Playtika ŭsio ž zabaronić pracu ź Biełarusi. A za rełakiejt ščodra zapłacić
30 krasavika — apošni pracoŭny dzień dla ŭsich, chto zastaniecca ŭ Biełarusi.
18.03.2024 / 09:04
Devby.io
U studzieni stała viadoma ab sychodzie ź Biełarusi izrailskaj hiejmdeŭ-kampanii Playtika. Na minułym tydni top-mieniedžmient kampanii paviedamiŭ, što 30 krasavika — apošni pracoŭny dzień dla ŭsich, chto zastaniecca ŭ Biełarusi. Paśla hetaj daty dostupu da karparatyŭnych resursaŭ ź Biełarusi nie budzie, piša Devby.io.
Fizičny ofis u Minsku ŭžo zakryty dla bolšaści supracoŭnikaŭ z pačatku sakavika.
Častka kamandy raźličvała, što zmoža pracavać ź Biełarusi, de-jure z afarmleńniem u Hruzii.
— Ale ciapier skazali, što mahčymaść pracavać ź Biełarusi całkam admianiajecca, — raspaviała krynica.
Supracoŭnikaŭ, ź ich słoŭ, paprasili vyznačycca sa svaimi płanami — zastavacca abo źjazdžać z kampanijaj — da 20 sakavika.
Rełakantam dazvolać pracavać z bolšaści krain. U čornym śpisie, akramia Biełarusi, jak raspaviali krynicy, «jość Rasija, niekatoryja ŭkrainskija harady, Kuba, Siryja, Livan, Iran, Paŭnočnaja Kareja».
Pakul niama infarmacyi pra toje, kolki supracoŭnikaŭ minskaha ofisa ŭžo zvolnienyja/zvolniacca, a kolki praciahnuć pracu. Anons zakryćcia ofisa ŭ Minsku supaŭ z novym raŭndam hłabalnych skaračeńniaŭ u Playtika. Miedyja paviedamlali, što skarociać 300-400 supracoŭnikaŭ u roznych łakacyjach. Kamanda ŭ Minsku čakała, što pracu mohuć stracić da 50% ofisa (kala 150 čałaviek). Jak raspaviała adna z krynic, u lutym «z mnohimi inžynierami zaviaršyli pracoŭnyja adnosiny, vypłacili im zarobak i hadavy bonus».
Bonusy i dapamohu ź pierajezdam
Kampanija, jak śćviardžajuć surazmoŭcy vydańnia, prapanavała rełakantam dobryja bonusy, ale z adterminoŭkaj.
Naprykład, rełakantam, jakija adpracujuć u kampanii da kanca leta 2024, abiacajuć vypłacić bonus u pamiery čatyroch zarobkaŭ. A tyja, chto adpracuje da kanca krasavika 2025 hoda, atrymajuć u kancy bonus u pamiery vaśmi zarobkaŭ.
Zarobak u suviazi z rełakacyjaj, zdajecca, nie buduć pierahladać. Tym bolš, kala miesiaca tamu ŭžo byli pierahlady. Ale pavinny vypłacić razava 600 dalaraŭ da zarobku, — raspaviała krynica.
Pa słovach krynicy, kampanija budzie dapamahać rełakantam pa miery mahčymaści, adnak asnoŭnyja pytańni «pryjdziecca vyrašać samastojna».
— Kampanija budzie dapamahać z atrymańniem viz, ale ciapier z hetym prablemy nie tolki ŭ Playtika.
Biełaruś siarod faktaraŭ ryzyki
U kvartalnych spravazdačach Playtika Biełaruś fihuravała siarod faktaraŭ ryzyki. U finansavaj spravazdačnaści za minuły hod Playtika taksama zhadała Biełaruś u pieraliku ryzyk, «źviazanych ź mižnarodnymi apieracyjami i ŭłasnaściu».
Kampanija nie apublikavała padrabiaznuju infarmacyju ab dachodach u rehijonach / łakacyjach. Miž tym, za minuły hod u Playtika źniziłasia vyručka i čysty prybytak.
Jak vynikaje ź finansavaj spravazdačnaści, za 2023 hod kampanija atrymała 2,57 miljarda dalaraŭ vyručki. Heta na 2% ci amal na 50 miljonaŭ dalaraŭ mienš, čym u 2022 hodzie. Vyručka kampanii ŭpała ŭpieršyniu za apošnija try hady.
U 2024 kampanija nie prahnazuje značny rost vyručki i dapuskaje jaje źnižeńnie. Playtika čakaje, što vyručka składzie 2,52-2,62 miljarda dalaraŭ.
Čysty prybytak Playtika za minuły hod upaŭ u paraŭnańni z 2022 amal na 15% i skłaŭ 235 miljonaŭ dalaraŭ.
Taksama stała viadoma, što kiraŭnictva Playtika admoviłasia ad płanaŭ prodažu kampanii i vyrašyła pieraaryjentavacca na M&A-ździełki. Da źmieny kursu kampaniju padšturchnuła «ciapierašniaja niestabilnaść u Izraili i Ukrainie».
Jak paviedamiŭ prezident i finansavy dyrektar Playtika Krejh Abrachams, u bližejšyja try hady Playtika na źlićci i pahłynańni vydzielić ad 600 miljonaŭ dalaraŭ da 1,2 miljarda dalaraŭ. Płanujecca zaklučać pa 1-2 ździełki ŭ hod. Top-mieniedžar dadaŭ, što ŭ kampanii «jość usie šancy ŭznačalić kansalidacyju ŭ industryi mabilnych hulniaŭ».
Čytajcie taksama:
Kampaniju ŭ Minsku zakryvaje jašče adzin viadomy mabilny raspracoŭščyk
EPAM skaraciŭ hłabalnuju kamandu na 10%. Rełakiejt amal zamarožany