracy śviatłafora viartajecca da štatnaha. Dalej prahramnaje zabieśpiačeńnie znoŭ analizuje hrafik. I kali transpartu treba jašče raz prajechać śviatłafor z pryjarytetam, sistema znoŭ zapytaje takuju mahčymaść. U budučyni padobnaja schiema dazvolić u tym liku adčuvalna pamienšyć intervały».
Načalnik adździeła techničnych srodkaŭ i sistem UDAI HUUS Minharvykankama Vital Saŭc udakładniŭ: «My nie havorym pra toje, što na ŭsich śviatłaforach transpart budzie prajazdžać pryjarytetna, zaŭsiody na zialony. Sistema ŭ cełym moža heta zrabić. U budučyni, kali takoje pytańnie ŭstanie, to heta lohka realizavać. Ale moža zdarycca takaja situacyja, kali na skryžavańni sustrenucca dva pryjarytetnyja aŭtobusy. Tady pieršym prajedzie toj, jaki, na dumku pieravozčyka, bolš važny dla transpartnych znosin. Pryjarytet budzie pradastaŭlacca na prablemnych vulicach u častcy ruchu hramadskaha transpartu. Nieabchodnaść pradastaŭleńnia pryjarytetu na tym ci inšym skryžavańni budzie zaležać i ad ahulnych umoŭ ruchu asabistaha transpartu».
Pakul sistema pracuje ŭ testavym režymie i aprabujecca na tramvajnym ruchu.
«Pa niekatorych maršrutach užo sabrali vodhuki, — dadaŭ Vital Saŭc. — Na praciahu miesiaca my praviadziem paraŭnańnie pa roznych pakazčykach, uklučajučy čas sutak, dni tydnia i inšyja niuansy, kab atrymać poŭnuju karcinu. Hłabalnaja naša meta zaklučajecca ŭ tym, kab čałaviek moh karystacca hramadskim transpartam chutka i efiektyŭna i razumieŭ: sieŭšy na aŭtobus ci tralejbus, jon nie spoźnicca na pracu ci kudyści jašče».
Čytajcie taksama:
U Minsku źjaviacca novyja tramvai
Treciaj linijaj minskaha mietro karystajecca mienš za 2% pasažyraŭ